ଭୁବନେଶ୍ୱର, ୨୯।୧୧(ବ୍ୟୁରୋ): ସଂସଦର ଶୀତକାଳୀନ ଅଧିବେଶନ ଚଳିତ ମାସ ୨୯ରୁ ଆରମ୍ଭ ହୋଇ ଡିସେମ୍ବର ୨୩ ପର୍ଯ୍ୟନ୍ତ ଚାଲିବ। ଏହି ଅଧିବେଶନରେ ବହୁ ଗୁରୁତ୍ୱପୂର୍ଣ୍ଣ ବିଲ୍ ପାସ୍ କରିବା ଲାଗି କେନ୍ଦ୍ର ସରକାର ଯୋଜନା ରଖିଛନ୍ତି। ମୁଖ୍ୟତଃ ୩ କୃଷି ଆଇନ ଉଚ୍ଛେଦ ବିଲ୍ ପାସ୍ ହେବାକୁ ଥିବାବେଳେ ଏହା ଉପରେ ସମସ୍ତଙ୍କ ନଜର ରହିଛି। ହେଲେ ଏଥର ସଂସଦରେ ଓଡ଼ିଶାର ବିଭିନ୍ନ ପ୍ରସଙ୍ଗ ନେଇ ମୁହଁ ଖୋଲିବାକୁ ରାଜ୍ୟର ଏମ୍ପିମାନେ ପ୍ରସ୍ତୁତ ହୋଇଛନ୍ତି। ଏଥର ପାର୍ଲାମେଣ୍ଟରେ ଓଡ଼ିଶାର ଆଇନ ଶୃଙ୍ଖଳା ପରିସ୍ଥିତି ନେଇ ମୁହଁ ଖୋଲିବାକୁ ଭାଜପା ମତ ରଖିଛି। ସେହିପରି ଅପହରଣ ଓ ହତ୍ୟା ଘଟଣାରୁ ଆରମ୍ଭ କରି ମମିତା ମେହେର ହତ୍ୟା ଘଟଣା ପର୍ଯ୍ୟନ୍ତ ସମସ୍ତ ବିଷୟ ପାର୍ଲାମେଣ୍ଟରେ ଉଠିବ ବୋଲି ଭାଜପା କହିଛି। ସେହିପରି ବିଭିନ୍ନ ପଡ଼ୋଶୀ ରାଜ୍ୟ ସହ ରହିଥିବା ସୀମା ବିବାଦ ପ୍ରସଙ୍ଗରେ ମଧ୍ୟ ଦଳ ମୁହଁ ଖୋଲିବାକୁ ପ୍ରସ୍ତୁତ ହୋଇଛି। ଅନ୍ୟପଟେ ବିଜେଡି ଉଷୁନା ଚାଉଳ ସଂଗ୍ରହ, ମହିଳାଙ୍କ ପାଇଁ ସଂରକ୍ଷଣ, ପ୍ରଧାନମନ୍ତ୍ରୀ ଫସଲ ବୀମା ଯୋଜନା ସହ ରାଜ୍ୟ ବିଧାନ ପରିଷଦ ପ୍ରସଙ୍ଗ ଉଠାଇବ ବୋଲି କହିଛି। ସେହିପରି ଆନ୍ଧ୍ର ଏବଂ ଓଡ଼ିଶା ମଧ୍ୟରେ ଚାଲିଥିବା ସୀମା ବିବାଦ ଓ ମମିତା ମେହେର ହତ୍ୟା ଘଟଣା ଉଠାଇବ ବୋଲି କଂଗ୍ରେସ ମତ ରଖିଛି।
ଭାଜପା ଏମ୍ପି ସୁରେଶ ପୂଜାରୀ କହିଛନ୍ତି, ଓଡ଼ିଶା ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ସବୁଠାରୁ ବଡ଼ ପ୍ରସଙ୍ଗ। ପରୀଠାରୁ ଆରମ୍ଭ କରି ମମିତା ମେହେର ହତ୍ୟା ପ୍ରସଙ୍ଗ କଥା ଆଲୋଚନା ହେବ। ଓଡ଼ିଶାରେ ଦେଖାଦେଉଥିବା ନାରୀ ନିର୍ଯାତନା ସବୁଠାରୁ ବଡ଼ ପ୍ରସଙ୍ଗ। ରାଜ୍ୟ ସରକାରଙ୍କୁ କାଠଗଡ଼ାରେ ଠିଆ କରିବା ଲାଗି ଆମେ ଏଥର ବ୍ୟାପକ ପ୍ରସ୍ତୁତି କରିଛୁ। ଏସବୁ ପ୍ରସଙ୍ଗକୁ ଲୋକ ସଭାରେ ଶାଣିତ ଭାବେ ଭାଜପା ଉପସ୍ଥାପିତ କରିବ।
କଂଗ୍ରେସ ଏମ୍ପି ସପ୍ତଗିରି ଉଲାକା କହିଛନ୍ତି, ରାଜ୍ୟର ଆଇନ ଶୃଙ୍ଖଳା ସବୁଠାରୁ ବଡ଼ ପ୍ରସଙ୍ଗ। ମମିତା ମେହେର ହତ୍ୟା ଘଟଣା ଓ ମାହାଙ୍ଗା ଡବଲ ମର୍ଡର ଘଟଣାରେ ମଧ୍ୟ ମନ୍ତ୍ରୀଙ୍କ ସମ୍ପୃକ୍ତି କଥା ଆସୁଛି। ଯେପର୍ଯ୍ୟନ୍ତ ସେମାନଙ୍କୁ ବରଖାସ୍ତ କରାଯିବ ନାହିଁ ଏବଂ ଏହି ଘଟଣାରେ ନିରପେକ୍ଷ ତଦନ୍ତ ହେବ ନାହିଁ ସେକଥା କଂଗ୍ରେସ ଉଠାଇବ। ସେହିପରି ଓଡ଼ିଶା-ଆନ୍ଧ୍ର ମଧ୍ୟରେ ରହିଥିବା ସୀମା ବିବାଦ ଘଟଣାରେ ଯେଉଁ ମୁଖ୍ୟ ଶାସନ ସଚିବ ସ୍ତରୀୟ କମିଟି କରାଯାଇଛି, ସେଥିରେ କେହି ଲୋକପ୍ରତିନିଧି ନାହାନ୍ତି। ଯଦି ଏହି ଘଟଣାରେ ଲୋକଙ୍କ ସ୍ବାର୍ଥ ହାନି ଘଟିବ ତେବେ ରାସ୍ତାଠାରୁ ଲୋକ ସଭା ପର୍ଯ୍ୟନ୍ତ ସବୁଠି ଆନ୍ଦୋଳନ ହେବ ବୋଲି ଉଲାକା କହିଛନ୍ତି।
ବିଜେଡି ରାଜ୍ୟ ସଭା ଏମ୍ପି ପ୍ରସନ୍ନ ଆଚାର୍ଯ୍ୟ କହିଛନ୍ତି, ଚଳିତବର୍ଷ କେନ୍ଦ୍ର ସରକାର ଏକ ଆଦେଶନାମା ଜାରି କରିଛନ୍ତି। ସେଥିରେ ଉଲ୍ଲେଖ କରିଛନ୍ତି, ଓଡ଼ିଶାରୁ ଆଉ ଉଷୁନା ଚାଉଳ ପ୍ରୋକ୍ୟୁର କରିବେ ନାହିଁ। ଏହାଦ୍ୱାରା ଧାନ ସଂଗ୍ରହ ଉପରେ ଏକ ନାକାରାତ୍ମକ ପ୍ରଭାବ ପଡ଼ିବାକୁ ଯାଉଛି। ଏହାଦ୍ୱାରା ସବୁଠାରୁ ଅଧିକ କ୍ଷତି ଚାଷୀମାନଙ୍କର ହିଁ ହେବ। ଏ ବ୍ୟବସ୍ଥାରେ ପରିବର୍ତ୍ତନ ଲାଗି କେନ୍ଦ୍ରକୁ ଅନୁରୋଧ କରିବୁ। ଏହିପରି ଯେଉଁସବୁ ଚାଷୀ ଏବଂ ଓଡ଼ିଶା ସମ୍ବଳିତ ପ୍ରଶ୍ନ ରହିଛି ତାହା ଉପସ୍ଥାପିତ କରିବୁ ବୋଲି ପ୍ରସନ୍ନ କହିଛନ୍ତି।
