ଯାଜପୁର,୬।୭(ହର୍ଷବର୍ଦ୍ଧନ ବେହେରା)ରାଜ୍ୟରେ ଲଘୁ ଖଣିଜ ଦ୍ରବ୍ୟର ଲୁଟ୍କୁ ଦୃଢ଼ ହସ୍ତରେ ଦମନ କରିବା ଏବଂ ରାଜସ୍ବ କ୍ଷତିକୁ ରୋକିବା ପାଇଁ ସରକାର ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି। ହେଲେ ଯାଜପୁର ଜିଲାର ଧର୍ମଶାଳା ତହସିଲ ଅଞ୍ଚଳରେ କଳାପଥର ଏବଂ ଦର୍ପଣ ତହସିଲ ଅଞ୍ଚଳରେ ମୋରମ ଓ ମାଙ୍କଡ଼ାପଥର ଲୁଟ୍ ଅଣାୟତ୍ତ ହୋଇଛି। କେତେଜଣ ଅସାଧୁ ସରକାରୀ କର୍ମଚାରୀଙ୍କ ପରୋକ୍ଷ ସହାୟତାରେ ବ୍ୟବସାୟୀମାନେ ଅଣଲିଜ୍ ଅଞ୍ଚଳରୁ ବିପୁଳ ପରିମାଣର ଲଘୁ ଖଣିଜ ଦ୍ରବ୍ୟ ଲୁଟ୍ କରି ମାଲାମାଲ ହେଉଛନ୍ତି। ବାଲିଚନ୍ଦ୍ରପୁର ଥାନା ଅନ୍ତର୍ଗତ ଦର୍ପଣ ତହସିଲ ମାଣ୍ଡୁକା ପାହାଡ଼ରେ ରବିବାର ମୋରମ ଲୁଟ୍ ଚାଲିଥିବାବେଳେ ବିଭିନ୍ନ ଗାଡ଼ି ଜବତ ସହ ୨ ଜଣଙ୍କୁ ଗିରଫ ଘଟଣାରୁ ଏହା ସ୍ପଷ୍ଟ ହୋଇଛି। ତେବେ ଏହି ଘଟଣାରେ ସୂଚନା ଅଧିକାର କର୍ମୀ ସର୍ବେଶ୍ୱର ବେହୁରାଙ୍କ ସମ୍ପୃକ୍ତି ଥିବା ଜଣାପଡ଼ିବା ପରେ ବିଭିନ୍ନ ମହଲରେ ଚର୍ଚ୍ଚାର ବିଷୟ ହୋଇଛି।
ବେଆଇନ ଲଘୁ ଖଣିଜ ଦ୍ରବ୍ୟ କାରବାର ଉପରେ ଏନ୍ଜିଟିଠାରୁ ଆରମ୍ଭ କରି ଲୋକାୟୁକ୍ତ ଓ ହାଇକୋର୍ଟ ପର୍ଯ୍ୟନ୍ତ ଏକାଧିକ ମାମଲା ରୁଜୁ କରି ଚର୍ଚ୍ଚାରେ ଥିବା ବେହୁରାଙ୍କ ଏଭଳି କାର୍ଯ୍ୟକୁ ସାଧାରଣରେ ନାପସନ୍ଦ କରାଯାଇଛି। ଏହାବାଦ୍ ଏହି ଖାଦାନରୁ ପ୍ରାୟ ୪୦ କୋଟି ଟଙ୍କାର ମୋରମ ଲୁଟ୍ ହୋଇଥିବା ଅଭିଯୋଗ ହୋଇଛି। ଏହାର ସାଟେଲାଇଟ ମାପଚୁପ କରି ହିସାବ କଲେ ବାସ୍ତବତା ସାମ୍ନାକୁ ଆସି ପାରନ୍ତା ଏବଂ ଜରିମାନା ଆଦାୟ ସହଜ ହୋଇ ପାରିବ ବୋଲି ସାଧାରଣରେ ମତପ୍ରକାଶ ପାଇଛି।
ବାଲିଚନ୍ଦ୍ରପୁର ଥାନାରେ ଦର୍ପଣ ତହସିଲଦାର ମାନସ କୁମାର ତ୍ରିପାଠୀଙ୍କ ଲିଖିତ ଅଭିଯୋଗ ଅନୁଯାୟୀ, ରବିବାର ସନ୍ଧ୍ୟା ୬ଟାରେ ବିଶ୍ୱସ୍ତ ସୂତ୍ରରୁ ଖବର ପାଇ ମାଣ୍ଡୁକା ମୌଜାର ମୋରମ ଖାଦାନ ଉପରେ ଚଢାଉ ହୋଇଥିଲା। ଚଢାଉରେ ମୋରମ ବୋଝେଇ ଏକ ଏକ୍ସଭେଟର ମେଶିନ ସହ ୫ଟି ହାଇୱା ଟ୍ରକ ଜବତ କରାଯାଇଥିଲା। ତେବେ ଏକ୍ସଭେଟରଟି ସୂଚନା ଅଧିକାର କର୍ମୀ ସର୍ବେଶ୍ୱର ବେହୁରାଙ୍କ ନାମରେ ଥିବା ପରେ ଜଣାପଡ଼ିଥିଲା। ଏନେଇ ବାଲିଚନ୍ଦ୍ରପୁର ଥାନାରେ ଏକ ମାମଲା(ନଂ.୨୩୬/୨୩)ରୁଜୁ ହୋଇ ସୋମବାର ସକାଳେ ସର୍ବେଶ୍ୱରଙ୍କ ଜାରକାସ୍ଥିତ ଘରେ ପୋଲିସ ପକ୍ଷରୁ ଚଢାଉ କରାଯାଇଥିଲା ା ହେଲେ ସେ ଫେରାର ଥିବା ସୂଚନା ମିଳିଛି। ସୂଚନାଯୋଗ୍ୟ, ମାଣ୍ଡୁକା ମୌଜାର ୩୬୧୧ ପ୍ଲଟରେ ୧୨ ଏକର ଜମିରେ ମୋରମ ଉତ୍ତୋଳନ କରିବାକୁ ଭୁବନେଶ୍ୱର ବାବୁଜୀ ନଗରର ହରପ୍ରସାଦ ଷଡ଼ଙ୍ଗୀଙ୍କୁ ତହସିଲ ପକ୍ଷରୁ ଅନୁମତି ମିଳିଛି। ଅନୁମତି ଅନୁସାରେ ୨୦୨୧ରୁ ୨୦୨୬ ପର୍ଯ୍ୟନ୍ତ ୫ ବର୍ଷ ଦୀର୍ଘମିଆଦି ଲିଜ୍ ଅନୁସାରେ ବର୍ଷକୁ ୧ କୋଟି ଟଙ୍କା ହିସାବରେ ଲିଜ୍ ଦିଆଯାଇଛି। ହେଲେ ଲିଜ୍ ଏରିଆ ବାହାରେ ୩୬୧୦ନଂ.ପ୍ଲଟରୁ ମୋରମ ବେଆଇନ ଭାବେ ଉତ୍ତୋଳନ ହେଉଥିବାବେଳେ ତହସିଲ ପ୍ରଶାସନ ପକ୍ଷରୁ ଚଢାଉ ହୋଇଥିଲା। ଏହି ବେଆଇନ ଏରିଆରୁ ବର୍ଷକୁ ପ୍ରାୟ ୨୦ କୋଟି ଟଙ୍କାର ମୋରମ ଉତ୍ତୋଳନ ହୋଇଥିବା ଅନୁମାନ କରାଯାଇଛି। କିନ୍ତୁ ତହସିଲ ପ୍ରଶାସନ ପୂର୍ବରୁ ଏ ସଂକ୍ରାନ୍ତରେ ଜାଣିଥିଲେ ସୁଦ୍ଧା କୌଣସି ପଦକ୍ଷେପ ନ ନେବାରୁ ସରକାର ବିପୁଳ ପରିମାଣର ରାଜସ୍ବ ହରାଇଥିବା ମତପ୍ରକାଶ ପାଇଛି। ଅନ୍ୟପକ୍ଷେ ୨୦୨୨ ନଭେମ୍ବର ୨ରେ ଚଣ୍ଡିଖୋଲ ନୋଟାରୀରେ ଏକ ଚୁକ୍ତିପତ୍ର ସୋସିଆଲ ମିଡ଼ିଆରେ ଘୁରି ବୁଲୁଛି। ଉକ୍ତ ଚୁକ୍ତିପତ୍ରରେ ସର୍ବେଶ୍ୱର ବେହୁରା ତାଙ୍କ ହୁଣ୍ଡାଇ ଏକ୍ସଭେଟର ଲିଜ୍ ସୂତ୍ରରେ ବାଲିଚନ୍ଦ୍ରପୁର ଥାନାର ଅଚ୍ୟୁତବସନ୍ତ ଗ୍ରାମର ମନୋଜ କୁମାର ରାୟଙ୍କୁ ଦେଇଥିବା ଦର୍ଶାଯାଇଛି। ତେବେ ଉକ୍ତ ଏକ୍ସଭେଟର କେଉଁ କାର୍ଯ୍ୟରେ ନିୟୋଜିତ ହେଉଥିଲା ତାହା ସ୍ପଷ୍ଟ ହୋଇ ପାରିନାହିଁ।
ଜଣାଶୁଣା ସୂଚନା କର୍ମୀ ବେହୁରା ତାଙ୍କ ଜମିରେ ବେଆଇନ ଭାବେ ମାଟି ପକାଉଥିବା ନେଇ ଧର୍ମଶାଳା ତହସିଲଦାର ଥାନାରେ ଅଭିଯୋଗ କରିଥିଲେ। ଏନେଇ ଧର୍ମଶାଳା ଥାନା ପକ୍ଷରୁ ବେହୁରାଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା। ସେ ଜାମିନ ଆସିବାର ୨ ସପ୍ତାହ ନ ପୁରୁଣୁ ପୁଣି ମୋରମ ଚାଲାଣରେ ଫସିବା ଘଟଣା ସାରା ଜିଲାରେ ଚର୍ଚ୍ଚାର ବିଷୟ ହୋଇଛି। ଏ ସଂକ୍ରାନ୍ତରେ ଦର୍ପଣ ତହସିଲର ଅତିରିକ୍ତ ତହସିଲଦାର ନିରଞ୍ଜନ ଗୁରୁଙ୍କୁ ପଚାରିବାରେ ସେ କହିଛନ୍ତି, ମାଣ୍ଡୁକା ପାହାଡ଼ରେ ବେଆଇନ ଭାବେ ମୋରମ ଉତ୍ତୋଳନ ଖବର ପାଇ ସେମାନେ ସଦଳବଳେ ଚଢ଼ାଉ କରିଥିଲେ। ହେଲେ ସେତେବେଳେ କିଏ ବେଆଇନ ଉତ୍ତୋଳନ କରୁଥିଲେ ତାହା ଜଣା ପଡି ନ ଥିଲା। ଗାଡି ନମ୍ବର ଅନୁସାରେ ବାଲିଚନ୍ଦ୍ରପୁର ଥାନାରେ ଅଭିଯୋଗ କରାଯାଇଛି।
