ବେଙ୍ଗାଲୁରୁ, ୧୮ା୯ (ପି.ଟି.): ପୂର୍ବତନ କୋଚ୍ ଜୋର୍ଡ ମାରିଜନେ ଏବଂ ଏକ ପବ୍ଲିସିଂ ହାଉସ୍ ହାର୍ପର କଲିନ୍ସ ଇଣ୍ଡିଆକୁୁ କୋର୍ଟରେ ହାଜର କରାଇବ ଭାରତର ଉଭୟ ପୁରୁଷ ଓ ମହିଳା ହକି ଦଳ। ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ାବେଳେ ଜଣେ ଯୁବ ଖେଳାଳିଙ୍କୁ ଖରାପ ଖେଳିବା ଲାଗି ମନପ୍ରୀତ ସିଂ ପ୍ରବର୍ତ୍ତାଇଥିଲେ। ଏହା ଦ୍ୱାରା ତାଙ୍କର ଜଣେ ସାଙ୍ଗ ଦଳରେ ସୁଯୋଗ ପାଇପାରିବ। ମାରିଜନେ ଏ ବିଷୟ ତାଙ୍କ ପୁସ୍ତକ ‘ ଓ୍ବିଲ୍ ପାଓ୍ବାର-ଦି ଇନ୍ସାଇଡ ଷ୍ଟୋରୀ ଅଫ୍ ଇନ୍କ୍ରେଡିବଲ ଟର୍ନ ଆରାଉଣ୍ଡ ଇନ୍ ଇଣ୍ଡିଆନ୍ ଓମେନ୍ସ ହକି’ରେ ଉଲ୍ଲେଖ କରିଛନ୍ତି। ଏହାକୁ ନେଇ ଉଭୟ ମହିଳା ଓ ପୁରୁଷ ହକି ଦଳ ତୀବ୍ର ପ୍ରତିକ୍ରିୟା ପ୍ରକାଶ କରିବା ସହ ଆଇନଗତ ପଦକ୍ଷେପ ନେବାକୁ ସ୍ଥିର କରିଛନ୍ତି। ଏକ ମିଳିତ ବିବୃତ୍ତିରେ ମାରିିଜନେ ତାଙ୍କ ପୁସ୍ତକର ପ୍ରଚାର ପାଇଁ ଏହି ମାଧ୍ୟମ ଆପଣେଇଥିବା କହିଛନ୍ତି। ଜଣେ କୋଚ ହିସାବରେ ଖେଳାଳିମାନଙ୍କ ପ୍ରତି ଯନତ୍ଶୀଳ ହେବା ପରିବର୍ତ୍ତେ ସେ ଆମର ବ୍ୟକ୍ତିଗତ ତଥ୍ୟର ଅପବ୍ୟବହାର କରିବା ସହ ମିଥ୍ୟା ଅଭିଯୋଗମାନ ଆଣଛନ୍ତି। ସେ ତାଙ୍କ ପୁସ୍ତକର ବିକ୍ରି ବୃଦ୍ଧି କରିବା ଅଭିପ୍ରାୟରେ ଏପରି କରିଛନ୍ତି। ଉଭୟ ଦଳ ଆହୁରି କହିଛନ୍ତି ଯେ ଯଦି ଏଭଳି ଘଟଣା ଘଟିଥିଲା, ମାରଜନେ ହକି ଇଣ୍ଡିଆ କିମ୍ବା ତାଙ୍କ ନିଯୁକ୍ତିଦାତା ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ)ର ଦୃଷ୍ଟି ଆକର୍ଷଣ କରିପାରିଥାନ୍ତେ। ସୂଚନାଯୋଗ୍ୟ ମାରିଜନେ ୯ ମାସ ପାଇଁ ପୁରୁଷ ହକି ଦଳର କୋଚ୍ ଦାୟିତ୍ୱରେ ଥିଲେ। ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ାରେ ଦଳର ନୈରାଶ୍ୟଜନକ ପ୍ରଦର୍ଶନ ପରେ ସେ ତାଙ୍କ ପଦବୀରୁ ବହିଷ୍କୃତ ହୋଇଥିଲେ। ପରେ ତାଙ୍କୁ ମହିଳା ହକି ଦଳର ଦାୟିତ୍ୱ ମିଳିଥିଲା। ତାଙ୍କ ତତ୍ତ୍ୱାବଧାନରେ ମହିଳା ଦଳ ଗତ ବର୍ଷ ଐତିହାସିକ ୪ର୍ଥ ସ୍ଥାନ ଅଧିକାର କରିଥିଲା।
