ଦିଗପହଣ୍ଡି,୩।୪(ଡି.ଏନ୍.ଏ.): ବିଧାନସଭା ପରିସରରେ ବାଚସ୍ପତିଙ୍କୁ ଚପଲ ଫିଙ୍ଗିବା ଘଟଣା ଓଡ଼ିଶା ବିଧାନସଭା ଇତିହାସରେ ପ୍ରଥମ ଘଟଣା। ଗଞ୍ଜାମ ଜିଲା ଦିଗପହଣ୍ଡି ବିଧାନସଭା ନିର୍ବାଚନ ମଣ୍ଡଳୀର ବିଧାୟକ ତଥା ଓଡ଼ିଶା ବିଧାନସଭାର ମାନ୍ୟବର ବାଚସ୍ପତି ଡ. ସୂର୍ଯ୍ୟନାରାୟଣ ପାତ୍ରଙ୍କ ବିଧାନସଭା ପୋଡିୟମ ଉପରକୁ ଜାଣି ଶୁଣି ସମ୍ବଲପୁର ବିଧାୟକ ଜୟନାରାୟଣ ମିଶ୍ର ଏବଂ ବିରୋଧୀଦଳ ଉପନେତା ବିଷ୍ଣୁ ସେଠୀ ଚପଲ, ଡଷ୍ଟବିନ, ମାଇକ୍ରୋଫୋନ, ପେନ ଷ୍ଟାଣ୍ଡ ଆଦି ଫିଙ୍ଗିବା ଘଟଣାକୁ ଦିଗପହଣ୍ଡି ବିକାଶ ପରିଷଦ ସଭାପତି ଅଶେଷ ନାଥ ମିଶ୍ର ତୀବ୍ର ନିନ୍ଦା କରିଛନ୍ତି। ଭାଜପା ପକ୍ଷରୁ ଏଭଳି ଅଶୋଭନୀୟ ଆଚରଣ ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ କରାଯାଇଛି। ଏହା ଗଣତନ୍ତ୍ରର ମନ୍ଦିର କୁହାଯାଉଥିବା ବିଧାନସଭାକୁ ସିଧାସଳଖ ଅସମ୍ମାନ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି। ଜାତୀୟସ୍ତରରେ ଓଡ଼ିଶା ବିଧାନସଭାର ଗାରିମାକୁ ସମ୍ପୂର୍ଣ୍ଣ ନଷ୍ଟ କରିବା ପାଇଁ ହୀନ ଉଦ୍ୟମ କରିଥିବା ବିଧାୟକ ଦ୍ୱୟଙ୍କୁ ଅବିଳମ୍ବେ ଗିରଫ କରାଯିବା ସହ ଉଭୟଙ୍କୁ ୧ ବର୍ଷ ଯାଏ ବିଧାନସଭା କାର୍ଯ୍ୟରୁ ନିଲମ୍ବିତ କରାଯିବା ପାଇଁ ସେ ଦାବି କରିଛନ୍ତି। ଜଣେ ଦାୟିତ୍ୱ ସମ୍ପନ୍ନ ବିଧାୟକ ଭାବେ ସମ୍ବିଧାନ ସମ୍ପର୍କରେ ଜ୍ଞାନ ଆହରଣ କରି ନ ଥିବାରୁ ଏଭଳି ଅଭାବନୀୟ ଘଟଣା ଘଟିଛି। ଗଣତାନ୍ତ୍ରିକ ରାଷ୍ଟ୍ରରେ ଏଭଳି ଘଟଣା ବାଚସ୍ପତିଙ୍କ ପଦମର୍ଯ୍ୟାଦା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ତେଣୁ ବିଧାନସଭା ପରିଚାଳନା ପାଇଁ ରହିଥିବା ଆଇନ ଅନୁସାରେ ତୁରନ୍ତ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିମନ୍ତେ ଦିଗପହଣ୍ଡି ବିକାଶ ପରିଷଦ ପକ୍ଷରୁ ଦାବି କରାଯାଇଛି। ଏଭଳି ଘଟଣାର ନିରପେକ୍ଷ ତଦନ୍ତ କରାଯାଇ ଦୋଷୀ ବିଧାୟକ ଦ୍ୱୟଙ୍କ ପଦବୀକୁ ତୁରନ୍ତ ରଦ୍ଦ କରିବା ସହ ପିପୁଲ୍ସ ରିପ୍ରେଜେଣ୍ଟେସନ ଆକ୍ଟ ଅନୁଯାୟୀ ଆଗାମୀ ଦିନରେ ସେମାନଙ୍କୁ ନିର୍ବାଚନ ଲଢ଼ିବା ପାଇଁ କୌଣସି ପ୍ରକାର ଅନୁମତି ପ୍ରଦାନ ନ କରିବାକୁ ରାଜ୍ୟ ନିର୍ବାଚନ କମିଶନଙ୍କ ଅଦାଲତରେ ମାମଲା ରୁଜୁ କରାଯିବା ପାଇଁ ଦିଗପହଣ୍ଡି ବିକାଶ ପରିଷଦର ସଭାପତି ଅଶେଷ ନାଥ ମିଶ୍ର ଟୁଇଟର ଯୋଗେ ମାନ୍ୟବର ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିବା କହିଛନ୍ତି।
