ଭୁବନେଶ୍ୱର, ୫।୯(ବ୍ୟୁରୋ):କଟକ ଜିଲା ବାଙ୍କୀ ସବ୍ଡିଭିଜନ ଅନ୍ତର୍ଗତ ଡମପଡ଼ା ଅଭୟାରଣ୍ୟ ଭିତରେ ଜଣେ ବୃଦ୍ଧକୁ ଅଜଗର ଗିଳିଥିବା ନେଇ ୫ଦିନ ହେବ ଚର୍ଚ୍ଚା ଚାଲିଛି। ହେଲେ ଏଯାଏ ଅଜଗରଟିକୁ ଧରି ଏକ୍ସ-ରେ କରାଗଲା ନାହିଁ, କି ପେଟରେ କ’ଣ ରହିଛି, ତାହା ସ୍ପଷ୍ଟ ହେଲା ନାହିଁ। ସେପଟେ ସାନମୁଣ୍ଡଳୀ ଗ୍ରାମର ନନ୍ଦ କିଶୋର ବେହେରା ନିଖୋଜ ହେବାର ୮ ଦିନ ବିତିଛି। ଗତ ୨୮ତାରିଖରୁ ସେ ଘରୁ ବାହାରିଥିବାବେଳେ ତାଙ୍କର ଏଯାଏ ପତ୍ତା ମିଳୁନାହିଁ। ଫଳରେ ତାଙ୍କୁ ଅଜଗର ଗିଳିଥିବା ଚର୍ଚ୍ଚା କେବଳ ଚର୍ଚ୍ଚାରେ ହିଁ ରହିଯାଇଛି।
ଗତ ୨୯ ତାରିଖରେ ବେଙ୍ଗପାଣି ଘାଟି ରାସ୍ତାଠାରୁ ୧୫ଫୁଟ ତଳେ ନନ୍ଦ କିଶୋରଙ୍କ ଗାଡ଼ି ଓ କିଛି ସାମଗ୍ରୀ ମିଳିଥିଲା। ତାଙ୍କର ଦୁର୍ଘଟଣା ହୋଇଥିବା ସ୍ପଷ୍ଟ ହୋଇଥିଲା। କିନ୍ତୁ ଏହି ଦୁର୍ଘଟଣା ପରେ ନନ୍ଦ କିଶୋର କୁଆଡେ ଗଲେ ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଗ୍ରାମବାସୀ ତାଙ୍କୁ ଜଙ୍ଗଲ ଭିତରେ ଖୋଜାଖୋଜି କରିବାବେଳେ ଏକ ଅଜଗର ମଣିଷ ଭଳି କିଛି ବଡ଼ ଜୀବ ଗିଳିଥିବା ଦେଖିଥିଲେ। ନିଖୋଜ ନନ୍ଦକିଶୋରଙ୍କୁ ଉକ୍ତ ଅଜଗର ଗିଳିଥିବା ଭାବି ବନ ବିଭାଗକୁ ଖବର ଦେଇଥିଲେ। ଏହାପରେ ବନ ବିଭାଗର କେତେଜଣ କର୍ମଚାରୀ ସେଠାକୁ ଯାଇ ଅଜଗରକୁ ଦେଖିବା ପରେ ମଣିଷ ଗିଳି ନ ଥିବା କହିଥିଲେ। ସେମାନଙ୍କର ଯୁକ୍ତି ଥିଲା, କାରଣ ସାପଟି ଯେଉଁ ସ୍ଥାନରେ ଥିଲା, ଗାଡ଼ି ପଡ଼ିଥିବା ସ୍ଥାନଠାରୁ ତାହାର ଦୂରତା ପ୍ରାୟ ୨କିମି ରହିଥିଲା। ତାହା ପୁଣି ଗୋଟିଏ ପାହାଡ଼ ତଳକୁ ଯାଇ ଅନ୍ୟଏକ ପାହାଡ଼ ଚଢ଼ିବାକୁ ପଡ଼ିବ। ତେଣୁ ସାପଟି ମଣିଷ ଗିଳିଥିଲେ ଏତେବାଟ ଯିବା ସମ୍ଭବ ନୁହେଁ ବୋଲି ବନ କର୍ମଚାରୀ ଓ ବନ୍ୟପ୍ରାଣୀ ବିଶେଷଜ୍ଞମାନେ କହିଥିଲେ। କିନ୍ତୁ ଗ୍ରାମବାସୀ ସାପଟିର ଏକ୍ସ-ରେ କରିବାକୁ ଦାବି କରିଥିଲେ ମଧ୍ୟ ବନ ବିଭାଗ ଏହାକୁ ଗୁରୁତ୍ୱ ଦେଉ ନାହିଁ। ତେବେ ନିଖୋଜ ନନ୍ଦକିଶୋର କୁଆଡ଼େ ଗଲେ, ତାହାକୁ ନେଇ ସନ୍ଦେହ ବଢ଼ିବାରେ ଲାଗିଛି। ସେପଟେ ପୋଲିସ ମାମଲା ରୁଜୁ କରି ଚୁପ୍ ବସିଛି। ନନ୍ଦକିଶୋର ନିଖୋଜ ହେବାର ୮ଦିନ ବିତିଯାଇଥିଲେ ମଧ୍ୟ କୌଣସି ପତ୍ତା ନ ମିଳିବାରୁ ତାଙ୍କ ପରିବାର ଲୋକେ ଚିନ୍ତାରେ ଭାଙ୍ଗି ପଡିଛନ୍ତି। ତାଙ୍କ ସ୍ତ୍ରୀଙ୍କ ସ୍ବାସ୍ଥ୍ୟାବସ୍ଥା ମଧ୍ୟ ଦିନକୁ ଦିନ ଖରାପ ହେବାକୁ ଲାଗିଛି। ତେଣୁ ଅଜଗର ପେଟରେ କ’ଣ ଅଛି ତାହା ଜାଣିବା ପାଇଁ ତା’ର ଏକ୍ସ-ରେ କରି ତାଙ୍କ ସନ୍ଦେହ ଦୂର କରିବା ପାଇଁ ଗ୍ରାମବାସୀ ଦାବି କରିଛନ୍ତି।
ଏପଟେ ସ୍ନେକ ହେଲ୍ପଲାଇନ ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ କହିଛନ୍ତି, ଅଜଗର ପେଟ ଭିତରେ ଥିବା ଜନ୍ତୁର ଲମ୍ବ ୩ ଫୁଟରୁ କମ୍। ଅଜଗରଟି ନିଶ୍ଚିତ ଭାବେ ୩ଫୁଟ୍ରୁ ଛୋଟ ଏକ ପ୍ରାଣୀ ଖାଇଛି। ତାହା ଏକ କୁଟୁରା, ଛେଳି, ହରିଣ କିମ୍ବା ବାର୍ହା ମଧ୍ୟ ହୋଇପାରେ। ତେଣୁ ପୋଲିସ ଅନ୍ୟାନ୍ୟ ଆପରାଧିକ ଦିଗକୁ ଶୀଘ୍ର ତଦନ୍ତ କରିବା ଆବଶ୍ୟକ ବୋଲି ଶୁଭେନ୍ଦୁ କହିଛନ୍ତି।
