କେନ୍ଦୁଝର,୧୮ା୨(ସ୍ବ.ପ୍ର.): ସାମାଜିକ ଅନ୍ଧ ବିଶ୍ୱାସ ଓ ପରମ୍ପରାକୁ ନେଇ ଆଦିବାସୀ ସମାଜ ବଞ୍ଚିଥିବା ବେଳେ ଅନେକ ସମୟରେ ଆଜିକାର ଆଧୁନିକ ଯୁଗରେ ଏହା ସେମାନଙ୍କ ପାଇଁ ବିପଦ ସୃଷ୍ଟି କରିଥାଏ। ଏଭଳି ଏକ ଘଟଣାରେ ପରିବାର ନିୟୋଜନ ଅସ୍ତ୍ରୋପଚାର କରିବାରୁ ଜଣେ ୧୧ ଛୁଆର ଜନନୀକୁ ତାଙ୍କ ସ୍ବାମୀ ଘରେ ପୂରାଉ ନ ଥିବାରୁ ୩ ଦିନ ହେଲା ମାସକର ଛୁଆ ଧରି ଘର ବାହାରେ ଥିବା ଆମ୍ବଗଛ ମୂଳରେ ଭୋକଉପାସରେ ଆଶ୍ରୟ ନେବା ଘଟଣା ଚର୍ଚ୍ଚାର ବିଷୟ ହୋଇଛି। ଘଟଣାର ସମାଧାନ କରିବା ପରିବର୍ତ୍ତେ ଶନିବାର ଏହି ମହିଳାଙ୍କୁ ନବଜାତ ଶିଶୁପୁତ୍ରଙ୍କ ଚିକିତ୍ସା ପାଇଁ ତେଲକୋଇ ଡାକ୍ତରଖାନା ନିଆଯାଇଥିବା ଜଣାପଡ଼ିଛି। ତେଲକୋଇ ବ୍ଲକ ସଲେଇକେନା ପଞ୍ଚାୟତ ଡିମିରିଆ ଗ୍ରାମରେ ଏଭଳି ଘଟଣା ଘଟିଛି।
ପ୍ରକାଶ ଯେ, ୧୨ ବର୍ଷ ତଳେ ରବି ଦେହୁରୀଙ୍କ ବିବାହ ଜାନକୀ ଦେହୁରୀ ସହିତ ହୋଇଥିଲା। ତାଙ୍କର ୧୦ ସନ୍ତାନ ପରେ ଗତ ଜାନୁୟାରୀ ୧୯ରେ ଜାନକୀ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ। ପୂର୍ବରୁ ଏକ କନ୍ୟା ସନ୍ତାନଙ୍କ ମୃତ୍ୟୁ ହୋଇଥିଲା। ଆଗରୁ ବହୁବାର ଡାକ୍ତରୀ ପରାମର୍ଶ ସତ୍ତ୍ୱେ ଅସ୍ତ୍ରୋପଚାର କରି ନ ଥିଲେ। ତେବେ କଷ୍ଟ ଯନ୍ତ୍ରଣା ଭୋଗୁ ଥିବାରୁ ଡାକ୍ତର କର୍ମଚାରୀଙ୍କ ପରାମର୍ଶ କ୍ରମେ ପରିବାର ନିୟୋଜନ ଅସ୍ତ୍ରୋପଚାର ପାଇଁ ରାଜି ହୋଇଥିଲେ। ଗତ ୧୪ ତାରିଖରେ ଅସ୍ତ୍ରୋପଚାର ପରେ ତାଙ୍କ ସ୍ବାମୀ ଘରେ ପୂରାଇ ଦେଇ ନ ଥିଲେ। ଗାଳିଗୁଲଜ ଓ ମାରଧର କରି ବାହାର କରିଦେବାରୁ ବାହାରେ ଗଛ ମୂଳରେ ଆଶ୍ରୟ ନେଇଥିଲେ ବୋଲି ତାଙ୍କ ସ୍ତ୍ରୀ ଜାନକୀ କହିଛନ୍ତି। ଭୂୟାଁ ସମ୍ପ୍ରଦାୟରେ ଅସ୍ତ୍ରୋପଚାର ପରେ ସ୍ତ୍ରୀମାନେ ପୂର୍ବପୁରୁଷଙ୍କ ପିଣ୍ଡରେ ପାଣି ଦେବା, ପୂଜା କରିବା ଆଦିରୁ ବଞ୍ଚିତ ହେବା ପରମ୍ପରା ରହିଛି। ଏଣୁ ତାଙ୍କୁ ନ ପଚାରି କାହିଁକି ଏଭଳି ଅପରେଶନ କରାଯାଇଛି ବୋଲି ତାଙ୍କ ସ୍ବାମୀ ରବି ଦେହୁରୀ କହିଛନ୍ତି। ପୂର୍ବରୁ ପ୍ରତ୍ୟେକ ବର୍ଷ ଗୋଟିଏ ଲେଖାଏ ସନ୍ତାନ ଜନ୍ମ କରି ଅତି ଦୁର୍ବଳ ହୋଇ କଷ୍ଟ ପାଉଥିଲେ। ସେ ଏବଂ ସାହି ଭାଇ ବୁଝାଇଲେ ବି ରବି ବୁଝୁନାହାନ୍ତି। ବୁଝାଇବାକୁ ଗଲେ ଧନୁତୀର ଧରି ମାରି ଗୋଡ଼ାଉଛନ୍ତି ବୋଲି ଆଶା ଦିଦି ବିଜୟଲକ୍ଷ୍ମୀ ବିଶ୍ୱାଳ କହିଛନ୍ତି। ଏନେଇ ଉପଜିଲାପାଳ କେନ୍ଦୁଝର ରାମଚନ୍ଦ୍ର କିସ୍କୁ କହିଛନ୍ତି, ବିଡିଓ ଏବଂ ତହସିଲଦାରଙ୍କୁ ରିପୋର୍ଟ ଦେବାକୁ କହିଛନ୍ତି। ଆସିବା ପରେ ତାଙ୍କ ସ୍ବାମୀ ତଥା ଗ୍ରାମବାସୀଙ୍କ ସହିତ ଆଲୋଚନା କରି ଥଇଥାନ ବ୍ୟବସ୍ଥା କରାଯିବ। ଅନ୍ୟପକ୍ଷରେ ବରିଷ୍ଠ ସ୍ତ୍ରୀ ଓ ପ୍ରସୂତି ବିଶେଷଜ୍ଞ ଡାକ୍ତର ମମତା ରାଣୀ ଜେନା କହିଛନ୍ତି, ପରିବାର କଲ୍ୟାଣ ଅପରେଶନ ସହିତ ପରମ୍ପରାର କୌଣସି ସମ୍ପର୍କ ନାହିଁ। କେତେକ ଆଦିବାସୀ ତଥା ଲଘୁ ସମ୍ପ୍ରଦାୟର ମହିଳା ଏଭଳି ବିଶ୍ୱାସ କରି ଅପରେଶନ ହେବାକୁ ଆଗ୍ରହ କରନ୍ତି ନାହିଁ। ଏଣୁ ଏନେଇ ଅଧିକ ସଚେତନ ସୃଷ୍ଟି କରିବା ସହ ବୁଝାଶୁଝା କରିବା ଜରୁରୀ। ଅପରେଶନ ହେଲେ ଅବାଧ ଗର୍ଭ ଧାରଣ ରୋକଯାଇପାରିବ ଏବଂ ମାଆର ସ୍ବାସ୍ଥ୍ୟ ଅବସ୍ଥା ଭଲ ରହିବ। ପରିବାରର ଆର୍ଥିକ ଓ ସାମାଜିକ ସ୍ଥିତିରେ ଉନ୍ନତି ହୋଇପାରିବ। ଅନେକ ସମୟରେ ଅଧିକ ଗର୍ଭବତୀ ହେଲେ ମା’ ପାଇଁ ବିପଦ ସୃଷ୍ଟି କରିବ ଓ ମୃତ୍ୟୁମୁଖରେ ପଡ଼ିବେ ବୋଲି ଡାକ୍ତର କହିଛନ୍ତି।
