ଭୁବନେଶ୍ୱର,(ବ୍ୟୁରୋ)/କେନ୍ଦୁଝର,୮ା୧୨(ସ୍ବ.ପ୍ର.): କେନ୍ଦୁଝର ଜିଲା ୪୯ ନଂ. ଜାତୀୟ ରାଜପଥ ଦେଇ ପ୍ରତିଦିନ ପଶ୍ଚିମବଙ୍ଗକୁ ବେଆଇନ ଭାବେ ଗୋଚାଲାଣ କରାଯାଉଛି। ମଙ୍ଗଳବାର ବିଳମ୍ବିତ ରାତିରେ ଏସ୍ଟିଏଫ୍ ଟିମ୍ ସ୍ଥାନୀୟ ପୋଲିସ ସହାୟତାରେ ଚଢ଼ାଉବେଳେ ଗୋରୁ ଚାଲାଣକାରୀମାନେ ଗୁଳିମାଡ଼ କରିଛନ୍ତି। ୭ ରାଉଣ୍ଡ ଗୁଳିଚାଳନା ହୋଇଥିଲେ ମଧ୍ୟ ଏସ୍ଟିଏଫ୍ ଓ ପୋଲିସର କୌଣସି କର୍ମଚାରୀ ଆହତ ହୋଇନାହାନ୍ତି। ତେବେ ଅନ୍ଧାର ଯୋଗୁ ଗୋଚାଲାଣକାରୀମାନେ ଏସ୍କର୍ଟ କରି ୩ ଗୋରୁବୋଝେଇ କଣ୍ଟେନର ନେଇ ପଶ୍ଚିମବଙ୍ଗ ପଳାଇଛନ୍ତି। ଏସ୍ଟିଏଫ୍ ଘଟଣାସ୍ଥଳରୁ ୨ ଗୋରୁବୋଝେଇ କଣ୍ଟେନର ଜବତ କରିବା ସହ ବୁଧବାର ୨ ଡ୍ରାଇଭରଙ୍କୁ ଗିରଫ କରିଛି। ଅଭିଯୁକ୍ତଦ୍ୱୟ ହେଲେ ପଶ୍ଚିମବଙ୍ଗ ପୂର୍ବମେଦିନାପୁର ଜିଲା ଦକ୍ଷିଣଛକ ଅଞ୍ଚଳର ଏସ୍କେ ରସିଦ ଓ ହାୱଡା ଜିଲା ଉଲୁବେରିଆ ଅଞ୍ଚଳର ଏସ୍କେ ରେଜାବୁଲ। ଏସ୍ଟିଏଫ୍ ରିପୋର୍ଟ ଆଧାରରେ କେନ୍ଦୁଝର ଟାଉନ ଥାନା ପୋଲିସ ଏକ ମାମଲା (ନଂ.୪୯୮/୨୦୨୨) ରୁଜୁ କରି ଅଧିକ ତଦନ୍ତ ଜାରି ରଖିଛି। ଅନ୍ୟପଟେ ଉଭୟ କଣ୍ଟେନରରୁ ଉଦ୍ଧାର ୭୪ ଗୋରୁଙ୍କୁ ବଡ଼ବିଲସ୍ଥିତ ଗୋଶାଳାକୁ ପଠାଯାଇଛି। ଟାଉନ ଥାନାଧିକାରିଣୀ ପ୍ରମୋଦିନୀ ସାହୁ କହିଛନ୍ତି, ୨ ଗିରଫ ଅଭିଯୁକ୍ତଙ୍କୁ ପଚରାଉଚରା କରାଯାଉଛି। ଗୁରୁବାର ଉଭୟଙ୍କୁ କୋର୍ଟଚାଲାଣ କରାଯିବ। ମାମଲାରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଧରିବାକୁ ଉଦ୍ୟମ କରାଯାଉଥିବା ସେ କହିଛନ୍ତି। ଅନ୍ୟପଟେ ଏସ୍ଟିଏଫ୍ ମଧ୍ୟ ଘଟଣାକୁ ଗୁରୁତ୍ୱର ସହ ନେଇ ତଦନ୍ତ ଜାରି ରଖିଛି।
ସୂଚନା ଅନୁଯାୟୀ, ୪୯ ନଂ. ଜାତୀୟ ରାଜପଥର ଜୁରିଆଘାଟି ଦେଇ ମଙ୍ଗଳବାର ରାତିରେ ପଶ୍ଚିମବଙ୍ଗକୁ ଗୋଚାଲାଣ ହେଉଥିବା ଏସ୍ଟିଏଫ୍ ସୂଚନା ପାଇଥିଲା। ଏନେଇ ସ୍ଥାନୀୟ ପୋଲିସକୁ ସୂଚନା ଦିଆଯିବା ସହ ଏସ୍ଟିଏଫ୍ର ୧୫ ଜଣିଆ ଟିମ୍ ଘଟଣାସ୍ଥଳକୁ ଯାଇ ପ୍ରସ୍ତୁତ ହୋଇ ରହିଥିଲା। ୫ ଗୋରୁବୋଝଇ କଣ୍ଟେନର ସମ୍ବଲପୁର ଆଡୁ ତେଲକୋଇ, କାଞ୍ଜିପାଣି, ସଦର, ଟାଉନ, ତୁରୁମୁଙ୍ଗ ଆଦି ଥାନା ଅଞ୍ଚଳ ଦେଇ ମୟୂରଭଞ୍ଜ ଜିଲା ଆସୁଥିଲା। ୨ ବୋଲେରୋରେ ୧୦ରୁ ଅଧିକ ଅଭିଯୁକ୍ତ କଣ୍ଟେନରଗୁଡ଼ିକୁ ଏସ୍କର୍ଟ ଯୋଗାଉଥିଲେ। ମିଳିତ ଟିମ୍ ଜୁରିଆଘାଟି ନିକଟରୁ କଣ୍ଟେନରକୁ ପିଛା କରିଥିଲା। ସ୍ଥାନୀୟ କିଛି ସଂଗଠନ ମଧ୍ୟ ଏସ୍ଟିଏଫ୍ ଟିମ୍କୁ ସହଯୋଗ କରିଥିଲା। ଏହି ସମୟରେ ଅନ୍ଧାରର ସୁଯୋଗ ନେଇ ଅଭିଯୁକ୍ତମାନେ ୭ରୁ ଅଧିକ ରାଉଣ୍ଡ୍ ଗୁଳିଚାଳନା କରିଥିଲେ। ଏଥିସହ ଖିରେଇଟାଙ୍ଗିରି ଟୋଲ ଗେଟ୍ ଭାଙ୍ଗି ୩ କଣ୍ଟେନର ନେଇ ଫେରାର ହେବାରେ ସକ୍ଷମ ହୋଇଥିଲେ। ତେବେ ସମସ୍ତ ଗୋରୁ ବରଗଡ଼ ସୋହେଲା ଅଞ୍ଚଳରୁ ଅଣାଯାଇଥିବା ଅଭିଯୋଗ ହେଉଛି। ଅନ୍ୟପକ୍ଷରେ ଗୋଚାଲାଣକାରୀଙ୍କୁ ମୟୂରଭଞ୍ଜର ଜଣେ ନିଶାବେପାରୀ ଟଙ୍କା ନେଇ ଏସ୍କର୍ଟ ଯୋଗାଉଥିବା ସୂଚନା ମିଳିଛି।
