ଲଣ୍ଡନ,୧୧।୫:ପ୍ରାୟ ଏକ ମାସ ଧରି ଚାଲିଆସୁଥିବା ଇଣ୍ଡିଆନ ପ୍ରିମିୟର ଲିଗ କରୋନା ଯୋଗୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି। ଫଳରେ ଭାରତରେ କ୍ରିକେଟ ବୋର୍ଡ ଅଫ କଣ୍ଟ୍ରୋଲ ବିଦେଶୀ ଖେଳାଳିଙ୍କୁ ଘରକୁ ଫେରିବା ପାଇଁ ବ୍ୟବସ୍ଥା କରିଥିଲା। ସମସ୍ତ ବିଦେଶୀ ଖେଳାଳି, କୋଚିଂ ଷ୍ଟାଫ ଏବଂ ଭାଷ୍ୟକାରମାନେ ନିରାପଦରେ ନିଜ ଦେଶକୁ ଯାଇଥିଲେ। ଏଭଳି ପରିସ୍ଥିତିରେ ଇଂଲଣ୍ଡର ପୂର୍ବତନ ଅଧିନାୟକ ତଥା ଭାଷ୍ୟକାର କେଭିନ ପିଟରସେନ ଘରେ ପହଞ୍ଚିବା ପରେ ଭାରତ ପାଇଁ ଚିନ୍ତାରେ ଅଛନ୍ତି। ଆଇପିଏଲ୍ରେ ଭାଷ୍ୟକାର ଦାୟିତ୍ୱ ତୁଲାଉଥିବା କେଭିନ ପିଟରସେନ ଭାରତ ଛାଡି ଅତ୍ୟନ୍ତ ଭାବପ୍ରବଣ ହୋଇଯାଇଛନ୍ତି। ସେ ହିନ୍ଦୀରେ ଟୁଇଟ୍ କରି କହିଛନ୍ତି ଯେ, ମୁଁ ଭାରତ ଛାଡିଛି ସତ ମାତ୍ର ମୁଁ ଏବେ ବି ଏହି ଦେଶ କଥା ଚିନ୍ତା କରୁଛି। କାରଣ ଏହି ଦେଶ ମୋତେ ବହୁତ ଭଲ ପାଇବା ଏବଂ ସ୍ନେହ ଦେଇଛି। ଦୟାକରି ଲୋକେ ସୁରକ୍ଷିତ ରୁହନ୍ତୁ। ଭାରତ ଏବେ ଏକ କଷ୍ଟଦାୟକ ସମୟ ଦେଇ ଗତି କରୁଛି ଏବଂ ଏହି ସମୟ ବିତିଯିବ। କିନ୍ତୁ ସାବଧାନ ରହିବାକୁ ପଡିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, କେଭିନ ପିଟରସେନ ଚାହୁଁଛନ୍ତି ଯେ ଇଣ୍ଡିଆନ ପ୍ରିମିୟର ଲିଗର ଚଳିତ ବର୍ଷର ସ୍ଥଗିତ ମ୍ୟାଚ ସେପ୍ଟେମ୍ବରରେ ୟୁଏଇ ବଦଳରେ ଇଂଲଣ୍ଡରେ ଅନୁଷ୍ଠିତ ହେଉ। ପିଟରସେନ ଆଶା କରିଛନ୍ତି ଯେ, ଆଇପିଏଲକୁ ବ୍ରିଟେନକୁ ସ୍ଥାନାନ୍ତର କରିବାର ନିଷ୍ପତ୍ତି ସର୍ବୋତ୍ତମ ହେବ, କାରଣ ଭାରତୀୟ ଦଳର ଇଂଲଣ୍ଡ ଗସ୍ତରେ ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ସେପ୍ଟେମ୍ବର ୧୪ ରେ ଶେଷ ହେବ ଏବଂ ଏହା ପରେ ସମୟ ଧାର୍ଯ୍ୟ ହେବ।
