କୁନ୍ଦୁରା,୧୨ା୧୨(ଡି.ଏନ.ଏ.): ଚଳିତ ଖରିଫ ଋତୁ ପାଇଁ ଯେତେ ବିଳମ୍ବରେ ଧାନ ମଣ୍ଡିର ଶୁଭାରମ୍ଭ ହେବ ସେତିକି ଅଧିକ କ୍ଷୁଦ୍ର ଓ ମଧ୍ୟମବର୍ଗର ଚାଷୀ ଦଲାଲଙ୍କ ନିକଟରେ ଧାନ ବିକି ଅଭାବୀ ବିକ୍ରିର ଶିକାର ହେବେ ବୋଲି କୃଷକ କଲ୍ୟାଣ ମଞ୍ଚ ସମ୍ପାଦକ ନରେନ୍ଦ୍ର ପ୍ରଧାନ ଅଭିଯୋଗ କରିଛନ୍ତି। ଏଥିପାଇଁ ସେ ଯୋଗାଣ ବିଭାଗ ଏବଂ ନିୟନ୍ତ୍ରିତ ବଜାର କମିଟି ଅଧିକାରୀଙ୍କୁ ଦାୟୀ କରିଛନ୍ତି। ପ୍ରଶାସନ ପକ୍ଷରୁ ଚଳିତ ମାସ ୧୬ରେ ରାଜ୍ୟସ୍ତରୀୟ ଲୋକ ମହୋତ୍ସବ ପରବ ହେଉଥିବା ବେଳେ ୧୫ରେ ମଣ୍ଡି ଶୁଭାରମ୍ଭ ନେଇ ତାରିଖ ଘୋଷଣା କରାଯାଇଥିଲା। ଆଦିବାସୀ ପରମ୍ପରା ଓ ସଂସ୍କୃତିକୁ ନେଇ ପରବ ଆୟୋଜିତ ହେଉଥିବା ବେଳେ ଚାଷୀଙ୍କ ଭାବାବେଗକୁ ପ୍ରଶାସନ କୁଠାରାଘାତ କରୁଛି ବୋଲି ସେ ପ୍ରକାଶ କରିଛନ୍ତି। ଏବେ ଖୋଲା ଆକାଶ ତଳେ ବିକ୍ରି ପାଇଁ ଚାଷୀଙ୍କ ଧାନ ପଡିରହିଛି। ଏହାକୁ ଶୀତ କାକରରେ ଚାଷୀ ଜଗି ରହିଛନ୍ତି। ଗତ ଦିନରେ ଚାଷୀ ଅମଳ କରିଥିବା ଖରିଫ ଧାନକୁ ବିହନ ନିଗମ ସ୍ବୀକୃତି ପ୍ରଦାନ କରି ଚାଷୀ ଠାରୁ କ୍ରୟ କରିଥିବା ବେଳେ ମିଲର୍ସ ସେହି ଧାନକୁ ଖରାପ ଦର୍ଶାଇ ଚାଷୀଙ୍କଠାରୁ କୁଇଣ୍ଟାଲ ପିଛା ୮/୯ କେଜି ଧାନ କାଟି ଦେଉଥିଲେ। ସ୍ଥାୟୀ ମଣ୍ଡିସ୍ଥଳ ନ ଥିବାରୁ ଅସ୍ଥାୟୀ ମଣ୍ଡିରେ ଧାନ ଗଦେଇ ଚାଷୀ ଏବେ ବର୍ଷା ନେଇ ଚିନ୍ତାରେ ପଡିଛି। ସରକାରୀ ବ୍ୟବସ୍ଥା ଅନୁଯାୟୀ ପ୍ରତି କୁଇଣ୍ଟାଲ ପିଛା ୧୨ ଟଙ୍କା ବୋଝେଇ, ଗଦେଇ, ସିଲେଇ ଖର୍ଚ୍ଚ ଚାଷୀଙ୍କୁ ମଣ୍ଡି ଆରମ୍ଭ ଦିନଠାରୁ ମିଳିନାହିଁ। କୋରାପୁଟ ଜିଲାର ଚାଷୀଙ୍କୁ କିଛି ବର୍ଷ ହେବ ପ୍ରଶାସନ ବିଭିନ୍ନ ଆଳ ଦେଖାଇ ମିଲର୍ସଙ୍କୁ ଢାଲ କରି ଶୋଷଣ କରୁଥିବା ପ୍ରଧାନ ଅଭିଯୋଗ କରିଛନ୍ତି। ପ୍ରଶାସନ ଜାଣିଶୁଣି ମଣ୍ଡି ଆରମ୍ଭରେ ବିଳମ୍ବ କରିବା ସହ ଏଯାଏ ଚାଷୀଙ୍କ ତାଲିକା ମ୍ୟାସେଜ ମାଧ୍ୟମରେ ପଠାଇନାହିଁ। ଫଳରେ ସେମାନେ କମ ଦରରେ ଧାନ ବିକ୍ରି କରିବାକୁ ବାଧ୍ୟ ହେଉଥିବା ମଞ୍ଚ ସମ୍ପାଦକ ପ୍ରଧାନ ଏବଂ ଜିଲା ଭାଜପା ସାଧରଣ ସମ୍ପାଦକ ଚନ୍ଦ୍ର ଶେଖର ରଥ କହିଛନ୍ତି।
