କୋଲକାତା,୧୭ା୨:ପଶ୍ଚିମବଙ୍ଗ ରାଜ୍ୟପାଳ ସି.ଭି. ଆନନ୍ଦ ବୋଷ ନିଜ ବ୍ୟାପାର ବୁଝିବା ପାଇଁ ରାଜଭବନରେ ଏକ ନୂଆ ଟିମ୍ ଗଠନ କରିବେ। ଏ ଦିଗରେ ପ୍ରଥମ ପଦକ୍ଷେପ ସ୍ବରୂପ ରାଜ୍ୟପାଳଙ୍କ ପ୍ରଧାନ ସଚିବ ନନ୍ଦିନୀ ଚକ୍ରବର୍ତ୍ତୀଙ୍କୁ ରାଜଭବନରୁ ପର୍ଯ୍ୟଟନ ବିଭାଗକୁ ବଦଳି କରାଯାଇଛି। ଭାରତୀୟ ପ୍ରଶାସନିକ ସେବା (ଆଇଏଏସ୍) ଅଧିକାରୀ ନନ୍ଦିନୀଙ୍କୁ ଭାଜପା ପକ୍ଷରୁ ବାରମ୍ବାର ଟାର୍ଗେଟ କରାଯାଉଥିଲା। ତେଣୁ ତାଙ୍କ ବଦଳି ପାଇଁ ରାଜଭବନ ପକ୍ଷରୁ ରବିବାର ଅନୁରୋଧ କରାଯାଇଥିଲା। ଶେଷରେ ନନ୍ଦିନୀଙ୍କୁ ରାଜଭବନ ଦାୟିତ୍ୱରୁ ରିଲିଫ୍ କରାଯାଇଛି।
ପଶ୍ଚିମବଙ୍ଗ ଗୃହ ବିଭାଗ ପକ୍ଷରୁ ବୁଧବାର ଜାରି ଏକ ବିବୃତିରେ କୁହାଯାଇଛି ଯେ, ରାଜ୍ୟପାଳ ପଶ୍ଚିମବଙ୍ଗ କ୍ୟାଡର ୧୯୯୪ ବ୍ୟାଚ୍ ଆଇଏଏସ୍ ଅଧିକାରୀ ତଥା ରାଜ୍ୟପାଳଙ୍କ ପ୍ରିନ୍ସିପାଲ ସେକ୍ରେଟାରି ନନ୍ଦିନୀ ଚକ୍ରବର୍ତ୍ତୀଙ୍କୁ ପର୍ଯ୍ୟଟନ ବିଭାଗ ପ୍ରଧାନ ସଚିବ ଭାବେ ନିଯୁକ୍ତ କରିଛନ୍ତି। ନିକଟରେ ସେଣ୍ଟ ଜାଭିଅର୍ସ ୟୁନିଭର୍ସିଟି ଏବଂ ବିଧାନସଭାରେ ରାଜ୍ୟପାଳ ଭାଷଣ ଦେବାବେଳେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ପ୍ରଶଂସା କରିଥିଲେ। ଏହା ପୂର୍ବରୁ ଗତ ଡିସେମ୍ବର ୧୫ରେ କୋଲକାତା ଇଣ୍ଟରନ୍ୟାଶନାଲ ଫିଲ୍ମ ଫେଷ୍ଟିଭାଲରେ ରାଜ୍ୟପାଳ ବୋଷ ମମତାଙ୍କୁ ‘ଏକ କାବି୍ୟକ ରାଜ୍ୟର ସୃଜନଶୀଳ ମୁଖ୍ୟମନ୍ତ୍ରୀ’ ଭାବେ ଅଭିହିତ କରିଥିଲେ। ମମତାଙ୍କ ସହ ରାଜ୍ୟପାଳଙ୍କ ସୌହାର୍ଦ୍ଦ୍ୟପୂର୍ଣ୍ଣ ସମ୍ପର୍କକୁ ନେଇ ଭାଜପା ଚିନ୍ତିତ ହୋଇଯାଇଛି। ନନ୍ଦିନୀ ରାଜଭବନରେ ପଶ୍ଚିମବଙ୍ଗ ସରକାରଙ୍କ ଏଜେଣ୍ଡାକୁ କାର୍ଯ୍ୟକାରୀ କରିବାକୁ ଯାଇ ରାଜ୍ୟପାଳଙ୍କୁ ବିଭିନ୍ନ ପ୍ରସଙ୍ଗରେ ବିଭ୍ରାନ୍ତ କରୁଥିବା ନେଇ ଭାଜପା ଅଭିଯୋଗ ଆଣିବା ସହ ତାଙ୍କୁ ହଟାଇବା ପାଇଁ ଦାବି କରିଆସୁଥିଲା। ରାଜ୍ୟ ଭାଜପା ସଭାପତି ସୁକାନ୍ତ ମଜୁମଦାର ଶନିବାର ରାଜ୍ୟପାଳ ବୋଷଙ୍କୁ ଭେଟି ତାଙ୍କୁ ହଟାଇବାକୁ ଅନୁରୋଧ କରିଥିଲେ। ସ୍ଥିତି ଏପରି ହୋଇଯାଇଥିଲା ଯେ, ରାଜ୍ୟପାଳ ତାଙ୍କୁ ବଦଳି କରିବାକୁ ବାଧ୍ୟ ହୋଇଥିଲେ। ବୋଷ ତାଙ୍କ ପୂର୍ବସୁରୀ ପୂର୍ବତନ ରାଜ୍ୟପାଳ ତଥା ବର୍ତ୍ତମାନର ଉପରାଷ୍ଟ୍ରପତି ଜଗଦୀପ ଧନକରଙ୍କ ପଥ ଅନୁସରଣ କରନ୍ତୁ ବୋଲି ଭାଜପା ଚାହୁଁଥିବା ତୃଣମୂଳ କଂଗ୍ରେସ (ଟିଏମ୍ସି) ଅଭିଯୋଗ ଆଣିଛି।
