ମନ୍ଦିରକୁ ଗଲେ ଚପଲ ବାହାରେ ରଖି ଭିତରକୁ ଯିବାକୁ ହୁଏ। ଆଉ ଭଗବାନଙ୍କୁ ଫୁଲମାଳ, ପ୍ରସାଦ, ଖୀର, ଦହି, ମିଷ୍ଟାନ୍ନ ଆଦି ପ୍ରସାଦ ଚଢାଯାଏ। ହେଲେ ଜାଣି ଆଶ୍ଚର୍ଯ୍ୟ ହେବେ ଏମିତି ଏକ ମନ୍ଦିର ଅଛି, ଯେଉଁଠି ଚପଲ ମାଳ କରି ଠାକୁରଙ୍କୁ ଚଢାଯାଏ। ଏହି ମନ୍ଦିର କର୍ନାଟକ, ଗୁଲବର୍ଗ ଜିଲାରେ ରହିଛି। ଏଠାରେ ଦେବୀ ଲକମ୍ମାଙ୍କୁ ପୂଜା କରାଯାଏ। ଏଠାରେ ଦେବୀଙ୍କୁ ଫୁଲମାଳା, ପ୍ରସାଦ, ଦୁଧ, ଦହି ପ୍ରସାଦ ଚଢାଯାଏ ନାହିଁ। ବରଂ ମନ୍ଦିର ପରିସରରେ ଥିବା ଏକ ଗଛରେ ଭକ୍ତମାନେ ଚପଲର ମାଳା ଟାଙ୍ଗିଥାନ୍ତି। ଚପଲ, ଜୋତା ମାଳା ଚଢାଇବା ପୂଜା ପ୍ରତିବର୍ଷ ଦିପାବଳୀର ଷଷ୍ଠଦିନ ପାଳନ କରାଯାଇଥାଏ। ଏହିଦିନ ଭକ୍ତଙ୍କର ପ୍ରବଳ ଭିଡ ହୋଇଥାଏ। ଦୂରଦୂରାନ୍ତରୁ ଭକ୍ତ ଏହି ପୂଜାରେ ସାମିଲ ହେବାକୁ ଆସିଥାନ୍ତି। ତେବେ ଚପଲ ଚଢାଇବା ପଛରେ ମାନ୍ୟତା ରହିଛି ଯେ, ଦେବୀ ମା’ ରାତିରେ ଭକ୍ତଙ୍କ ଚପଲ ପିନ୍ଧି ବିଚରଣ କରନ୍ତି। ଆଉ ମା’ ଯାହାର ଚପଲ ପିନ୍ଧି ବୁଲିବେ ତା’ର ସବୁ ଦୁଃଖକଷ୍ଟ ଦୂର ହୋଇଯାଏ। ତାଙ୍କ ଜୀବନ ଖୁସିରେ ଭରିଯାଏ। ଏହି ମାନ୍ୟତା ପାଇଁ ଏଠାରେ ଚପଲ ଜୋତାର ବିକ୍ରି ବହୁତ ଭଲ ହୋଇଥାଏ।
