ଚିକିଟି,୨୬।୨(ଡି.ଏନ.ଏ.): ଗଞ୍ଜାମ ଜିଲା ଚିକିଟି ଅଞ୍ଚଳରେ ଚଳିତବର୍ଷ ଫେବୃୟାରୀରୁ ଗ୍ରୀଷ୍ମ ପ୍ରକୋପ ବୃଦ୍ଧି ପାଇବାରେ ଲାଗିଛି। ପ୍ରବଳ ଖରା ଯୋଗୁ ସାଧାରଣ ଜୀବନ ପ୍ରଭାବିତ ହେଉଛି। ଦିଗପହଣ୍ଡି ବନାଞ୍ଚଳ ଚିକିଟି ସେକ୍ସନ ଅଧୀନରେ ଥିବା ରତନେଇ ଓ ଧାନ୍ୟରାଶିଆ ଜଙ୍ଗଲରେ ନିଅଁା ଦେଖିବାକୁ ମିଳିଛି। ଏଥିଯୋଗୁ ବହୁ ମୂଲ୍ୟବାନ ବୃକ୍ଷ ନଷ୍ଟ ହେବା ସଙ୍ଗେ ସଙ୍ଗେ ବନ୍ୟ ଜୀବଜନ୍ତୁ କ୍ଷତିଗ୍ରସ୍ତ ହେଉଛନ୍ତି। ଜଙ୍ଗଲରେ ନିଆଁ ଯେପରି ନ ଲାଗିବ ସେଥିପ୍ରତି ସ୍ଥାନୀୟ ଲୋକଙ୍କ ସଚେତନତା ଜରୁରୀ ହୋଇପଡୁଛି। ଜଙ୍ଗଲ ବିଭାଗ ପକ୍ଷରୁ ଏଥି ନିମନ୍ତେ ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ଅଞ୍ଚଳର କେତେକ ବୃଦ୍ଧିଜୀବୀ ମତବ୍ୟକ୍ତ କରିଛନ୍ତି। ଜଙ୍ଗଲ ବିଭାଗ ନିକଟସ୍ଥ ଗ୍ରାମବାସୀଙ୍କୁ ନେଇ ବନସୁରକ୍ଷା ସମିତି ଗଠନ କରି ସେମାନଙ୍କ ହାତକୁ ଜଙ୍ଗଲ ରକ୍ଷଣାବେକ୍ଷଣ ଦାୟିତ୍ୱ ଦିଆଯାଇଛି। ଚିକିଟି ସେକ୍ସନ ଅଧୀନରେ ୧୦ ବନ ସୁରକ୍ଷା ସମିତି ପଞ୍ଜୀକୃତ ହୋଇସାରିଛି ଏବଂ ବନ ସୁରକ୍ଷା ସମିତିର ସଦସ୍ୟମାନଙ୍କୁ ବିଭାଗୀୟ ପକ୍ଷରୁ ଠିକ୍ ତାଲିମ କିମ୍ବା ଜଙ୍ଗଲକୁ ନେଇ ସେମାନେ କିଭଳି ଆର୍ଥିକ ସ୍ବାବଲମ୍ବୀ ହୋଇପାରିବେ ସେଥିପ୍ରତି କୌଣସି କାର୍ଯ୍ୟକ୍ରମ କରାଯାଉନାହିଁ। ଫଳରେ ବନସୁରକ୍ଷା ସମିତି କେବଳ ନାମକୁମାତ୍ର ରହିଛି। କାଠ ମାଫିଆମାନେ ଶାଳ, ପିଆଶାଳ, ଶାଗୁଆନ ଓ ଶିଶୁ କାଠ କାଟୁଥିବା ବେଳେ ଜଙ୍ଗଲ ନିକଟବର୍ତ୍ତୀ ଲୋକମାନେ ଜାଳେଣି କାଠ ପାଇଁ ଗଛ କାଟି ନେଇ ବଜାରରେ ବିକ୍ରି କରୁଛନ୍ତି। ଏ ସମ୍ପର୍କରେ ଚିକିଟି ଫରେଷ୍ଟର ପ୍ରଶାନ୍ତ ରାଓଙ୍କ ସହ ଯୋଗାଯୋଗ ବେଳେ ବର୍ତ୍ତମାନ ଯେଉଁ ନିଅଁା ଲାଗୁଛି ତାହା ସମ୍ପୂର୍ଣ୍ଣ ମନୁଷ୍ୟକୃତ। କେତେକ ଅସାମାଜିକ ବ୍ୟକ୍ତି ଏହିଭଳି କାଣ୍ଡ ଘଟାଉଥିବା କହିଛନ୍ତି।
