ରାଜନଗର, ୨୪।୫(ଡି.ଏନ.ଏ.): ଅଲିଭ୍ରିଡେଲ କଇଁଛଙ୍କ ଅନ୍ତୁଡିଶାଳ ପାଇଁ କେନ୍ଦ୍ରାପଡ଼ା ଜିଲା ଗହୀରମଥା ବିଶ୍ୱ ପର୍ଯ୍ୟଟନ ମାନଚିତ୍ରରେ ସ୍ବତନ୍ତ୍ର ସ୍ଥାନ ଅଧିକାର କରିଛି। ୧୯୭୫ ମସିହା ପରଠାରୁ ଅଲିଭ୍ରିଡେଲ କଇଁଛଙ୍କ ରହସ୍ୟମୟ ଜୀବନଶୈଳୀ ବଙ୍ଗୋପସାଗର ନାସୀ-୨ ସମେତ ସାତଭାୟା, ଅଗରନାସୀ ବେଳାଭୂମିରେ ସମୂହ ଅଣ୍ଡାଦାନ ପ୍ରକ୍ରିୟା ଚାଲୁ ରହିଛି। ବିରଳ ଅଲିଭରିଡେଲ କଇଁଛମାନଙ୍କ ସୁରକ୍ଷା ପାଇଁ ମେ ୨୩ ତାରିଖକୁ ବିଶ୍ୱ କଇଁଛ ଦିବସ ଭାବେ ପାଳନ କରାଯାଉଛି। କଇଁଛଙ୍କ ସୁରକ୍ଷା ଓ ସେମାନଙ୍କ ବାସସ୍ଥାନ ନିରପଦ ରଖିବା ପାଇଁ ଏହି ଦିବସରେ ସଚେତନତା ସୃଷ୍ଟି କରାଯିବା କଥା। ବିଡମ୍ବନାର ବିଷୟ ଅନ୍ତୁଡ଼ିଶାଳା ଦାୟିତ୍ୱରେ ଥିବା ରାଜନଗର ବନ୍ୟ ପ୍ରାଣୀ ଡିଭିଜନ ପକ୍ଷରୁ ଏହି ଦିବସ ପାଳନ କରାଯାଇନାହିଁ। ଏହାକୁ ନେଇ ପରିବେଶବିତ୍ ଓ କଇଁଛ ବିଷାରଦଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଅଭିଲରିଡେଲ କଇଁଛଙ୍କ ଆଗମନ ପ୍ରତିବର୍ଷ ନଭେମ୍ବରରୁ ଏପ୍ରିଲ ପର୍ଯ୍ୟନ୍ତ ସେମାନଙ୍କ ପ୍ରଜନନ ପ୍ରକ୍ରିୟା ଓ ମା’ କଇଁଛମାନଙ୍କ ଗହୀରମଥା ସାମୁଦ୍ରିକ ଅଭୟାରଣ୍ୟ ନୀଳ ଜଳ ରାଶିକୁ ଅତିକ୍ରମ କରି ବେଳାଭୂମିରେ ଅଣ୍ଡା ଦେବା ପ୍ରାକୃତିକ ଦୃଶ୍ୟ ବେଶ ମନ ମୁଗ୍ଧକର। ଏହାଛଡ଼ା ଅଲିଭରିଡେଲ କଇଁଛଙ୍କ ଆଗମନ ଯୋଗୁ ସାମୁଦ୍ରିକ ପରିବେଶ ସନ୍ତୁଳନ ରଖିବାରେ ପ୍ରମୁଖ ଭୂମିକା ଗ୍ରହଣ କରି ଆସୁଛନ୍ତି। କଇଁଛମାନଙ୍କ ଆଗମନରେ ବନ ବିଭାଗ ପକ୍ଷରୁ ୭ ମାସ ଧରି ସାମୁଦ୍ରିକ କଟକଣା ଯୋଗୁ ମାଛ ଧରିବା ବନ୍ଦ କରାଯାଇଥାଏ। ଫଳରେ ଏହି ଅଞ୍ଚଳରେ ସାମୁଦ୍ରିକ ମାଛ ବଂଶ ବୃଦ୍ଧି ପାଇଥାଏ। ପ୍ଲାଷ୍ଟକ୍ ଓ ଜାଲ ଯୋଗୁ ସମୁଦ୍ର ପ୍ରଦୂଷିତ ହେଉଥିବାରୁ ଏହାକୁ ଖାଇ କଇଁଛଙ୍କ ଅକାଳ ମୃତ୍ୟୁ ହୋଇଥାଏ। ଏ ସମ୍ପର୍କରେ ରାଜନଗର ଅତିରିକ୍ତ ବନ ସଂରକ୍ଷକ ପୁନମ୍ ହୀରା ହଁାସଦାଙ୍କୁ ପଚାରିବାରେ ଉପର ସ୍ଥରରୁ କଇଁଛ ଦିବସ ପାଳନ ପାଇଁ କୌଣସି ନିର୍ଦ୍ଦେଶ ଆସି ନ ଥିଲା। ତେଣୁ ଏହି ଦିବସ ପାଳନ କରାଯାଇନାହିଁ ବୋଲି ସେ କହିଛନ୍ତି।
