ଯାଜପୁର ଅଫିସ/ଝୁମ୍ପୁରୀ (ଡି.ଏନ.ଏ.),୧୯ା୮: ବୈତରଣୀ ନଦୀର ଜଳ ପତ୍ତନ ହ୍ରାସ ହେବା ପରେ ଯାଜପୁର ଜିଲା ଦଶରଥପୁର ବ୍ଲକରେ ବନ୍ୟା ପରିସ୍ଥିତି ନିୟନ୍ତ୍ରଣାଧୀନ ହୋଇଛି। ଏହାସହ ଜଳସମ୍ପଦ ବିଭାଗ ପକ୍ଷରୁ କାଣୀ ନଦୀର ବ୍ରହ୍ମଚାରୀପାଟଣା ଗ୍ରାମଠାରେ ସୃଷ୍ଟି ହୋଇଥିବା ଘାଇର ମରାମତି କାମ ଯୁଦ୍ଧକାଳୀନ ଭିତ୍ତିରେ ଆରମ୍ଭ ହୋଇଛି।
ବନ୍ୟା ଯୋଗୁ ବାସହରା ହୋଇ ରିଲିଫ କେନ୍ଦ୍ର, ପଡୋଶୀ, ବନ୍ଧୁବାନ୍ଧବଙ୍କ ଘରେ ଆଶ୍ରୟ ନେଇଥିବା ବନ୍ୟା ବିପନ୍ନମାନେ ମୁଣ୍ଡ ଗୁଞ୍ଜିବାକୁ ରାହା ଖୋଜୁଛନ୍ତି। କେତେଜଣ ରାସ୍ତା ଏବଂ ବନ୍ଧ ଉପରେ ଆଶ୍ରୟ ନେଇଥିବା ଦେଖିବାକୁ ମିଳିଛି। ବନ୍ୟାରେ ହଜି ଯାଇଥିବା ସାମଗ୍ରୀକୁ ଖୋଜୁଛନ୍ତି। ମାଟିଘରକୁ ସଜାଡିବାକୁ ଚେଷ୍ଟା କରୁଥିବା ଲୋକଙ୍କ ଦୁର୍ଦ୍ଦଶା ବଢି ଯାଇଛି। ଯେଉଁଘର ବନ୍ୟା ପାଣିରେ ଭିଜି ଠିଆ ହୋଇଛି ସେହିସବୁ ମଧ୍ୟ ବିପଦାପନ୍ନ ହୋଇଛି। କେତେବେଳେ ପଡିଯିବ ତାର ଠିକଣା ନାହିଁ। ଆଗାମୀ ଦିନରେ କେମିତି ରହିବା, ପିଲାଛୁଆଙ୍କୁ ଓ ବନ୍ୟା ପୂର୍ବରୁ ଉଦ୍ଧାର କରିଥିବା ଘର ସାମଗ୍ରୀକୁ କେଉଁଠି ରଖିବା ଆଦି ଚିନ୍ତାରେ ସେମାନେ ବ୍ୟସ୍ତ। ନିଜ କଷ୍ଟ ଉପାର୍ଜିତ ଖାଦ୍ୟ ସାମଗ୍ରୀ ସହ ଘରକରଣା ସାମଗ୍ରୀ ବନ୍ୟା ଜଳରେ ନଷ୍ଟ ହୋଇଯାଇଛି। ସ୍ବଳ୍ପବୃଷ୍ଟିପାତରେ ଯାହା କିଛି ଚାଷ କାମ ଆଗେଇ ଥିଲା ତାହା ବନ୍ୟାପାଣିରେ ଜଳମଗ୍ନ ହୋଇଛି। ଏଥିରେ ବନ୍ୟା ବିପନ୍ନମାନେ ଭାଙ୍ଗି ପଡିଛନ୍ତି। ଏହାସହ କସପା ପଞ୍ଚାୟତର କେତେକ ଗ୍ରାମକୁ ଯୋଗାଯୋଗ ସମ୍ଭବପର ହୋଇଛି। ପ୍ରଶାସନ ତରଫରୁ କସପା ପଞ୍ଚାୟତର ସମସ୍ତ ଗ୍ରାମକୁ ରିଲିଫ୍ ସାମଗ୍ରୀ ପଠାଯାଇଥିବାର କୁହାଯାଉଥିଲେ ମଧ୍ୟ ବିଭିନ୍ନ ସ୍ଥାନରେ ସୁଷମ ବଣ୍ଟନ ହୋଇ ନ ଥିବାର ଅଭିଯୋଗ ହେଉଛି।
ଜଳସେଚନ ବିଭାଗର ଅତିରିକ୍ତ ମୁଖ୍ୟଯନ୍ତ୍ରୀ ଧନେଶ୍ୱର ସାମଲ, ଏସ୍ସି ଶରତଚନ୍ଦ୍ର ଘଡାଇ, ଏସ୍ଡିଓ ଅନ୍ତର୍ଯ୍ୟାମୀ ମହାନ୍ତି, କନିଷ୍ଠ ଯନ୍ତ୍ରୀ ଅରୁଣ କୁମାର ଷଡ଼ଙ୍ଗୀ ପ୍ରମୁଖ ଘାଇ ହୋଇଥିବା ସ୍ଥାନରେ ଉପସ୍ଥିତ ରହି ଘାଇ ମରାମତିର ତଦାରଖ କରିଛନ୍ତି। ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ଗୁରୁବାର କସପା, ଦୁଦୁରାଅଣ୍ଟା, ମଲ୍ଲିକାପୁର ଆଦି ପଞ୍ଚାୟତକୁ ପରିଦର୍ଶନ କରିବା ସହିତ ବୈତରଣୀ ଓ କାଣୀ ନଦୀର ବନ୍ଧର ସ୍ଥିତି ଅନୁଧ୍ୟାନ କରିଥିଲେ। ଅପରପକ୍ଷରେ ବୈତରଣୀ ନଦୀର ମୂକୂଳା ମୁହାଣଦେଇ ବନ୍ୟାଜଳ କୟାଁ ପଞ୍ଚାୟତର ଧରମପୁର ଓ ଗହିରାପାଳ ଗ୍ରାମରେ ବ୍ୟାପକ କ୍ଷୟକ୍ଷତି ଘଟାଇଥିବାର ଦେଖାଯାଇଛି। ବନ୍ୟାଜଳ ଗ୍ରାମର ବିଭିନ୍ନ ସାହୀକୁ ସଂଯୋଗ କରୁଥିବା ମୂଖ୍ୟ ରାସ୍ତାଗୁଡିକ ଭରିରହିଛି । ଧରମପୁର ଓ ଗହିରାପାଳ ଗ୍ରାମର ଗୃହପାଳିତ ପଶୁଙ୍କୁ ପେଟା ନଦୀ ପୋଲ ଓ ମୁଖ୍ୟ ରାସ୍ତାର ଶୁଖିଲା ସ୍ଥାନରେ ବନ୍ଧା ଯାଇଛି। ପ୍ରଶାସନ ତରଫରୁ ବ୍ଲକର ୧୧ ପଞ୍ଚାୟତର ୩୩ ଗ୍ରାମର ୧୩୬୬୫ ଗ୍ରାମ ପ୍ରଭବିତ ହୋଇଥିବା କୁହାଯାଉଥିବାବେଳେ ବାସ୍ତବତା କିନ୍ତୁ ତା’ଠାରୁ ଢେର ବେଶି ହେବ ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି । ଏଥିସହ ୩୫୭୧ ହେକ୍ଟର କ୍ଷତିଗ୍ରସ୍ତ ହୋଇଯାଇଛି। ଏଥିରେ ଧାନ, ଡାଲିଜାତୀୟ ଫସଲ ଓ ପନିପରିବା ସମ୍ପୂର୍ଣ୍ଣରୂପେ ନଷ୍ଟ ହୋଇଯାଇଛି। ନିତ୍ୟସାମଗ୍ରୀ ବନ୍ୟାଜଳରେ ନଷ୍ଟ ହୋଇଯାଇଥିବାବେଳେ ଅତ୍ୟାବଶ୍ୟକ କପଡା ଖଣ୍ଡେ ପାଇବାକୁ ବିପନ୍ନମାନେ ଅନୁରୋଧ କରୁଥିଲେ ସୁଦ୍ଧା ପ୍ରଶାସନର ଚିନ୍ତା ନାହିଁ। ବନ୍ୟାଜଳ ହ୍ରାସ ପାଇଥିଲେ ସୁଦ୍ଧା ଜିଲାର ସମସ୍ତ ଅଞ୍ଚଳକୁ ମେଡିକାଲ ଟିମ୍ ପହଞ୍ଚି ପାରିନାହିଁ। ଫଳରେ ବନ୍ୟାଞ୍ଚଳରେ ଦୂଷିତପାଣି ପିଇ ବନ୍ୟା ବିପନ୍ନମାନେ ନାନା ସଂକ୍ରମିତ ରୋଗରେ ଆକ୍ରାନ୍ତ ହେବାର ସମ୍ଭାବନା ରହିଛି। ଅନ୍ୟପକ୍ଷେ ବନ୍ୟା ଦୁର୍ଗତଙ୍କ ଦୁଃଖ ଅପସରି ନ ଥିବାବେଳେ ଆଉ ଏକ ଲଘୁଚାପ ବର୍ଷା ଲୋକଙ୍କ ନିଦ ହଜେଇ ଦେଇଛି।