ଅସ୍ତରଙ୍ଗ,(ଡି.ଏନ୍.ଏ.)୨୮।୮: ପୁରୀ ଜିଲାରେ ବନ୍ୟାର ବିଭୀଷିକା ଦେଖିବାକୁ ମିଳିଛି। ଏବେ ବନ୍ୟାଜଳର ସ୍ତର କମିଯାଇଥିଲେ ମଧ୍ୟ ବିଭିନ୍ନ ଗ୍ରାମାଞ୍ଚଳରେ ଜଳାର୍ଣ୍ଣବ ହୋଇଥିବାରୁ ଲୋକଙ୍କ ଦୁର୍ଦ୍ଦଶା କମିନି। ଏବେ ବି ଲୋକେ ପାଣିଘେରରେ ରହୁଥିବା ବେଳେ ଗ୍ରାମକୁ ରାସ୍ତା ଯୋଗାଯୋଗ ବିଚ୍ଛିନ୍ନ ସହ ବନ୍ୟାଜଳରେ ଚାଷ ଜମି ନଷ୍ଟ ହେବା ସହ ଖାଇବାକୁ ମଧ୍ୟ ମୁଠେ ଦାନା ଠିକ୍ ଭାବେ ମିଳିପାରୁନି। ଫଳରେ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ବେଳେ ପ୍ରଶାସନର ଯଥେଷ୍ଟ ସହାୟତା ଓ ଚାଷୀମାନେ କରିଥିବା ଋଣ ପାଇଁ ସହାୟତା ପ୍ରଦାନ ପାଇଁ ଦାବି ହେଉଛି। ଅସ୍ତରଙ୍ଗ ଅଞ୍ଚଳର ୫ଟି ପଞ୍ଚାୟତର ହଜାର ହଜାର ଏକର ଚାଷ ଜମିରେ ବନ୍ୟାଜଳ ଜମି ରହି ଫସଲ, ପନିପରିବା ନଷ୍ଟ ହୋଇଗଲା। ଅସ୍ତରଙ୍ଗ ବ୍ଲକର ନଗର, ଆଳସାହି, ନଈଗୁଆଁ, ତାଳଦା, ଆଳଙ୍ଗପୁର ପଞ୍ଚାୟତର ଶହ ଶହ ଚାଷୀଙ୍କର ସମାନ ଅବସ୍ଥା। ଧାନ ଏବଂ ପରିବା ଚାଷ ନଷ୍ଟ ହେବା କାରଣରୁ ୬୦୦ରୁ ଊର୍ଦ୍ଧ୍ୱ ଚାଷୀ ସମବାୟ ବ୍ୟାଙ୍କରୁ ଋଣ କରି ଆଣିଥିବା ବେଳେ ଅନ୍ୟ କିଛି ଚାଷୀ ଘରୋଇ ଋଣ ଆଣି ହଜାର ହଜାର ଟଙ୍କା ଖର୍ଚ୍ଚ କରିିଥିବା ଚାଷ ଏବେ ନଷ୍ଟ ହେଇଯାଇଛି। ଫଳରେ ଚାଷୀଙ୍କ ମୁଣ୍ଡରେ ଏକପ୍ରକାର ଚଡ଼କ ପଡ଼ିଯାଇଛି। ବିଶେଷ ଭାବେ ନଗର ପଞ୍ଚାୟତର ୩ ହଜାର ଏକର ଚାଷ ଜମିରୁ ପ୍ରାୟ ୨ହଜାର ଚାଷ ଜମି ସମ୍ପୂର୍ଣ୍ଣ ନଷ୍ଟ ହୋଇଥିବା ଚାଷୀମାନେ କହିଛନ୍ତି। ଜିଲା ପ୍ରଶାସନ ପକ୍ଷରୁ ତଲଦା, ନଗର, ଆଳସାହି ଓ ଆଲଙ୍ଗପୁର ପଞ୍ଚାୟତକୁ ତୁରନ୍ତ ସର୍ଭେ କରି ରିପୋର୍ଟ ଦେବାକୁ ତହସିଲଦାର ରାଜଲକ୍ଷ୍ମୀ ନାୟକଙ୍କୁ ନିର୍ଦ୍ଦେଶ ଦିଆଯାଇଛି। ବ୍ଲକ ପ୍ରଶାସନକୁ କ୍ଷୟକ୍ଷତି ଆକଳନ କରିବା ପାଇଁ କୁହାଯାଇଛି। କୃଷି ବିଭାଗ ଅଧିକାରୀ ଓ ଉଦ୍ୟାନ ବିଭାଗ ଅଧିକାରୀମାନଙ୍କୁ ମଧ୍ୟ ରିପୋର୍ଟ ଦେବା ପାଇଁ ନିର୍ଦ୍ଦେଶ ରହିଛି। ଏହି ସମସ୍ୟାକୁ ମନ୍ତ୍ରୀ ତଥା ସ୍ଥାନୀୟ ବିଧାୟକ ତୁଷାରକାନ୍ତି ବେହେରା ଏବଂ ପ୍ରଶାସନ ଗୁରୁତ୍ୱ ସହ ନେଇ କିପରି ଚାଷୀଙ୍କ କ୍ଷତି ଭରଣା କରାଯାଇପାରିବ ସେଥିପ୍ରତି ଦୃଷ୍ଟି ଦେବା ଆବଶ୍ୟକ। ସମଗ୍ର ଚାଷୀଙ୍କ ପାଇଁ ଋଣ ଛାଡ କରିବାକୁ ରାଜ୍ୟ ସରକାର ଏକ ସ୍ବତନ୍ତ୍ର ପ୍ୟାକେଜ ଘୋଷଣା କରିବାକୁ ସାଧାରଣରେ ଦାବି ହେଉଛି। ଚାଷୀମାନଙ୍କ ସ୍ବାର୍ଥ ଆଉ ସମସ୍ୟା ପ୍ରତି ଦୃଷ୍ଟି ଦିଆ ନ ଗଲେ ଆଗାମୀ ଦିନରେ ଚାଷୀ ଆନ୍ଦୋଳନ ମୁଣ୍ଡ ଟେକିବ ବୋଲି ସ୍ଥାନୀୟ ଚାଷୀମାନେ ଚେତାବନୀ ଦେଇଛନ୍ତି।
