ପୁରୀ ଅଫିସ,୩୦। ୮: କରୋନା ଆତଙ୍କ ଥମି ନ ଥିବାବେଳେ ଆସୁଛି ବନ୍ୟା। ବୋଝ ଉପରେ ନଳିତା ବିଡ଼ା ସଦୃଶ ଏଭଳି ଦୁଃସ୍ଥିତିକୁ ସାମ୍ନା କରିବାକୁ ଯାଉଛନ୍ତି ଲୋକେ। ହୀରାକୁଦର ୪୬ଟି ଗେଟ୍ ଖୋଲାଯିବା ପରେ ମହାନଦୀରେ ବନ୍ୟା ଆସୁଛି। ବର୍ତ୍ତମାନ ପୁରୀ ଜିଲାର ବିଭିନ୍ନ ନଦୀ ଉଚ୍ଛୁଳୁଛି। ବନ୍ୟା ପାଣି ପହଞ୍ଚତ୍ଲେ ସ୍ଥିତି ଆହୁରି ଅସମ୍ଭାଳ ହେବ ବୋଲି ଲୋକେ ଆଶଙ୍କା କଲେଣି। ଜିଲାର ନଦୀକୂଳିଆ ଲୋକେ ବେଶି ଛାନିଆ ହୋଇପଡ଼ିଛନ୍ତି। ବିଶେଷକରି କଣାସ ବ୍ଲକରେ ସ୍ଥିତି ଗମ୍ଭୀର ହୋଇଛି। ବିଭିନ୍ନ ଗଁା ଏପରିକି ଲୋକଙ୍କ ଘରେ ପାଣି ପଶିଛି। ବିଭିନ୍ନ ନଦୀବନ୍ଧର ଦୁର୍ବଳ ସ୍ଥାନରେ ଘାଈ ସୃଷ୍ଟି ଆଶଙ୍କା ଥିବାରୁ ଲୋକେ ଚିନ୍ତାରେ ରହିଛନ୍ତି। ଅନ୍ୟପକ୍ଷରେ ପ୍ରଶାସନ ପକ୍ଷରୁ ଦୁର୍ବଳ ନଦୀବନ୍ଧ ପ୍ରତି ସତର୍କ ଦୃଷ୍ଟି ରଖାଯାଇଥିବା କୁହାଯାଇଛି।
ଦୟାନଦୀରେ ପୁରୀ ଜଳସେଚନ ବିଭାଗ ଅଧୀନ ନଦୀବନ୍ଧର ବିଭିନ୍ନ ସ୍ଥାନରେ ଘଳିଆ ପଡ଼ି ଘାଈ ସୃଷ୍ଟି ଯୋଗୁ ନିକଟବର୍ତ୍ତୀ ଗ୍ରାମବାସୀ ଭୟଭୀତ ଅବସ୍ଥାରେ ରହିଛନ୍ତି। ଦୟାନଦୀର ଖୋର୍ଦ୍ଧା ଡିଭିଜନ ଅଧୀନ ନଦୀବନ୍ଧ ଡେଇଁ କଣାସ ବ୍ଲକର ବିଭିନ୍ନ ଗଁାରେ ପାଣି ପଶିଛି। ବହୁ ଲୋକଙ୍କ ଘରେ ପାଣି ପଶିଥିବାରୁ ସେମାନେ ନାହିିଁ ନ ଥିବା ଦୁର୍ଦ୍ଦଶା ଭୋଗୁଛନ୍ତି। ଲୁଣାନଦୀର କରମଳାସ୍ଥିତ ପୁରୁଣା ବ୍ରିଜରେ ରାଜଦଳ ଅଟକି ରହିଥିବାରୁ ଜଳ ନିଷ୍କାସନ ହେବାରେ ବାଧା ଉପୁଜୁଛି। ରାଜୁଆ ନଦୀ ବି ଫୁଲୁଛି। ତେଣୁ ସମ୍ଭାବ୍ୟ ବନ୍ୟାକୁ ନେଇ କଣାସ ବ୍ଲକବାସୀ ଭୟଭୀତ ହୋଇପଡ଼ିଛନ୍ତି। ସେହିପରି ଭାର୍ଗବୀ ନଦୀର ବିଦ୍ୟାଧରପୁର ଗଁା ପାଖ ବନ୍ଧରୁ ପାଣି ଝରୁଛି। ନିକଟବର୍ତ୍ତୀ ବିଦ୍ୟାଧରପୁର ଓ ଏହାର ନିକଟବର୍ତ୍ତୀ ସାହି ଲୋକେ ଚିନ୍ତାରେ ରହିଛନ୍ତି। ନଦୀରେ ଅଧିକ ପାଣି ହେଲେ ରାତିରେ ଘଳିଆ ଏବଂ ଘଳିଆରୁ ଘାଇ ସୃଷ୍ଟି ହେବା ନେଇ ସେମାନେ ଆଶଙ୍କା ବ୍ୟକ୍ତ କରିଛନ୍ତି। ଶନିବାର ଅପରାହ୍ନରେ ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ସଞ୍ଜୟ ଦାସବର୍ମା ତଳମାଳ ପଞ୍ଚାୟତର ପୋଡ଼ାକେରା ବ୍ରିଜ୍ଠାରେ ସମ୍ଭାବ୍ୟ ବନ୍ୟା ପରିସ୍ଥିତି ଅନୁଧ୍ୟାନ କରିଛନ୍ତି। ସେହିପରି ଜିଲାପାଳ ବଲଓ୍ବନ୍ତ ସିଂ ଏବଂ ଏସ୍ପି ଅଖିଳେଶ୍ୱର ସିଂ ଡେଲାଙ୍ଗ, କଣାସ, ପିପିଲି ପ୍ରଭୃତି ଅଞ୍ଚଳ ବୁଲି ବିଭିନ୍ନ ନଦୀର ସ୍ଥିତି ଅନୁଧ୍ୟାନ କରିଛନ୍ତି।
