ଛତ୍ରପୁର,୨୦ା୧୦(ସନ୍ତୋଷ ପାଢୀ): ଗଞ୍ଜାମ ଜିଲା ଛତ୍ରପୁର ବ୍ଲକ ଆର୍ଯ୍ୟପଲ୍ଲୀଠାରେ ମାଛ ଧରା ଜେଟି (ଫିସିଂ ହାରବୋର) ନିର୍ମାଣ ପ୍ରସ୍ତାବ ଦୀର୍ଘବର୍ଷ ଧରି ଅଟକିରହିଛି। ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ନିର୍ଦ୍ଧାରିତ ଜଙ୍ଗଲ ଜମିର କିସମ ପରିବର୍ତ୍ତନ, ଇଂଜିନିୟରିଂ ସର୍ଭେ, ପ୍ରକଳ୍ପ ନକ୍ସା ଓ ମଡେଲ ଅଧ୍ୟୟନ କରାଯାଇଥିଲା। ତେବେ ପରିବେଶ ମଞ୍ଜୁରୀ ତଥା କେନ୍ଦ୍ର ଓ ରାଜ୍ୟ ସରକାରଙ୍କ ପ୍ରଶାସନିକ ଅନୁମୋଦନ ମିଳିନଥିବାରୁ ଏହା ନିର୍ମାଣ ହୋଇପାରୁନଥିବା ଜଣାପଡିଛି। ଫଳରେ ମତ୍ସ୍ୟଜୀବୀମାନେ ମାଛ ମାରିବାକୁ ସମୁଦ୍ରକୁ ଯିବା ଏବଂ ମାଛ ଧରି କୂଳକୁ ଫେରିବାରେ ସମସ୍ୟାର ସମ୍ମୁଖୀନ ହେଉଛନ୍ତି। ଆର୍ଯ୍ୟପଲ୍ଲୀ ନିକଟରେ ଥିବା ମାଛଧରା ଜେଟି ମୁହାଣ ପୋତିହୋଇଗଲାଣି। ଦୀର୍ଘ ବର୍ଷ ଧରି ଏପରି ସମସ୍ୟା ଲାଗି ରହିଛି। ମତ୍ସ୍ୟଜୀବୀମାନେ ମଧ୍ୟ ସମୁଦ୍ର କୂଳକୁ ଡଙ୍ଗାରେ ଆସି ପାରୁନାହଁାନ୍ତି। ବିଭିନ୍ନ ସମୟରେ ଲହଡ଼ିରେ ଡଙ୍ଗା ଭାଙ୍ଗିବା ସହ ମାଛ ନଷ୍ଟ ହେଉଥିବା ନଜିର ରହିଛି। ଏଥିସହ ଏହି ଦୁର୍ଘଟଣାରେ ମତ୍ସଜୀବୀମାନେ ଅଘଟଣର ଶୀକାର ହେଉଛନ୍ତି। ପୂର୍ବରୁ ଏନେଇ ଭାଜପାର ଏକ ପ୍ରତିନିଧିଦଳ ନୂଆଦିଲୀ ଯାଇ କେନ୍ଦ୍ର ମତ୍ସ୍ୟ ସମ୍ପଦ ଓ କେନ୍ଦ୍ର ଶିକ୍ଷାମନ୍ତ୍ରୀଙ୍କୁ ଭେଟି ଏ ସମ୍ପର୍କରେ ଦୃଷ୍ଟି ଆକର୍ଷଣ କରିବା ସହ ସ୍ମାରକପତ୍ର ପ୍ରଦାନ କରିଥିଲେ। ସଦ୍ୟ ସମାପ୍ତ ବିଧାନସଭା ଅଧିବେଶନରେ ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା ଏ ପ୍ରସଙ୍ଗରେ ପ୍ରଶ୍ନ ଉଠାଇଥିଲେ। ପରିବେଶ ମଂଜୁରୀ ଏବଂ ଉଭୟ ସରକାରଙ୍କ ପ୍ରଶାସନିକ ଅନୁମୋଦନ ମିଳିବା ପରେ ମାଛଧରା ଜେଟି ନିର୍ମାଣ ପାଇଁ ପରବର୍ତ୍ତୀ ପଦକ୍ଷେପ ନିଆଯାଇପାରେ ବୋଲି ରାଜ୍ୟ ମସତ୍ୟ ଓ ପ୍ରାଣୀସମ୍ପଦ ବିକାଶ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ତାଙ୍କ ଉତ୍ତରରେ କହିଥିଲେ। ମିଳିଥିବା ସୂଚନା ଅନୁସାରେ ମତ୍ସ୍ୟଜେଟି ଓ ଫିସିଂ ହାରବର ନଥିବାରୁ ଏଠାର ମତ୍ସଜୀବୀ କେରଳ, ଗୋଆ, ମୁମ୍ବାଇ ଓ ଚେନ୍ନାଇ ଆଦିସ ଅଞ୍ଚଳକୁ କାମ କରିବାକୁ ଚାଲିଯାଉଛନ୍ତି।
ସୂଚନାଯୋଗ୍ୟ ସାନ ଆର୍ଯ୍ୟପଲ୍ଲୀ-ବଡ ଆର୍ଯ୍ୟପଲ୍ଲୀ ମଧ୍ୟରେ ଏକ ମାଛଧରା ଜେଟି ନିର୍ମାଣ ପାଇଁ ପରିକଳ୍ପନା କରାଯାଇଥିଲା। ଏଥିପାଇଁ ବାରମ୍ବାର ଦେଶର ବିଭିନ୍ନ ସ୍ଥାନରୁ ବିଶେଷଜ୍ଞ ଟିମ୍ ଆସି ସର୍ଭେ କରିଥିଲେ। ତେବେ ଏନେଇ କୌଣସିପଦକ୍ଷେପ ନିଆଯାଇନଥିବାରୁ ମତ୍ସ୍ୟଜୀବୀମାନେ ନିରାଶରେ ଅଛନ୍ତି।
