ଭୁବନେଶ୍ୱର,୧୫ା୨(ବ୍ୟୁରୋ):ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ ଆସନ୍ତା ୧୬ ତାରିଖ ବୁଧବାର ଅନୁଷ୍ଠିତ ହେବ। ଏଥିପାଇଁ ସୋମବାର ସନ୍ଧ୍ୟାରେ ପ୍ରଚାର କାର୍ଯ୍ୟ ଶେଷ ହୋଇଛି। ମତଦାନ ହେବାକୁ ଥିବା ଅଞ୍ଚଳରୁ ବାହାର ନେତା ଏବଂ କର୍ମୀଙ୍କୁ ସନ୍ଧ୍ୟା ୭ଟା ପୂର୍ବରୁ ସ୍ଥାନ ଛାଡ଼ିବାକୁ ଦିଆଯାଇଥିବା ନିର୍ଦ୍ଦେଶକୁ ସୁନିଶ୍ଚିତ କରିବା ପାଇଁ ରାଜ୍ୟ ନିର୍ବାଚନ କମିଶନର ଜିଲାପାଳଙ୍କୁ କହିଛନ୍ତି। ପ୍ରଚାର ବନ୍ଦ ହେବାର ୩୬ ଘଣ୍ଟା ପରେ ମତଦାନ ଅନୁଷ୍ଠିତ ହେବ। ତେଣୁ ଏହି ସମୟରେ ମତଦାତାଙ୍କୁ ପ୍ରାର୍ଥୀ ଓ ସେମାନଙ୍କ ସମର୍ଥକ ବିଭିନ୍ନ ଉପାୟରେ ପ୍ରଭାବିତ କରିବାର ଯଥେଷ୍ଟ ସମ୍ଭାବନା ରହିଛି। ତେଣୁ କୌଣସି ପ୍ରକାର ବେଆଇନ କାର୍ଯ୍ୟ ଯେପରି ନ ହେବ ସେଥିପାଇଁ ଜିଲାପାଳ ଏବଂ ପୋଲିସକୁ ସତର୍କ କରାଇଛନ୍ତି।
ପ୍ରଥମ ପର୍ଯ୍ୟାୟରେ ୩୦ଜିଲା ୭୧ବ୍ଲକର ୨୦୨ ଜିଲା ପରିଷଦ ଜୋନ୍ର ୧,୬୬୯ ପଞ୍ଚାୟତରେ ଜିଲା ପରିଷଦ, ସରପଞ୍ଚ, ସମିତି ସଭ୍ୟ ଓ ୱାର୍ଡମେମ୍ବର ନିମନ୍ତେ ନିର୍ବାଚନ ହେବ। ଏଥିପାଇଁ ୨୨,୩୭୯ ବୁଥ୍ ପ୍ରସ୍ତୁତ ହେବା ସହ ବ୍ୟାପକ ବ୍ୟବସ୍ଥା କରାଯାଇଛି। ମୋଟ ୬୭.୫୧ଲକ୍ଷ ଭୋଟର ନିଜର ମତାଧିକାର ସାବ୍ୟସ୍ତ କରିବେ। କମିଶନଙ୍କ ଦ୍ୱାରା ଚିହ୍ନଟ ହୋଇଥିବା ସମ୍ବେଦନଶୀଳ ବୁଥ୍ରେ ଅତିରିକ୍ତ ସୁରକ୍ଷାକର୍ମୀ ମୁତୟନ କରାଯିବ। ସମସ୍ତ ସମ୍ବେଦନଶୀଳ ବୁଥ୍ରେ ମତଦାନର ଭିଡିଓ ରେକର୍ଡିଂ କରାଯିବା ସହ ଷ୍ଟ୍ରଙ୍ଗ୍ରୁମ୍ରେ ସିସିଟିଭି କ୍ୟାମେରା ଲଗାଯିବ ଓ ଭୋଟଗଣତିର ରେକର୍ଡିଂ ମଧ୍ୟ ହେବ ବୋଲି କମିଶନର କହିଛନ୍ତି। ସୋମବାର ବାଲେଶ୍ୱର,ଭଦ୍ରକ, ଖୋର୍ଦ୍ଧା, ନୟାଗଡ଼, ପୁରୀ, ଗଞ୍ଜାମ, ଗଜପତି, କନ୍ଧମାଳ, ବୌଦ୍ଧ, ରାୟଗଡ଼ା ଓ କୋରାପୁଟ ଜିଲାକୁ ପୋଲିଂ ଦଳ ଗସ୍ତ କରିଛନ୍ତି। ମଙ୍ଗଳବାର ଅନ୍ୟ ୧୯ ଜିଲାକୁ ଅବଶିଷ୍ଟ ପୋଲିଂ ପାର୍ଟି ଗସ୍ତ କରିବେ। ଚଳିତଥର ମତଦାନ ସକାଳ ୭ଟାରୁ ମଧ୍ୟାହ୍ନ ୧ଟା ଯାଏ ଅନୁଷ୍ଠିତ ହେବ। ପୂର୍ବରୁ ପୂର୍ବାହ୍ନ ୧୨ଟାରେ ଭୋଟ ଗ୍ରହଣ ଶେଷ ହେଉଥିଲା। ପ୍ରଥମଥର ଲାଗି ୧ ଘଣ୍ଟା ସମୟ ବୃଦ୍ଧି କରାଯାଇଛି।
ଏଥର ପ୍ରଥମଥର ଲାଗି ଭୋଟଗଣତି ମତଦାନ କେନ୍ଦ୍ରରେ ନ ହୋଇ ବ୍ଲକ ସଦରମହକୁମାରେ ୨୬, ୨୭ ଓ ୨୮ତାରିଖରେ ଅନୁଷ୍ଠିତ ହେବ। ପୂର୍ବରୁ ଯେଉଁ କେନ୍ଦ୍ରରେ ଭୋଟ ଗ୍ରହଣ ଶେଷ ହେଉଥିଲା ସେଠାରେ ସେହିଦିନ ଗଣନା କରାଯାଉଥିଲା। ଏହାକୁ ନେଇ ଆପତ୍ତି ଅଭିଯୋଗ ହେବା ପରେ କମିଶନ ଏକକ ଗଣନା କେନ୍ଦ୍ର କରିବାକୁ ନିଷ୍ପତ୍ତି ନେଇଛନ୍ତି। ଏଥିପାଇଁ ରାଜ୍ୟ ସରକାର ପଞ୍ଚାୟତିରାଜ ଆଇନକୁ ସଂଶୋଧନ କରିଛନ୍ତି। ଭୋଟ ଗ୍ରହଣ ପରେ ଆଉ ଗଣନା ନ ହୋଇ ଭୋଟବାକ୍ସଗୁଡ଼ିକ ବ୍ଲକ ମୁଖ୍ୟାଳୟରେ ରହିବ। ସମସ୍ତ ୫ପର୍ଯ୍ୟାୟ ମତଦାନ ଶେଷ ହେବାର ଦିନକ ପରେ ଜୋନ୍ଓ୍ବାରି ଗଣନା ହେବ। ସେହିଦିନ ଫଳାଫଳ ପ୍ରକାଶ କରାଯିବ। ପଞ୍ଚାୟତ ନିର୍ବାଚନରେ ଭୋଟ ଦେବାକୁ ଚାହୁଁଥିବା କର୍ମଚାରୀଙ୍କ ପାଇଁ ମତଦାନ ଦିନ ଦରମା ପ୍ରଦାନ ସହ ଛୁଟି ଦେବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ଏଥିସହିତ ସମସ୍ତ ବ୍ୟବସାୟିକ ପ୍ରତିଷ୍ଠାନ, ବାଣିଜ୍ୟ ଓ ଶିଳ୍ପାନୁଷ୍ଠାନ ନିଜ ନିଜ ଅଞ୍ଚଳ ପାଇଁ ସ୍ଥିର ହୋଇଥିବା ମତଦାନ ତାରିଖ ଦିବସରେ କର୍ମଚାରୀଙ୍କୁ ଦରମା ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି। ରାଜ୍ୟର ସମସ୍ତ ଜିଲାପାଳ ଏବଂ ଅନ୍ୟ ସମ୍ପୃକ୍ତ ଅଧିକାରୀଙ୍କୁ ଏନେଇ ଚିଠି ଲେଖି ଜଣାଇ ଦିଆଯାଇଛି।
