ସାଉଥାମ୍ପଟନ, ୨୯।୭- କରୋନା ଭାଇରସ ସଂକ୍ରମଣ ଜନିତ ଅନିଶ୍ଚିତତା ମଧ୍ୟରେ ଅନ୍ତର୍ଜାତୀୟ ସ୍ତରରେ ଇଂଲଣ୍ଡ-ଓ୍ବେଷ୍ଟଇଣ୍ଡିଜ ଟେଷ୍ଟ କ୍ରିକେଟ ସିରିଜ ଅନୁଷ୍ଠିତ ହୋଇ ଯାଇଛି। ପ୍ରଥମ ଟେଷ୍ଟରେ ଓ୍ବେଷ୍ଟଇଣ୍ଡିଜ ବିଜୟୀ ହୋଇଥିଲେ ହେଁ ପରବର୍ତ୍ତୀ ୨ଟି ଟେଷ୍ଟ ଜିତି ଇଂଲଣ୍ଡ ୨-୧ରେ ସିରିଜ ବିଜୟୀ ହୋଇଛି। କରୋନା ଜନିତ ବ୍ରେକ୍ ପରେ ଅନ୍ତର୍ଜାତୀୟ ସ୍ତରରେ ଏବେ ପ୍ରଥମ ଦିନିକିଆ କ୍ରିକେଟ ସିରିଜ ଆୟୋଜନ ହେବାକୁ ଯାଉଛି। ଇଂଲଣ୍ଡ ଓ ଆୟର୍ଲାଣ୍ଡ ମଧ୍ୟରେ ଏହି ସିରିଜ ଗୁରୁବାରଠାରୁ ଆରମ୍ଭ ହେବ। ସିରିଜର ୩ଟି ଯାକ ମ୍ୟାଚ ସାଉଥାମ୍ପଟନର ଏଜେସ ବାଓଲ ଗ୍ରାଉଣ୍ଡରେ ଜୈବ ସୁରକ୍ଷିତ ପରିବେଶରେ ଅନୁଷ୍ଠିତ ହେବ। ଏଥିପାଇଁ ଦୁଇ ଦଳର ଖେଳାଳି ତାଲିକା ଘୋଷିତ ହୋଇସାରିଛି। ଓ୍ବେଷ୍ଟଇଣ୍ଡିଜ ବିପକ୍ଷରେ ଟେଷ୍ଟ ସିରିଜ ଖେଳିଥିବା କୌଣସି ଖେଳାଳି ଇଂଲଣ୍ଡ ଦିନିକିଆ ଦଳରେ ନାହାନ୍ତି। ଇଅନ ମୋର୍ଗାନ ଦଳର ନେତୃତ୍ୱ ନେବେ। ଆଣ୍ଡ୍ର୍ୟୁ ବାଲ୍ବିର୍ନେ ଆୟର୍ଲାଣ୍ଡ ଅଧିନାୟକ ଦାୟିତ୍ୱ ତୁଲାଇବେ। ସିରିଜର ପରବର୍ତ୍ତୀ ୨ଟି ଦିନିକିଆ ଯଥାକ୍ରମେ ଅଗଷ୍ଟ ୧ ଓ ୪ ତାରିଖରେ ଅନୁଷ୍ଠିତ ହେବ।
ଦେଖିଲେ ଇଂଲଣ୍ଡ ଓ ଆୟର୍ଲାଣ୍ଡ ପରସ୍ପରକୁ ୧୦ଟି ମ୍ୟାଚରେ ଭେଟିଛନ୍ତି। ଏଥିରୁ ଇଂଲଣ୍ଡ ୮ଟିରେ ବିଜୟୀ ହୋଇଥିବାବେଳେ ଆୟର୍ଲାଣ୍ଡ ମାତ୍ର ଗୋଟିଏ ମ୍ୟାଚ ଜିତିଛି ଏବଂ ଅନ୍ୟ ମ୍ୟାଚଟି ଫଳାଫଳ ବିହୀନ ରହିଛି। ଇଂଲଣ୍ଡ ବିପକ୍ଷରେ ଆୟର୍ଲାଣ୍ଡର ଏକମାତ୍ର ଦିନିକିଆ ବିଜୟ ୨୦୧୧ ମାର୍ଚ୍ଚ ୨ଟି ବେଙ୍ଗାଲୁରୁଠାରେ ହୋଇଥିଲା। ଆଇସିସି ବିଶ୍ୱକପ ଅନ୍ତର୍ଗତ ଏହି ଦିବାରାତ୍ର ମ୍ୟାଚରେ ଆୟର୍ଲାଣ୍ଡ ୩ ଉଇକେଟରେ ବିଜୟୀ ହୋଇଥିଲା। ଦୁଇ ଦଳ ଶେଷଥରପାଇଁ ୨୦୧୯ ମେ ୩ରେ ଡବଲିନଠାରେ ପରସ୍ପରକୁ ଭେଟିଥିଲେ। ଏଥିରେ ଇଂଲଣ୍ଡ ୪ ଉଇକେଟରେ ବିଜୟୀ ହୋଇଥିଲା।
ଇଂଲଣ୍ଡ ଦଳ: ଇଅନ ମୋର୍ଗାନ(ଅଧିନାୟକ), ମୋଇନ ଅଲୀ, ଜନି ବେୟାରଷ୍ଟୋ, ଟମ୍ ବାଣ୍ଟନ, ସାମ୍ ବିଲିଙ୍ଗ୍ସ, ଟମ୍ କୁରାନ, ଲିଆମ ଡସନ, ଜୋ ଡେନଲି, ଶାକିବ ମେହମୁଦ, ଆଡିଲ ରଶିଦ, ଜାସନ ରୟ, ରିଷି ଟୋପ୍ଲେ, ଜେମ୍ସ ଭିନ୍ସ, ଡେଭିଡ ଓ୍ବିଲି।
ଆୟର୍ଲାଣ୍ଡ ଦଳ: ଆଣ୍ଡ୍ର୍ୟୁ ବାଲ୍ବିର୍ନେ (ଅଧିନାୟକ), କର୍ଟିସ କାମ୍ଫର, ଗ୍ୟାରେଥ ଡିଲାନି, ଜୋଶ ଲିଟଲ, ଆଣ୍ଡ୍ର୍ୟୁ ମ୍ୟାକ୍ବିର୍ନେ ବ୍ୟାରି ମ୍ୟାକାର୍ଥତ୍, କେଭିନ୍ ଓ’ବ୍ରିଏନ୍, ଓ୍ବିଲିୟମ ପୋଟରଫିଲ୍ଡ, ବଏଡ୍ ରାଙ୍କିନ୍, ସିମି ସିଂ, ପଲ୍ ଷ୍ଟିର୍ଲିଂ, ହ୍ୟାରି ଟେକ୍ଟର, ଲୋରକାନ ଟକର, କ୍ରେଗ୍ ୟଙ୍ଗ।
ଭାରତୀୟ ସମୟ: ଅପରାହ୍ନ ୬ଟା ୩୦
ପ୍ରସାରଣ: ସୋନି ସିକ୍ସ
