ଭୁବନେଶ୍ୱର୧୮।୯,(ବ୍ୟୁରୋ): ରାଜ୍ୟରେ ଟିକାକରଣକୁ ତ୍ୱରାନ୍ବିତ କରାଯାଇଛି। ଦିନକୁ ୩ଲକ୍ଷରୁ ଊର୍ଦ୍ଧ୍ୱ ଡୋଜ୍ ଟିକା ଦିଆଯାଉଛି। ଫଳରେ ଶୁକ୍ରବାର ଟିକାକରଣରେ ଆଉଏକ ମାଇଲଖୁଣ୍ଟ ଅତିକ୍ରମ କରିଛି ଓଡ଼ିଶା। ୨କୋଟିରୁ ଊର୍ଦ୍ଧ୍ୱ ଲୋକ ପ୍ରଥମ ଡୋଜ୍ ନେଇସାରିଥିବା ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଟୁଇଟ୍ କରି ସୂଚନା ଦେଇଛି। ସ୍ବାସ୍ଥ୍ୟକର୍ମୀଙ୍କ କଠିନ ପରିଶ୍ରମ ଓ ଲୋକଙ୍କ ସହଯୋଗ ଯୋଗୁ ଏହି ସଫଳତା ମିଳିଛି ବୋଲି ବିଭାଗ କହିଛି। କୋଓ୍ବିନ ପୋର୍ଟାଲ ତଥ୍ୟାନୁସାରେ, ଓଡ଼ିଶାରେ ଏଯାଏ ୨,୭୦,୨୨,୫୦୪ ଡୋଜ୍ ଟିକାକରଣ ହୋଇଛି। ୨,୦୦,୮୬,୯୨୮ଜଣ ହିତାଧିକାରୀ ପ୍ରଥମ ଡୋଜ୍ ଟିକା ନେଇଥିବାବେଳେ ପାଖାପାଖି ୭୦ଲକ୍ଷ ହିତାଧିକାରୀ ଦୁଇ ଡୋଜ୍ ସମ୍ପୂର୍ଣ୍ଣ କରିଛନ୍ତି। ବର୍ତ୍ତମାନ ରାଜ୍ୟର ୧,୬୧୪ କେନ୍ଦ୍ରରେ ଟିକା ଦିଆଯାଉଛି। ସେଥିମଧ୍ୟରେ ରାଜ୍ୟ ସରକାରଙ୍କ ଦ୍ୱାରା ୧,୫୭୬ ଟିକା କେନ୍ଦ୍ର ରହିଥିବାବେଳେ ୩୮ ଘରୋଇ ଟିକାକରଣ କେନ୍ଦ୍ର ଚାଲୁଛି।
ତେବେ ଦ୍ୱିତୀୟ ଡୋଜ୍ ଟିକାକରଣ କମ୍ ହୋଇଥିବାରୁ ସ୍ବାସ୍ଥ୍ୟ ବିଶେଷଜ୍ଞମାନେ ଉଦ୍ବେଗ ପ୍ରକାଶ କରିଛନ୍ତି। ସ୍ବାସ୍ଥ୍ୟ ନିର୍ଦ୍ଦେଶକ ଡା. ବିଜୟ ମହାପାତ୍ର କହିଛନ୍ତି, ରାଜ୍ୟରେ ଏବେ ଟିକାର ଅଭାବ ନାହିଁ। ହେଲେ ପ୍ରଥମ ଡୋଜ୍ ନେବା ପରେ ଆଉ ଦ୍ୱିତୀୟ ଡୋଜ୍ ନେବାକୁ ଲୋକେ ଭୁଲିଯାଉଛନ୍ତି। ରାଜ୍ୟରେ ୬୪% ଲୋକ ପ୍ରଥମ ଡୋଜ୍ ନେଇ ସାରିଥିବାବେଳେ ମାତ୍ର ୨୮ ପ୍ରତିଶତ ଲୋକ ଦ୍ୱିତୀୟ ଡୋଜ୍ ନେଇଛନ୍ତି। ତେଣୁ ୨ୟ ଡୋଜ୍ ନେଇ ନ ଥିବା ଲୋକଙ୍କ ତାଲିକା ଜିଲା ସ୍ତରରେ ପ୍ରକାଶ କରାଯିବ। ଭୁବନେଶ୍ୱର ଓ ଗଞ୍ଜାମରେ କେବଳ କୋଭାକ୍ସିନ ଟିକା ଦିଆଯାଉଥିବାବେଳେ ରାଜ୍ୟର ଅନ୍ୟସବୁ ଜିଲାରେ କୋଭିଶିଲ୍ଡ ଦିଆଯାଉଛି। କୋଭାକ୍ସିନର ପ୍ରଥମ ଓ ଦ୍ୱିତୀୟ ଡୋଜ୍ ମଧ୍ୟରେ ୧ ମାସ ଅନ୍ତର ରହୁଥିବାବେଳେ କୋଭିଶିଲ୍ଡରେ ୧୨ରୁ ୧୬ ସପ୍ତାହ ରହୁଛି। ଫଳରେ କୋଭାକ୍ସିନଠାରୁ ଅଧିକ ସଂଖ୍ୟକ କୋଭିଶିଲ୍ଡ ହିତାଧିକାରୀ ଦ୍ୱିତୀୟ ଡୋଜ୍ ନେବାକୁ ଭୁଲିଯାଉଛନ୍ତି। ତେଣୁ ସ୍ବାସ୍ଥ୍ୟକର୍ମୀଙ୍କ ଜରିଆରେ ସେମାନଙ୍କୁ କେନ୍ଦ୍ରକୁ ଆଣି ଟିକା ଦେବା ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି। ଆହୁରି ମଧ୍ୟ ସେ କହିଛନ୍ତି, ଦ୍ୱିତୀୟ ଡୋଜ୍ ନେବାର ୩ଦିନ ପୂର୍ବରୁ ସେମାନଙ୍କୁ ମେସେଜ ଯାଉଛି। ଏଥିସହ ଟିକା ପାଇଁ ନିର୍ଦ୍ଧାରିତ ଦିନ ବି ମେସେଜ ଯାଉଛି। ଏହାପରେ ବି ନ ଆସିଲେ ସେମାନଙ୍କ ନିକଟକୁ ବାରମ୍ବାର ମେସେଜ ଯାଉଛି। ଏହାସତ୍ତ୍ୱେ ଯେଉଁ ଅନୁପାତରେ ଲୋକେ ପ୍ରଥମ ଡୋଜ୍ ନେବାକୁ ଆସୁଛନ୍ତି, ସେହି ଅନୁସାରେ ଦ୍ୱିତୀୟ ଡୋଜ୍ ନେବାକୁ ଆସୁନାହାନ୍ତି। ଚଳିତବର୍ଷ ଶେଷ ସୁଦ୍ଧା ଅତିକମ୍ରେ ସମସ୍ତଙ୍କୁ ପ୍ରଥମ ଡୋଜ୍ ଦିଆଯିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଏଥିନିମନ୍ତେ ବ୍ୟାପକ ସଚେତନ କରାଯିବ ବୋଲି ଡାକ୍ତର ମହାପାତ୍ର କହିଛନ୍ତି।
