ଓ୍ବାଶିଂଟନ,୩୧।୭: କାଲିଫର୍ନିଆର ନେଭାଲ ଏୟାର ଷ୍ଟେଶନ ଲେମୁର୍ ନିକଟରେ ବୁଧବାର ଏକ ଆମେରିକୀୟ ଯୁଦ୍ଧ ବିମାନ F-35 ଦୁର୍ଘଟଣାଗ୍ରସ୍ତ ହୋଇଛି। ଜେଟ ଦୁର୍ଘଟଣାଗ୍ରସ୍ତ ହେବା ପରେ ତୁରନ୍ତ ଏଥିରେ ନିଆଁ ଲାଗିଗଲା ଏବଂ ଆକାଶରେ ଧୂଆଁ ଉଠିବାକୁ ଲାଗିଲା। ଏହି ଘଟଣାର ଭିଡିଓ ସୋସିଆଲ ମିଡିଆରେ ଶେୟାର କରାଯାଇଛି। CNN ରିପୋର୍ଟ ଅନୁଯାୟୀ, ଆମେରିକା ନୌସେନା ଏକ ପ୍ରେସ ବିବୃତ୍ତି ମାଧ୍ୟମରେ ଘଟଣା ବିଷୟରେ ସୂଚନା ଦେଇଛି। ଦୁର୍ଘଟଣା କାହିଁକି ଘଟିଲା ସେ ବିଷୟରେ ସୂଚନା ଏପର୍ଯ୍ୟନ୍ତ ଉପଲବ୍ଧ ନାହିଁ।
ଆମେରିକା ନୌସେନାର କାଲିଫର୍ନିଆର ଲେମୁର୍ ନିକଟରେ ଏକ ମାଷ୍ଟର ଷ୍ଟ୍ରାଇକ ଫାଇଟର ବେସ ଅଛି। F-35C ଏବଂ F/A-18E/F ଜେଟ ମଧ୍ୟ ଏଠାରେ ନିୟୋଜିତ କରାଯାଇଛି। ବୁଧବାର ସାରେ ଏହି ବେସ ନିକଟରେ ଯୁଦ୍ଧ ବିମାନ F-35 ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣା ପରେ ତୁରନ୍ତ ଅଗ୍ନିଶମ ବାହିନୀ ଗାଡ଼ିଗୁଡ଼ିକ ଘଟଣାସ୍ଥଳରେ ପହଞ୍ଚିଥିଲା। ନୌସେନା କହିଛି ଯେ F-35 ଲଢ଼ୁଆ ବିମାନଟି ଷ୍ଟ୍ରାଇକ ଫାଇଟର ସ୍କ୍ବାଡ୍ରନ VF-125 କୁ ନିୟୋଜିତ କରାଯାଇଥିଲା, ଯାହାକୁ ‘ରଫ ରାଇଡର୍ସ’ ମଧ୍ୟ କୁହାଯାଏ। VF-125 ହେଉଛି ଏକ ଫ୍ଲିଟ ରିପ୍ଲେସମେଣ୍ଟ ସ୍କ୍ବାଡ୍ରନ, ଯାହା ପାଇଲଟ ଏବଂ ଏୟାରକ୍ରୁମାନଙ୍କୁ ତାଲିମ ଦିଏ।
