ସମ୍ବଲପୁର,୨୭।୧୧(ବ୍ୟୁରୋ): ସମ୍ବଲପୁର ଜିଲା ଯୁଯୁମୁରା ବ୍ଲକ ପଡିଆବାହାଳ ଜୟଦୁର୍ଗା କୃଷକ କ୍ଲବ ବିଭିନ୍ନ ଦାବି ପୂରଣ ପାଇଁ ଅଭିନବ ପ୍ରତିବାଦ କରିଛି। କ୍ଲବ କର୍ମକର୍ତ୍ତା ଶୁକ୍ରବାର ଖଲିଆପାଲି ନିୟନ୍ତ୍ରିତ ବଜାର କମିଟି ପ୍ରାଙ୍ଗଣରୁ ପ୍ରାୟ ୨୨ କି.ମି. ପଦଯାତ୍ରା କରି ଜିଲାପାଳଙ୍କ ଅଫିସ ଆଗରେ ପହଞ୍ଚତ୍ଥିଲେ। ସେଠାରେ ବିକ୍ଷୋଭ ପ୍ରଦର୍ଶନ ସହ ବିଭିନ୍ନ ଦାବି ଉଠାଇ ନାରାବାଜି କରିଥିଲେ। ସେମାନଙ୍କ ପ୍ରମୁଖ ଦାବି ମଧ୍ୟରେ ଶୀତଳ ଭଣ୍ଡାର ବ୍ୟବସ୍ଥା, ଟୋକନ ବ୍ୟବସ୍ଥା, ଫସଲ କ୍ଷୟକ୍ଷତି ଆକଳନ କରି କ୍ଷତିପୂରଣ ଦେବା, ଇନ୍ପୁଟ ସବ୍ସିଡି ପ୍ରଦାନ, ଇ ପରିବହନ ବ୍ୟବସ୍ଥା ବନ୍ଦ କରାଯିବା, କୃଷିଋଣ ଛାଡ କରିବା, ବନ୍ୟପ୍ରାଣୀ ନଷ୍ଟ କରୁଥିବା ଫସଳର ଶୀଘ୍ର କ୍ଷତିପୂରଣ ଦେବା, ଚାଷୀମାନଙ୍କ ପାଇଁ ବୁର୍ଲା ଭିମସାରରେ ସ୍ବତନ୍ତ୍ର ଅଇସିୟୁ ବ୍ୟବସ୍ଥା ଅନ୍ୟତମ। ଜିଲାପାଳଙ୍କ ଅଫିସ ଭିତରକୁ ଯିବା ସମୟରେ ପୋଲିସ ଅଟକାଇଥିଲା। ସ୍ବତନ୍ତ୍ର ଭୂଅର୍ଜନ ଅଧିକାରୀ ସରାଜ ମିଶ୍ର ଦାବିପତ୍ର ନେବାକୁ ଆସିଥିଲେ ମଧ୍ୟ ଚାଷୀମାନେ ୨୨କି.ମି. ଚାଲି ଚାଲି ଆସିଛୁ, ଜିଲାପାଳଙ୍କୁ ଭେଟି ଦାବିପତ୍ର ଦେବାକୁ ଜିଦ୍ କରିଥିଲେ। ଅନୁମତି ଦିଆଯିବା ପରେ ଏକ ପ୍ରତିନିଧି ଦଳ ଜିଲାପାଳ ଶୁଭମ୍ ସକସେନାଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଅଗାମୀ ଦିନରେ ଦାବି ପୂରଣ ନ ହେଲେ ପୁଣି ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି। ଚଳିତବର୍ଷ ଅଣ ଜଳସେଚିତ ଜମିରେ ଫସଲ ନଷ୍ଟ ହୋଇଥିବାରୁ ମରୁଡି ଅଞ୍ଚଳ ଘୋଷଣା କରାଯାଉ ବୋଲି ଦାବି କରିଥିଲେ। କ୍ଲବ ସଭାପତି ମୃତ୍ୟୁଞ୍ଜୟ ପାଣିଗ୍ରାହୀ, ନନ୍ଦ କିଶୋର ସାହୁ, କପିଲ ପ୍ରଧାନ, ଅମୂଲ୍ୟ କୁମାର ପୂଜାରୀ, ଦିଲୀପ କୁମାର ମିର୍ଦ୍ଧା, ରୁଦ୍ର ପ୍ରସନ୍ନ ବଡପଣ୍ଡା, ଝସକେତନ ପଣ୍ଡା ପ୍ରମୁଖ ଉପସ୍ଥିତ ଥିଲେ।
