ଚିକିଟି,୩୦।୧୨(ଡି.ଏନ୍.ଏ.): ଗଞ୍ଜାମ ଜିଲା ଚିକିଟି ବ୍ଲକର ବିଭିନ୍ନ ଗ୍ରାମାଞ୍ଚଳରେ ଗତ କିଛିଦିନ ହେଲା ହାତୀପଲ ଉପଦ୍ରବ ଚଳାଇଛନ୍ତି। ୧୫ ଦିନ ତଳେ ବ୍ଲକ୍ ଅନ୍ତର୍ଗତ ଗୋବିନ୍ଦନଗର, ପିତାତଳି, ରାମଚନ୍ଦପୁର ପଞ୍ଚାୟତର ବିଭିନ୍ନ ଗ୍ରାମାଞ୍ଚଳରେ ହାତୀପଲ ପଶି ଧାନଫସଲ ସମେତ ପାନବରଜ ଆଦି ନଷ୍ଟ କରିଥିଲେ। ବନବିଭାଗ ପକ୍ଷରୁ ହାତୀପଲଙ୍କୁ ଘଉଡ଼ାଇ ଦିଆଯାଇଥିଲା। ତେବେ ସେଠାରୁ ହାତୀପଲ ଜାତୀୟ ରାଜପଥ ଅତିକ୍ରମ କରି ଓଡ଼ିଶା-ଆନ୍ଧ୍ର ସୀମାନ୍ତ ଇନ୍ଦପୁର, ଅନନ୍ତରାୟପୁର ଓ ପାତିସୁନୁପୁର ଦେଇ ସମୁଦ୍ର କୂଳେ କୂଳେ ବ୍ରହ୍ମପୁର ବନାଞ୍ଚଳକୁ ଆସିଥିଲେ। ସୋମବାର ରାତିରେ ହାତୀପଲ ସୋରଳ ନିକଟ ବାହୁଦା ନଦୀରେ ପଶି ମାଛଘେରି ନଷ୍ଟ କରିଛନ୍ତି। ମତ୍ସ୍ୟଜୀବୀ ଓ ଗ୍ରାମବାସୀ ସେମାନଙ୍କୁ ଘଉଡାଇ ଥିଲେ। ମାତ୍ର ଗୋଟିଏ ଛୁଆହାତୀ ପାଣିରେ ଫସି ରହିଥିଲା। ଛୁଆହାତୀକୁ ଲୋକେ ଉଦ୍ଧାର କରି କିଛି ଦୂରରେ ଥିବା ହାତୀପଲ ନିକଟକୁ ଘଉଡାଇଥିଲେ। ତେବେ ହାତୀମାନେ ତାକୁ ପଲରେ ମିଶାଇ ନ ଥିବା ଜଣାପଡ଼ିଛି। ଖବରପାଇ ବ୍ରହ୍ମପୁର ବନଖଣ୍ଡ ଅଧିକାରୀ ଅମ୍ଳାନ ନାୟକଙ୍କ ନେତୃତ୍ୱରେ ୪୦ରୁ ଊର୍ଦ୍ଧ୍ୱ କର୍ମଚାରୀ ଘଟଣାସ୍ଥଳରେ ପହଞ୍ଚି ହାତୀପଲ ଗତିବିଧି ଉପରେ ନଜର ରଖିଛନ୍ତି। ବନଖଣ୍ଡ ଅଧିକାରୀ କହିଛନ୍ତି, ହାତୀପଲ ଭଞ୍ଜନଗର ନିକଟସ୍ଥ ଘୁମୁସର ଜଙ୍ଗଲରେ ବର୍ଷସାରା ରହୁଛନ୍ତି। ଖାଦ୍ୟ ଅନ୍ବେଷଣରେ ଏହି ଅଞ୍ଚଳକୁ ଆସିଯାଇଛନ୍ତି। ଚାଷୀଙ୍କ କ୍ଷତି ଆକଳନ କରି କ୍ଷତିପୂରଣ ପ୍ରଦାନ ପାଇଁ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଯିବ ବୋଲି ସେ କହିଛନ୍ତି।
