କେନ୍ଦ୍ରାପଡା ଅଫିସ, ୨୪।୧୧: ଆଳୁ ଖୋଳୁ ଖୋଳୁ ମହାଦେବ ବାହାରିଲା ପରି କେନ୍ଦ୍ରାପଡ଼ା ଜିଲା ମହାକାଳପଡ଼ା ତହସିଲ ଅଞ୍ଚଳର ଜମି ଜାଲିଆତି ଘଟଣା ବାହାରକୁ ଆସିଛି। ଗୋଟିଏ ପରିବାରର ୪ଟି ଜାତି ମାମଲାର ତଦନ୍ତ ସମୟରେ ଏହି ତଥ୍ୟ ଜଣାପଡ଼ିଛି। କୁଜଙ୍ଗ ରାଜାଙ୍କ ହାତପଟ୍ଟା ବଳରେ ମହାକାଳପଡା ଅଞ୍ଚଳର କେତେକ ସମ୍ପତ୍ତି ହଡ଼ପ ପଛରେ କେବଳ ସରକାରୀ କର୍ମଚାରୀ ନୁହନ୍ତି, ଏହା ପଛରେ ଏକ ର଼୍ୟାକେଟ କାମ କରୁଛି। ଏହି ର଼୍ୟାକେଟର ସଦସ୍ୟମାନେ ୧୯୫୬ ପୂର୍ବର କୁଜଙ୍ଗ ରାଜାଙ୍କ ହାତପଟ୍ଟା କହି ଡିଟିପିରେ ହାତପଟ୍ଟା ଦେଉଛନ୍ତି। ଏହାକୁ ତହସିଲ କର୍ମଚାରୀ ସ୍ବୀକୃତି ଦେଇ ଜମି ସ୍ବତ୍ୱ ପ୍ରଦାନ କରୁଛନ୍ତି। ଏହି ଜାଲିଆତି ପ୍ରଘଟ ହୋଇଥିବାବେଳେ ମହାକାଳପଡ଼ା ତହସିଲଦାର ସୌଭାଗ୍ୟ ରଞ୍ଜନ ପଣ୍ଡା ଆସନ୍ତା ୨୫ ତାରିଖରେ ରାମନଗର ଆର୍ଆଇ ଅଫିସ୍ରେ ଜାତିଗତ ପ୍ରମାଣପତ୍ର ସମ୍ପର୍କରେ ତଥ୍ୟ ଉପସ୍ଥାପନ ପାଇଁ ସମ୍ପୃକ୍ତ ପରିବାର ସଦସ୍ୟଙ୍କୁ ନୋଟିସ କରିଛନ୍ତି।
ସୂଚନାନୁଯାୟୀ, ମହାକାଳପଡ଼ା ତହସିଲ ଜମ୍ବୁ ଥାନାଞ୍ଚଳର ଏକ ପରିବାର ସଦସ୍ୟ ମାହେଶ, ପ୍ରଧାନ, ଯୋଗୀ ଓ ନମଶୂଦ୍ର ଜାତି ଦେଖାଇ ସ୍ଥାନୀୟ କେତେକ ଜମି କିଣିଛନ୍ତି। ଏହି ଜମି ଖର୍ଦ୍ଦି କବଲା ବଳରେ ଜାତି ପ୍ରମାଣପତ୍ର ନେଇ ସରକାରୀ ସୁବିଧା ହାସଲ କରିଛନ୍ତି। ପରିବାରର ୪ଟି ଜାତି ଥିବା ନେଇ ସନ୍ଦେହ ପରେ ସୂଚନା ଅଧିକାର କର୍ମୀ ଅମିତାଭ ଚାନ୍ଦ ଜିଲା ଓ ବ୍ଲକସ୍ତରର ବିଭିନ୍ନ କାର୍ଯ୍ୟାଳୟର ତଥ୍ୟ ସୂଚନା ଆଇନ ଅଧିକାର ବଳରେ ହାସଲ କରିଥିଲେ। ଏଥିସହିତ ଉଚ୍ଚ ନ୍ୟାୟାଳୟରେ ଏନେଇ ଏକ ଜନସ୍ବାର୍ଥ ମାମଲା (ଡବ୍ଲ୍ୟୁପିସି ନଂ. ୨୦୬୧୯/୧୬) କରିଥିଲେ। ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ପରେ ଆର୍ଡିସିଙ୍କ ପକ୍ଷରୁ ସ୍ଥାନୀୟ ଜିଲା ପ୍ରଶାସନ ଏନେଇ ତଦନ୍ତ କରୁଛି। ତଦନ୍ତ ଅଧିକାରୀ ତଥା କେନ୍ଦ୍ରାପଡ଼ା ଏସ୍ଡିପିଓ ରାଜୀବ ଲୋଚନ ପଣ୍ଡା ଏସ୍ପିଙ୍କୁ ୨୦୧୯ ମାର୍ଚ୍ଚ ୨୯ରେ ଦେଇଥିବା ରିପୋର୍ଟ ଅନୁଯାୟୀ, ଏହି ପରିବାର ବାଂଲାଦେଶରୁ ଆସିଥିବାବେଳେ ସେମାନଙ୍କ ଜାତି ଯୋଗୀ। ଏହି ଜାତି ଓବିସି ଅଧୀନ। ତେବେ ସ୍ଥାନୀୟ ଅଞ୍ଚଳର ଜମି ହାତେଇବା ଓ ସରକାରୀ ସୁବିଧା ପାଇଁ ବିଭିନ୍ନ ସମୟରେ ମାହେଶ, ପ୍ରଧାନ ଓ ଅନୁସୂଚିତ ଜାତି ଲିଷ୍ଟରେ ଥିବା ନମଶୂଦ୍ର ଜାତି ବୋଲି ଉଲ୍ଲେଖ କରିଛନ୍ତି। ଅପରପକ୍ଷରେ ଏହି ମାମଲା ତଦନ୍ତ ସମୟରେ କୁଜଙ୍ଗ ହାତପଟ୍ଟାକୁ ନେଇ ଏକ ଅଡିଓ ଭାଇରାଲ ହୋଇଛି। ଅଡିଓରେ ଜଣେ ପେସାରେ ଓକିଲ ଥିବା ବ୍ୟକ୍ତି ଟଙ୍କା ଖର୍ଚ୍ଚ କଲେ ହାତପଟ୍ଟା ମିଳିବ ବୋଲି କହୁଛନ୍ତି। ଏ ସମ୍ପର୍କରେ ତହସିଲଦାର ସୌଭାଗ୍ୟ ରଞ୍ଜନ ପଣ୍ଡା କହିଛନ୍ତି, ଆସନ୍ତା ୨୫ ତାରିଖରେ ସମ୍ପୃକ୍ତ ପରିବାରର ଜାତି ପ୍ରମାଣପତ୍ରର ଯାଞ୍ଚ ହେବ। ଏହି ସମୟରେ ହାତପଟ୍ଟାକୁ ନେଇ କୌଣସି ଜାଲିଆତି ଥିଲେ ଆର୍ଡିସିଙ୍କୁ କାର୍ଯ୍ୟାନୁଷ୍ଠାନ ପାଇଁ ରିପୋର୍ଟ ଦିଆଯିବ। ସୂଚନାଯୋଗ୍ୟ, ଏପରି ହାତପଟ୍ଟା ବଳରେ ମହାକାଳପଡ଼ା ତହସିଲ ଅଞ୍ଚଳରେ ୪ ହଜାରରୁ ଅଧିକ ଏକର ଜମି କେତେକ ବାଂଲାଦେଶୀ ଅନୁପ୍ରବେଶକାରୀ ହାତେଇଥିବା ବାରମ୍ବାର ଅଭିଯୋଗ ହୋଇଆସୁଛି।
