ଅନୁଗୋଳ ଅଫିସ, ୧୫ା୧୧: ନହୁରାଣୀ ପୋଲ ଏବେ ଚଳଚଞ୍ଚଳ। ଆନୁଷ୍ଠାନିକ ଭାବେ ଉଦ୍ଘାଟନ ହୋଇ ନ ଥିଲେ ମଧ୍ୟ ବ୍ରିଜ୍ ଦେଇ ଚଳାଚଳ କରୁଛି ଦୈନିକ ଶତାଧିକ ଗାଡ଼ି। ସମ୍ବଲପୁର ଜିଲା ନାକଟିଦେଉଳ ବ୍ଲକ ଅନ୍ତର୍ଗତ ବୁଢ଼ାନାଳୀ ଗ୍ରାମ ସହିତ ଅନୁଗୋଳ ଜିଲାର ଛେଣ୍ଡିପଦା ବ୍ଲକକୁ ଯାତାୟାତ ସୁଗମ ହୋଇଥିବାବେଳେ ଉଜାଗର ହୋଇଛି ଭଉଣୀ ଆଦ୍ୟାଶା ପ୍ରିୟଦର୍ଶନୀ ରାଉତ ଏବଂ ଭାଇ ଆୟୁଷ ରଞ୍ଜନଙ୍କ ପୋଲ ପାଇଁ ସଂଘର୍ଷର କାହାଣୀ। ଆଦ୍ୟାଶା, ଆୟୁଷଙ୍କ ନିରନ୍ତର ଉଦ୍ୟମ ଏବଂ ରାଜ୍ୟ ସରକାରଙ୍କ ସହାୟତାରେ ପୋଲ ନିର୍ମାଣ ବାସ୍ତବ ରୂପ ନେଇଥିବାବେଳେ ଭଉଣୀଭାଇଙ୍କ ପାଖକୁ ଛୁଟୁଛି ପ୍ରଶଂସାର ସୁଅ।
ସମ୍ବଲପୁର ଜିଲାର ନାକଟିଦେଉଳ ବ୍ଲକ ଅନ୍ତର୍ଗତ ବୁଢ଼ାନାଳୀ ଅଞ୍ଚଳବାସୀ ଜୀବନଜୀବିକା, ଶିକ୍ଷା, ସ୍ବାସ୍ଥ୍ୟ ଭଳି ମୌଳିକ ଆବଶ୍ୟକତା ପାଇଁ ଅନୁଗୋଳ ଜିଲାର ଛେଣ୍ଡିପଦା ବ୍ଲକ ଉପରେ ନିର୍ଭର କରିଥାଆନ୍ତି। ତେବେ ନହୁରାଣୀ ନାଳ ଉଭୟ ଅଞ୍ଚଳବାସୀଙ୍କ ମଧ୍ୟରେ ସାଜିଥିଲା ମୁଖ୍ୟ ପ୍ରତିବନ୍ଧକ। ବର୍ଷାଦିନେ ନାଳ ଫୁଲିରେ ଯାତାୟାତ ବିଚ୍ଛିନ୍ନ ହୋଇପଡୁଥିଲା। ଛେଣ୍ଡିପଦା ବ୍ଲକର ବିଦ୍ୟାଳୟରେ ପଢୁଥିବା ଆଦ୍ୟାଶା ଏବଂ ଆୟୁଷ ସମସ୍ୟାରେ ପଡୁଥିଲେ। ସମସ୍ୟା ସମ୍ପର୍କରେ ଦୁହେଁ ୨୦୧୩ରେ ପତ୍ର ମାଧ୍ୟମରେ ପ୍ରଥମେ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ପୋଲ ନିର୍ମାଣ ପାଇଁ ପତ୍ର ଆସିଥିଲା। ଚିଠି ପାଇବା ପରେ ପ୍ରଶାସନ ତପତ୍ରତା ଦେଖାଇଥିଲା। ହେଲେ ସୀମା ବିବାଦ ଉପୁଜିବା ପରେ ପ୍ରସ୍ତାବିତ ପୋଲର ଭବିଷ୍ୟତ ଅନ୍ଧକାର ଆଡ଼କୁ ଠେଲି ହୋଇଯାଇଥିଲା। ପୋଲ ନିର୍ମାଣ ବିଳମ୍ବିତ ହେବା ପରେ ୨୦୧୪ ଅଗଷ୍ଟରେ ପୁନର୍ବାର ଦୁହେଁ ରାଜ୍ୟପାଳଙ୍କୁ ପତ୍ର ଦେଇଥିଲେ। ଉକ୍ତ ଚିଠିର ଉତ୍ତର ଆସିଥିଲେ ମଧ୍ୟ ପୂର୍ବ ବିବାଦ କାରଣରୁ ରାସ୍ତା କି ପୋଲ ନିର୍ମାଣ ହୋଇପାରି ନ ଥିଲା। ଏହାପରେ ସେମାନେ ଓଡ଼ିଶା ମାନବାଧିକାର କମିଶନଙ୍କ ଦ୍ୱାରସ୍ଥ ହୋଇଥିଲେ। ତଥାପି କୌଣସି ସୁଫଳ ମିଳି ନ ଥିଲା। ସବୁଆଡୁ ନିରାଶ ହେବା ପରେ ଆଦ୍ୟାଶା ଏବଂ ଆୟୁଷ ୨୦୧୬ ଜୁଲାଇରେ ପ୍ରଧାନମନ୍ତ୍ରୀଙ୍କ ନିକଟକୁ ପତ୍ର ଲେଖ ଚର୍ଚ୍ଚାକୁ ଆସିଥିଲେ। ପୋଲ ନିର୍ମାଣ ନେଇ ପଦକ୍ଷେପ ନେବାକୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଓଡ଼ିଶାର ତତ୍କାଳୀନ ମୁଖ୍ୟ ଶାସନ ସଚିବଙ୍କ ନିକଟକୁ ଚିଠି ଆସିଥିଲା। ଆପୋସ ବୁଝାମଣା ମାଧ୍ୟମରେ ସମାଧାନର ସୂତ୍ର ବାହାର କରିବାକୁ ତତ୍କାଳୀନ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେବା ପରେ ଉଭୟ ପୋଲ ଏବଂ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଦୀର୍ଘ ୮ବର୍ଷର ସଂଘର୍ଷ ସଫଳ ରୂପ ନେଇଥିବାରୁ ଭଉଣୀଭାଇ ବେଶ୍ ଖୁସି ଅଛନ୍ତି। ଅନ୍ୟପଟେ ଖୁବ୍ଶୀଘ୍ର ବ୍ରିଜ୍ ଲୋକାର୍ପଣ ହେବ ବୋଲି ଜିଲା ପ୍ରଶାସନର ଜଣେ ବରିଷ୍ଠ ଅଧିକାରୀ କହିଛନ୍ତି।
