ଜଗତ୍ସିଂହପୁର ଅଫିସ,୨୭ା୫: ନିୟମ ରହିଛି ପ୍ରାକୃତିକ ନାଳ କିମ୍ବା ଡ୍ରେନ୍ ରୋକାଯାଇ ପାରିବନାହିଁ। ଏହାର ଗତି ବଦଳାଯିବନି। କେହି ଜବରଦଖଲ କଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ। କୋର୍ଟଙ୍କ ଏହି ନିର୍ଦ୍ଦେଶ ପାଳନ କରିବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଅଛି। ଏନେଇ ରାଜ୍ୟ ସରକାର ତଥା ନଗର ଉନ୍ନୟନ ବିଭାଗ ପକ୍ଷରୁ ମଧ୍ୟ ବିଭିନ୍ନ ସମୟରେ ରାଜ୍ୟର ସମସ୍ତ ପୌର ପରିଷଦ, ମ୍ୟୁନିସିପାଲିଟିକୁ ଏସଂକ୍ରାନ୍ତରେ ଚିଠି କରାଯାଏ। କିନ୍ତୁ ବାସ୍ତବତା କିଛି ନିଆରା। ବର୍ଷାଦିନ ଆସିଲେ ତା’ପୂର୍ବରୁ ଡ୍ରେନ୍ ଓ ନାଳ ସଫେଇ କରାଯାଏ। ସଫେଇ ନାଁରେ ହରିଲୁଟ୍ ଚାଲେ। ପ୍ରତିକାର ହୁଏନାହିଁ। ଜଗତ୍ସିଂହପୁର ସହରରେ ଦୀର୍ଘ ବର୍ଷ ଧରି ଡ୍ରେନ୍ ସମସ୍ୟା ଲାଗି ରହିଛି। ପ୍ରତିବର୍ଷ ମରାମତି ଓ ସଫେଇ ନାଁରେ ପ୍ରଚୁର ଅର୍ଥ ଖର୍ଚ୍ଚ ହେଉଛି। ଜବରଦଖଲ ହଟେଇବା ପାଇଁ ନୋଟିସ୍ ହେଉଥିଲେ ସୁଦ୍ଧା ଉଚ୍ଛେଦ କରାଯାଉନି। ଆଗକୁ ବର୍ଷାଦିନ ଆସୁଥିବାରୁ ଡ୍ରେନ୍ ସମସ୍ୟାକୁ ନେଇ ସହରବାସୀ ଚିନ୍ତିତ ହେବାସହ ଅସନ୍ତୋଷବ୍ୟକ୍ତ କରିଛନ୍ତି।
ଜଗତ୍ସିଂହପୁର ସହରରେ ଥିବା ଡ୍ରେନ୍ଗୁଡିକ ହେଲା ନାଗପୁର, ପାଣିଶାଳିଆ ଓ ମାଧପୁର। ନାଗପୁର ଡେନ୍ ଜଗତ୍ସିଂହପୁରରୁ ନାଗପୁର ପର୍ଯ୍ୟନ୍ତ ଲମ୍ବିଥିବା ବେଳେ ସେଥିରୁ ୩ କିଲୋମିଟର ଜଗତ୍ସିଂହପୁର ପୌରପରିଷଦ ଅଧୀନରେ ଯାଉଛି। ଏହା ଜିଲା ମୁଖ୍ୟ ଚିକିତ୍ସାଳୟ ସମ୍ମୁଖ ରାସ୍ତାର ଅପରପାର୍ଶ୍ୱରୁ ବାହାରି ଟାଉନ ହଲ୍ ଛକ-ସିପି-ଖେରସ ମୌଜାଦେଇ ପୁରୋହିତପୁର ପାଖ ନାଳରେ ପଡ଼ିଛି। ଜଗତ୍ସିଂହପୁର ସହରରେ ଏହି ଡ୍ରେନ୍ର ଓସାର ପାଖାପାଖି ୩୦ ଫୁଟ ହେବ ବୋଲି କୁହାଯାଉଥିବା ବେଳେ ସେଥିରୁ ଅଧିକାଂଶ ଜବରଦଖଲ ହୋଇଯାଇଛି। ଏବେ ଓସାର ମାତ୍ର ୫/୬ ଫୁଟ ଭିତରେ ରହୁଥିବା ସୂଚନା ମିଳିଛି। ସେହିପରି ପାଣିଶାଳିଆ ଡ୍ରେନ୍ର ଦୈର୍ଘ୍ୟ ପାଖାପାଖି ୧.୫ କିଲୋମିଟର ହେବ। ଏହା ସହରରେ ଥିବା ସରକାରୀ ବାଳିକା ଉଚ୍ଚବିଦ୍ୟାଳୟ ନିକଟରୁ ବାହାରି ବସଷ୍ଟାଣ୍ଡ, ଟାଉନ ହଲ୍ ଛକ ଦେଇ ପାଣିଶାଳିଆ ଅମୁହଁାଦଣ୍ଡା ପର୍ଯ୍ୟନ୍ତ ଲମ୍ବିଛି। ଏହି ଡ୍ରେନ୍ ମଧ୍ୟ ଜବରଦଖଲକାରୀଙ୍କ କବ୍ଜାରେ ରହିଛି। ବିଶେଷକରି ବସ୍ଷ୍ଟାଣ୍ଡ, ଟାଉନ ହଲ୍ ଛକ ଆଦି ସ୍ଥାନରେ ଅଧିକ ଜବରଦଖଲ ହୋଇଛି। ମାଧପୁର ଡ୍ରେନ୍ର ଲମ୍ବ ପାଖାପାଖି ୨ କିଲୋମିଟର ହେବ। ଏହି ଡ୍ରେନ୍ର କମ୍ ସ୍ଥାନ ଜବରଦଖଲ ହୋଇଥିଲେ ସୁଦ୍ଧା ଆପାତତଃ ଭଲ ସ୍ଥିତିରେ ଅଛି। ଏସବୁ ଡ୍ରେନ୍ ଦୀର୍ଘ ବର୍ଷ ଧରି ଜବରଦଖଲ ଯୋଗୁ ଜଳ ନିଷ୍କାସନରେ ବାଧା ଉପୁଜିଛି। ନାଗପୁର ଡ୍ରେନ୍ଟି ସବୁଠାରୁ ଅଧିକ ଅବ୍ୟବସ୍ଥିତ ଅବସ୍ଥାରେ ରହିଛି । ଜବରଦଖଲ ସାଙ୍ଗକୁ ବ୍ୟବସାୟୀମାନେ ଏଥିରେ ଅଳିଆଆବର୍ଜନା ପକାଉଥିବାରୁ ଦୁର୍ଗନ୍ଧରେ ନାକ ଫାଟି ପଡୁଛି । ସହରର କେତେଜଣ ପ୍ରଭାବଶାଳୀ ବ୍ୟକ୍ତି ଜବରଦଖଲ କରିଥିବାରୁ ପରିଷଦଠାରୁ ଆରମ୍ଭ କରି ପ୍ରଶାସନ ପର୍ଯ୍ୟନ୍ତ ପଦକ୍ଷେପ ନେବାକୁ ଆଗପଛ ହେଉଛନ୍ତି।
ସମ୍ପର୍କରେ ଜଗତ୍ସିଂହପୁର ପୌରାଧ୍ୟକ୍ଷା ଅର୍ଚ୍ଚନା ସିଂହ କହିଛନ୍ତି, ବାସ୍ତବରେ ଜଗତ୍ସିଂହପୁର ପୌରାଞ୍ଚଳରେ ଡ୍ରେନ୍ ସମସ୍ୟା ଚିନ୍ତାଜନକ। ଜବରଦଖଲ ହେଉଛି ଏକ ମୁଖ୍ୟ ସମସ୍ୟା। ପ୍ରତିବର୍ଷ ବର୍ଷାଦିନ ପୂର୍ବରୁ ପୌର ପରିଷଦ ସଫେଇ କରାଯାଉଛି। ବାସ୍ତବରେ ଡ୍ରେନ୍ ସମସ୍ୟାର ସ୍ଥାୟୀ ପ୍ରତିକାର ଡ୍ରେନେଜ୍ ଡିଭିଜନ୍ କରିବା କଥା। ଯାହା ହେଉନାହିଁ । ତେଣୁ ନିକଟରେ ଜଗତ୍ସିଂହପୁର ଡ୍ରେନେଜ୍ ଡିଭିଜନ୍କୁ ସହରରେ ଥିବା ଡ୍ରେନ୍ଗୁଡିକର ମରାମତି, ସଫେଇ ସମେତ ଜବରଦଖଲ ଉଚ୍ଛେଦ ପାଇଁ ପଦକ୍ଷେପ ନେବାକୁ ଚିଠି କରାଯାଇଥିବା ସିଂହ କହିଛନ୍ତି। ଏଥିସହ ପରିଷଦ ଅଞ୍ଚଳକୁ ୫ଟି ଜୋନରେ ବିଭକ୍ତ କରାଯାଇଛି। ସପ୍ତାହରେ ଗୋଟିଏ ଦିନ ଗୋଟିଏ ଜୋନର ଡ୍ରେନ୍ ଓ ପରିମଳ ସମସ୍ୟାର ସମାଧାନ ପାଇଁ ସମୟ ଦିଆଯିବାକୁ ନିଷ୍ପତ୍ତି ହୋଇଥିବା କହିଛନ୍ତି।
