ବରଗଡ଼,୫।୭(ପ୍ରେମାନନ୍ଦ ଖମାରୀ): ଲଗାଣ ବର୍ଷା ଯୋଗୁ ବରଗଡ଼ ସହରସ୍ଥିତ ସରକାରୀ ବସଷ୍ଟାଣ୍ଡ ସମେତ ବିଭିନ୍ନ ଅଞ୍ଚଳ ଜଳାର୍ଣ୍ଣବ ହୋଇ ପଡ଼ିଥିଲା। ଡ୍ରେନେଜ ଅବ୍ୟବସ୍ଥା ଯୋଗୁ ପ୍ରଥମ ବର୍ଷାରେ ସହରରେ ସେଭଳି ସ୍ଥିତି ଉପୁଜିଥିଲା। ଶନିବାର ସକାଳୁ ଜିଲାପାଳ ଆଦିତ୍ୟ ଗୋୟଲ ସହରର ବିଭିନ୍ନ ସ୍ଥାନ ବୁଲି ଡ୍ରେନେଜ ବ୍ୟବସ୍ଥାର ସ୍ଥିତି ଅନୁଧ୍ୟାନ କରିଥିଲେ। ଏହା ସହିତ ସହରର ସଫେଇ କାର୍ଯ୍ୟର ମଧ୍ୟ ତଦାରଖ କରିଥିଲେ। ସେହିପରି ନିର୍ମାଣାଧୀନ ବିଭିନ୍ନ ଦୋକାନ ଗୃହ ବୁଲି ଦେଖିଥିଲେ। ଅସମ୍ପୁର୍ଣ୍ଣ ଡ୍ରେନେଜ କାମ ଏବଂ ଦୋକାନ ଗୃହ ନିର୍ମାଣ କାମ ସମ୍ପୂର୍ଣ୍ଣ କରିବାକୁ ଜିଲାପାଳ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ସେହିପରି ବର୍ଷାପାଣି ଯେଭଳି ନିଷ୍କାସିତ ହୋଇ ପାରିବ ସେ ଦିଗରେ ପଦକ୍ଷେପ ନେବାକୁ ପୌର ପରିଷଦ କର୍ମଚାରୀଙ୍କୁ ମଧ୍ୟ ଜିଲାପାଳ ଗୋୟଲ ନିର୍ଦ୍ଦେଶ ଦେଇଥିଲେ। ଜିଲାପାଳଙ୍କ ପରିଦର୍ଶନ ସମୟରେ ଜିଲା ପରିଷଦର ମୁଖ୍ୟ କାର୍ଯ୍ୟନିର୍ବାହୀ ଲଲାଲ କୁମାର ଲୁହା ମଧ୍ୟ ଉପସ୍ଥିତ ଥିଲେ।