ପଟ୍ଟାଙ୍ଗି,୧।୫(ଡି.ଏନ୍.ଏ.): ଆନ୍ଧ୍ରପ୍ରଦେଶ ଉପମୁଖ୍ୟମନ୍ତ୍ରୀ ଓଡ଼ିଶା ସୀମାନ୍ତ ଗ୍ରାମ ଗସ୍ତ ପୂର୍ବରୁ କୋରାପୁଟ ଜିଲା ପ୍ରଶାସନ ପକ୍ଷରୁ ମାଟି ପକାଇ ରାସ୍ତା ଅବରୋଧ କରାଯାଇଛି। ଫଳରେ ଗଣମାଧ୍ୟମ ପ୍ରତିନିଧିଙ୍କୁ ସୀମାନ୍ତ ଅଞ୍ଚଳ ଯିବାରେ ସମସ୍ୟା ଉପୁଜିଛି।
ମିଳିଥିବା ସୂଚନା ମୁତାବକ, କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନ ପଡୋଶୀ ଆନ୍ଧ୍ର ରାଜ୍ୟ ସୀମାନ୍ତ କୋଟିଆ ପଞ୍ଚାୟତକୁ ଲାଗି ରହିଥିବା ଫଗୁଣସିନେରି ଓ ଫାଟୁସିନେରି ଦୁଇ ଗାଁକୁ ଆନ୍ଧ୍ର ଉପମୁଖ୍ୟମନ୍ତ୍ରୀ ପିଡିକା ରାଜନା ଦୋରା ପରିଦର୍ଶନରେ ଆସି ରାଜ୍ୟର ସରକାରୀ ଯୋଜନା ସମ୍ପର୍କରେ ବୈଠକ କରି ଗ୍ରାମବାସୀଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। ଏଭଳିସ୍ଥିତିରେ କୋରାପୁଟ ଜିଲା ପ୍ରଶାସନ ପକ୍ଷରୁ ଉକ୍ତ ଦୁଇ ଗାଁ ତଥା କୋଟିଆ ପଞ୍ଚାୟତଠାରୁ ଫଗୁଣସିନେରି ଏବଂ ଫାଟୁସିନେରିକୁ ସଂଯୋଗ କରୁଥିବା ରାସ୍ତାର ମାଡକାର ବ୍ରିଜ୍ ନିକଟ ଦୁଇଟି ସ୍ଥାନରେ ମାଟି ପକାଇ ରାସ୍ତା ଅବରୋଧ କରାଯାଇଛି। ଏପରି କି ଜାନିଗୁଡା ଗ୍ରାମ ନିକଟରେ ପୋଲିସ ଜଗି ରହିଛି।
ଖବର ସଂଗ୍ରହ ପାଇଁ ପଟ୍ଟାଙ୍ଗି ବ୍ଲକର ଗଣମାଧ୍ୟମ ପ୍ରତିନିଧି ଦୁଇ ଗାଁକୁ ଯାଉଥିବା ବେଳେ ଅବରୋଧ କରାଯାଇଥିବା ରାସ୍ତା ନିକଟରୁ ଫେରି ଆସିଛନ୍ତି। ରାସ୍ତା ଅବରୋଧ ସମ୍ପର୍କରେ କୋଟିଆ ଥାନା ଏସ୍ଆଇ ବିଷ୍ଣୁ ପ୍ରସାଦ ଦାସଙ୍କୁ ପଚାରିବାରୁ ମୁଁ କହିପାରିବି ନାହିଁ, ରାସ୍ତା ନିର୍ମାଣ କରୁଥିବା ଠିକାଦାର ଏଭଳି କରିଥିବେ ବୋଲି ପ୍ରକାଶ କରିଛନ୍ତି।
