ଭଞ୍ଜନଗର୨୦ା୩(ଡି.ଏନ୍.ଏ):ଭଞ୍ଜନଗର ସହରାଞ୍ଚଳ ଜନସ୍ବାସ୍ଥ୍ୟ ବିଭାଗର ଅବହେଳା ଯୋଗୁ ସହରବାସୀ ବିଭିନ୍ନ ସମୟରେ ଦୂଷିତ ପାଣି ପିଇବାକୁ ବାଧ୍ୟ ହେଉଛନ୍ତି, ଯାହାକୁ ନେଇ ସହରବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଭେଜିପୁଟ ମହାନ୍ତି ସାହି ଛକ ଦେଇ ଯାଇଥିବା ଜନସ୍ବାସ୍ଥ୍ୟ ବିଭାଗର ପାଣି ପାଇପ୍ ଆଜକୁ ପ୍ରାୟ ୨ମାସ ହେବ ଫାଟି ରହିଛି। ପାଣି ଛଡ଼ା ଯିବା ସମୟରେ ଫଟା ପାଇପ ବାଟେ ପାଣି ଏଣେତେଣେ ବିଛୁରିତ ହୋଇପଡ଼ୁଛି। ପାଇପ୍ ଯେଉଁଠାରେ ଫାଟିଛି ଏନଏସି ସଫେଇ କର୍ମଚାରୀମାନେ ତା’ ଉପରେ ହିଁ ଡ଼୍ରେନରୁ ମଇଳା ବାହାର କରି ପକାଇ ଦେଉଛନ୍ତି। ତୁରନ୍ତ ଉକ୍ତ ମଇଳାକୁ ଟ୍ରାକ୍ଟର ଯୋଗେ ଉଠାଯାଉନଥିବା ଯୋଗୁ ଉକ୍ତ ଫଟା ପାଇପ୍ ବାଟେ ସହରକୁ ଦୁଷିତ ପାଣି ପ୍ରବାହିତ ହେଉଥିବା ଆଶଙ୍କା କରାଯାଉଛି । ଏନେଇ ସମ୍ପୃକ୍ତ ସାହିବାସିନ୍ଦା ବାରମ୍ବାର ଏନଏସି ଏବଂ ଜନସ୍ବାସ୍ଥ୍ୟ ବିଭାଗ ଅଧିକାରୀଙ୍କ ଦୃଷ୍ଟି ଆକର୍ଷଣ କରୁଛନ୍ତି, କିନ୍ତୁ ଉଭୟ ବିଭାଗ ଏନେଇ ଆବଶ୍ୟକ ପଦକ୍ଷେପ ନେଉନାହିଁ । ସେହିଭଳି ଶନିବାର ସକାଳେ ମେଡ଼ିକାଲ ପମ୍ପ୍ ହାଉସରୁ ରେଡ଼କ୍ରସ ରୋଡ଼ ଅଞ୍ଚଳବାସୀଙ୍କ ପାଇଁ ଆଉ ଏକ ନୂଆ ଲାଇନରେ ପାଣି ଛଡ଼ାଯାଇଥିଲା। ଏଥିରେ ତ୍ରୁଟି ଥିବା ଯୋଗୁ ପ୍ରାୟ ୧ଘଣ୍ଟା ପର୍ଯ୍ୟନ୍ତ ରେଡକ୍ରସ ରୋଡ଼ ଅଞ୍ଚଳକୁ ମଇଳା ପାଣି ଆସିଥିଲା। ମଇଳା ପାଣି ଦେଖି ସହରବାସୀଙ୍କ ମଧ୍ୟରେ ଘୋର ଅସନ୍ତୋଷ ପ୍ରକାଶ ପାଇଥିଲା। ପରେ ଜନସ୍ବାସ୍ଥ୍ୟ ବିଭାଗ ଅଧିକାରୀ ପହଞ୍ଚତ୍ ସୁଧାରିବା ପରେ ସଫା ପାଣି ଆସିଥିଲା। ଦୂଷିତ ପାଣି ସୋସିଆଲ ମିଡ଼ିଆରେ ଭାଇରାଲ ହୋଇଥିଲା। ମହାନ୍ତି ସାହି ବାସିନ୍ଦା ପ୍ରେମଜିତ୍ ପଟ୍ଟନାୟକ କହିଛନ୍ତି, ପାଇପ୍ ମରାମତି ପାଇଁ ଜନସ୍ବାସ୍ଥ୍ୟ ବିଭାଗ ଅଧିକାରୀଙ୍କୁ ବାରମ୍ବାର ଅନୁରୋଧ କରାଯାଇଛି। କିନ୍ତୁ ଉକ୍ତ ଅଧିକାରୀ ଏଥିପ୍ରତି ଦୃଷ୍ଟି ଦେଉନାହାନ୍ତି। ସହରବାସୀଙ୍କ ଜୀବନ ସହ ଖେଳୁଛନ୍ତି ଜନସ୍ବାସ୍ଥ୍ୟ ବିଭାଗ । ସେହିଭଳି ଫଟା ପାଇପ୍ ଉପରେ ଡ଼୍ରେନର ମଇଳା ନପକାଇବା ପାଇଁ ଏନଏସି କର୍ମଚାରୀଙ୍କୁ ମଧ୍ୟ ଅନୁରୋଧ କରାଯାଉଛି। କିନ୍ତୁ ସେମାନେ ମଧ୍ୟ ଦୃଷ୍ଟି ଦେଉନାହାନ୍ତି । ସମସ୍ୟାର ସମାଧାନ ତୁରନ୍ତ ନହେଲେ ବାଧ୍ୟହୋଇ ସାହିବାସିନ୍ଦା ଆନ୍ଦୋଳନକୁ ଓହ୍ଲାଇବେ ବୋଲି ପ୍ରେମଜିତ୍ କହିଛନ୍ତିା ଜନସ୍ବାସ୍ଥ୍ୟ ବିଭାଗ ସହକାରୀଯନ୍ତ୍ରୀ ନିତ୍ୟାନନ୍ଦ ବେହେରା କହିଛନ୍ତି, ରେଡ଼କ୍ରସ ରୋଡ଼ ବାସିନ୍ଦାଙ୍କୁ ନୂଆ ଲାଇନରେ ପାଣି ଦେବା ବ୍ୟବସ୍ଥା କରାଯାଇଥିଲା। ସେଥିରେ ତ୍ରୁଟି ଥିବା ଯୋଗୁ ଏହି ସମସ୍ୟା ଦେଖା ଦେଇଥିଲା। ପରବର୍ତ୍ତି ପର୍ଯ୍ୟାୟରେ ତ୍ରୁଟି ସୁଧାରି ଦିଆଯାଇଛି। ମହାନ୍ତିସାହି ଛକର ଫଟା ପାଇପକୁ ମରାମତି ପାଇଁ ପଦକ୍ଷେପ ନିଆଯାଇଛି ।
