କେନ୍ଦ୍ରାପଡ଼ା ଅଫିସ, ୧୩।୧୧: କେନ୍ଦ୍ରାପଡା ସହରରେ କ୍ରୀଡା ପ୍ରତିଭା ଦେଖାଉଥିବା କୋଲକତାର ସେକ୍ ଜୟିନୁଲ ୨୪ ଘଣ୍ଟା ଧରି ମାଟି ଭିତରେ ରହିବା ପ୍ରଚାର କରିଥିଲେ। ତେବେ ତାଙ୍କର ଏହି ଇଚ୍ଛା ଜିଲା ପ୍ରଶାସନର ହସ୍ତକ୍ଷେପ ପରେ ଫସର ଫାଟିଛି। ଉପଜିଲାପାଳ ନିରଞ୍ଜନ ବେହେରାଙ୍କ ନିର୍ଦ୍ଦେଶକ୍ରମେ ତାଙ୍କର ଖେଳ ବନ୍ଦ କରିବା ସହ ସମାଧି ପାଇଁ ଖୋଳା ଯାଇଥିବା ମାଟିକୁ ପୂରଣ କରାଯାଇଛି। କ୍ରୀଡାବିତ ସେକ୍ ଜୟିନୁଲଙ୍କ କହିବା ଅନୁଯାୟୀ, ସେ ଦୀର୍ଘ ସମୟ ଧରି ସାଇକେଲ ଚାଳନା, ଛାତି ଉପରେ ପଥର ଭାଙ୍ଗିବା, ଏକାଦିକ୍ରମେ ୧୦ଟି ବୁଲେଟ ମଟର ସାଇକେଲକୁ ଛାତି ଉପରେ ଚଢ଼ାଇବା, ଅଗ୍ନି ବଳୟ ମଧ୍ୟରେ ସାଇକେଲ ଚାଳନା, ମାଟି ଭିତରେ ୨୪ ଘଣ୍ଟା ଧରି ସମାଧି ନେବା ନେଇ ତାଲିମ ପାଇଛନ୍ତି। ଓଡ଼ିଶାର ସମସ୍ତ ଜିଲାର ସଦର ଓ ଗ୍ରାମାଞ୍ଚଳରେ ଏହି ପ୍ରତିଭା ଦେଖାଇ ଆର୍ଥିକ ସହଯୋଗ ପାଇଛନ୍ତି। ଗତ ୫ ଦିନ ଧରି ସାଇକେଲ ଚାଳନା କରିଥିଲେ ମଧ୍ୟ ମାଟି ଉପରେ ଅଦ୍ୟାବଧି ପାଦ ରଖିନାହାନ୍ତି। ଏହି ସମୟରେ ୧୫ ଫୁଟ ଉଚ୍ଚତାରେ ସାଇକେଲରେ ବିଭିନ୍ନ କଳା କୌଶଳ ଦେଖାଇଛନ୍ତି। ସନ୍ଧ୍ୟାରେ ଅଗ୍ନି ବଳୟ ମଧ୍ୟରେ ସାଇକେଲ ଚାଳନା ପ୍ରଦର୍ଶନ ପାଇଁ କାର୍ଯ୍ୟକ୍ରମ ଥିବା ବେଳେ ଶେଷରେ ସମାଧି ନେବାକୁ ସ୍ଥିର ହୋଇଥିଲା। ଏହାକୁ ସ୍ଥାନୀୟ ଅଞ୍ଚଳର ଲୋକ ଉପଭୋଗ କରୁଥିଲେ। ତେବେ ପ୍ରଶାସନ ପକ୍ଷରୁ ନିର୍ଦ୍ଦେଶ ପରେ ଟାଉନ ଥାନା ପୋଲିସର ଏସ୍ଆଇ ରଞ୍ଜନ ମହାରଣା, କନଷ୍ଟେବଳ ନରେନ୍ଦ୍ରନାଥ ସୋରେନ, କନଷ୍ଟେବଳ ପୀତାମ୍ବର ବରାଳ ଆସି ବନ୍ଦ କରିଛନ୍ତି । ଏ ସମ୍ପର୍କରେ ସ୍ଥାନୀୟ ଅଞ୍ଚଳର ସେକ ସଲିମ କହିଛନ୍ତି, ଜୟିନୁଲଙ୍କ ସାଇକେଲ ଚାଳନା ଖେଳ ପ୍ରଦର୍ଶନ ଉଚ୍ଚକୋଟିର। ତାଙ୍କର କଳା କୌଶଳ ସ୍ଥାନୀୟ ଅଞ୍ଚଳରେ ଆଦୃତ ହୋଇଛି। ତେବେ ବିପଦଜନକ ଭାବେ ଦେଖାଉଥିବା ଖେଳର ପ୍ରଭାବ କୋମଳମତି ଶିଶୁ ଓ ଯୁବବର୍ଗଙ୍କ ପାଇଁ ବିପଦ ସୃଷ୍ଟି କରିବା ସମ୍ଭାବନା ଅଛି। ଏ ସମ୍ପର୍କରେ ଉପଜିଲାପାଳ ବେହେରା କହିଛନ୍ତି, ଏପରି ଖେଳ ପାଇଁ ପ୍ରଥମେ ଜିଲା ପ୍ରଶାସନର ଅନୁମତି ଆବଶ୍ୟକ। ତାଙ୍କର ଯୋଗ୍ୟତା ଓ ତାଲିମ ସମ୍ପର୍କରେ ଠିକ୍ ତଥ୍ୟ ମିଳିବା ପରେ ହୁଏତ ଏ ସମ୍ପର୍କରେ ବିଚାର କରାଯାଇପାରେ। ତେବେ ୨୪ ଘଣ୍ଟା ମାଟି ମଧ୍ୟରେ ସମାଧି ନେବା ପରି ଆଶ୍ଚର୍ଯ୍ୟଜନକ ଖେଳକୁ କୌଣସି ପ୍ରକାର ପ୍ରୋତ୍ସାହିତ କରାଯାଇପାରିବ ନାହିଁ। ଅନୁମତି ନ ନେଇ ସେକ୍ ଜୟିନୁଲ ଖେଳ ପ୍ରଦର୍ଶନ କରୁଥିବାରୁ ଏହାକୁ ବନ୍ଦ କରି ଦିଆଯାଇଛି।
