ଦାରିଙ୍ଗବାଡି, ୩ା୧୨ (ଅରୁଣ ସାହୁ)ଦାରିଙ୍ଗବାଡ଼ି ପର୍ଯ୍ୟଟନ କ୍ଷେତ୍ର ପାଇଁ ଯେମିତି ପରିଚିତ ସେମିତି ଜୈବିକ ହଳଦୀ ଚାଷ ପାଇଁ ବିଶ୍ୱ ବିକ୍ଷାତ କନ୍ଧମାଳ ହଳଦୀକୁ ଜିଆଇ ଟ୍ୟାଗ ମିଳିବା ପରେ ଏହାର ଚାହିଦା ସବୁଠି ରହିଛି। ହଳଦିରେ ଥିବା କୁରକୁମିନ କ୍ୟାନ୍ସର ଭଳି ରୋଗପ୍ରତିଷେଧକ ଶକ୍ତି ଭଳି କାର୍ଯ୍ୟ କରେ ବୋଲି ଡାକ୍ତରମାନେ କୁହନ୍ତି ତେବେ ଆଉ ଦୁଇ ମାସ ପରେ ହଳଦୀ ଅମଳ ହେବାକୁ ରହିଥିବା ବେଳେ ତାର ପତ୍ରକୁ ହଳଦୀ ଅମଳ ପୂର୍ବରୁ ବିକ୍ରୀ କରିଦିଆଯାଉଛି। ଫଳରେ ହଳଦୀ ଚାଷ ଏବେ ସଙ୍କଟରେ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଉଛି। ଯେଉଁମାନେ ଏଥିରେ ସତର୍କ ଅବଲମ୍ବନ କରୁଛନ୍ତି ସେମାନେ ଏହି ପତ୍ର ବିକ୍ରି କରୁନଥିବା ଜଣାପଡିଛି। ଏହି ପତ୍ରରେ ସୁସ୍ବାଦ ପିଠା ପ୍ରସ୍ତୁତ ପାଇଁ ସାରା ରାଜ୍ୟ ବିଶେଷ କରି ରାଜଧାନୀ ଭୁବନେଶ୍ୱର, କଟକ, ବାଲେଶ୍ୱର, ଭଦ୍ରକ ଆଦି ଅଞ୍ଚଳରେ ଏହାର ଚାହିଦା ରହିଛି। ମଙ୍ଗଳବାର ପ୍ରଥମାଷ୍ଟମୀ ପର୍ବ ରହିଥିବା ବେଳେ ଏବେ ଏହି ପତ୍ର ସଂଗ୍ରହ କରି ଚାଷିମାନେ ବିକ୍ରି କରିବା ଆରମ୍ଭ କରିଛନ୍ତି। ତେବେ ଦଲାଲମାନେ ଅତି ଶସ୍ତାରେ ପ୍ରତିବର୍ଷ ଏହି ପତ୍ରକୁ ସିଧା ଚାଷୀଙ୍କ ହଳଦୀ କ୍ଷେତରୁ କିଣି ନେଇଥାନ୍ତି। ୧ ଶହ ପତ୍ର ଅର୍ଥାତ ୨୦ଟି ବିଡାରେ ଏହି ପତ୍ର ବାନ୍ଧଯାଇଥାଏ, ଯାହାକୁ ଦଲାଲମାନେ ମାତ୍ର ୨୦ ଟଙ୍କାରେ କିଣି ନେଇ ଭୁବନେଶ୍ୱରରେ ଉଚ୍ଚ ଦରରେ ବିକ୍ରି କରିଥାନ୍ତି। ଜଣେ ଚାଷି ଦିନ ତମାମ ପରିବାର ସହ ମିଶି ହଳଦୀ ପତ୍ର କ୍ଷେତରୁ କାଟି ସଂଗ୍ରହ କରି ମାତ୍ର ଦିନକୁ ୨ ଶହରୁ ୩ ଶହ ଟଙ୍କା ରୋଜଗାର କରିଥାନ୍ତି। ସେପଟେ ଏହି ପତ୍ର ହଳଦୀ ଅମଳର ବହୁ ପୂର୍ବରୁ ଚାଷି କାଟି ବିକ୍ରୀ କରୁଥୁବାରୁ ହଳଦୀ ଅମଳରେ ଧୀରେ ଧୀରେ ହ୍ରାସ ପାଉଛି। ପୂର୍ବ ଭଳି ହଳଦୀ ଅମଳ ଓ ତାର ଗୁଣ ବତ୍ତା ନଷ୍ଟ ହେବାରେ ଲାଗିଥିବା କୁହାଯାଉଛି। ଫଳରେ ହଳଦୀର ଦର ବି ହ୍ରାସ ପାଉଥିବା କେତେକ ଚାଷି କହିଛନ୍ତି।
