ନୂଆଦିଲ୍ଲୀ, ୨୮ା୪ (ପି.ଟି.)- ଭାରତୀୟ ହକି ଅମ୍ପାୟର ମ୍ୟାନେଜର ବୀରେନ୍ଦ୍ର ସିଂଙ୍କର କରୋନାରେ ମୃତ୍ୟୁ ଘଟିଛି। ତାଙ୍କୁ ୪୭ ବର୍ଷ ବୟସ ହୋଇଥିଲା। ଉତ୍ତର ପ୍ରଦେଶ ଅନ୍ତର୍ଗତ ମିରଟରେ ତାଙ୍କର ଦେହାନ୍ତ ଘଟିଛି। ବୀରେନ୍ଦ୍ର ବହୁ ସଂଖ୍ୟାରେ ସର୍ବଭାରତୀୟ ଟୁର୍ନାମେଣ୍ଟ ଓ ଜାତୀୟ ଚାମ୍ପିୟନଶିପ୍ ପରିଚାଳନା କରିଛନ୍ତି। ଅମ୍ପାୟରଙ୍କ ମ୍ୟାନେଜର ଭାବେ ମ୍ୟାଚଗୁଡ଼ିକ ଲାଗି ସେ ଶ୍ରେଷ୍ଠ ସମ୍ଭାବ୍ୟ ଅମ୍ପାୟର ବାଛିବା ଦାୟିତ୍ୱ ନିର୍ବାହ କରିଛନ୍ତି। ନିକଟରେ ଅନୁଷ୍ଠିତ ୫୬ତମ ସର୍ବଭାରତୀୟ ବୀର ସିଂ ଜୁ ଦେବ ମେମୋରିଆଲ ଟୁର୍ନାମେଣ୍ଟ ଓ ୫ମ ସର୍ବଭାରତୀୟ ରାଜମାତା ବିଜୟରାଜେ ସିନ୍ଧିଆ ମହିଳା ଟୁର୍ନାମେଣ୍ଟରେ ସେ ଅମ୍ପାୟରଙ୍କ ମ୍ୟାନେଜର ଭାବେ ଦାୟିତ୍ୱ ତୁଲାଇଥିଲେ। ରେଲଓ୍ବେରେ କାର୍ଯ୍ୟରତ ସତ୍ତ୍ୱେ ସେ ୨୦୧୯ରେ ବାଙ୍ଗାଲୋର କପ୍ ଆମନ୍ତ୍ରଣୀୟ ସର୍ବଭାରତୀୟ ହକି ଟୁର୍ନାମେଣ୍ଟ, ଉତ୍ତରାଖଣ୍ଡର ହରିଦ୍ୱାରରେ ସର୍ବଭାରତୀୟ ସ୍ବାମୀ ଶ୍ରଦ୍ଧାନନ୍ଦ ହକି ଟୁର୍ନାମେଣ୍ଟ ସମେତ ଅନ୍ୟ କେତେକ ଇଭେଣ୍ଟରେ ସଫଳତାର ସହ ମ୍ୟାଚ ପରିଚାଳନା କରିଛନ୍ତି। ତାଙ୍କ ବିୟୋଗରେ ହକି ଇଣ୍ଡିଆ ସଭାପତି ଜ୍ଞାନେନ୍ଦ୍ର ନିଙ୍ଗମବାମ୍ ଗଭୀର ଶୋକପ୍ରକାଶ କରିଛନ୍ତି।
