ରାଉରକେଲା,୧୩ା୧୦(ଦିନେଶ ମିଶ୍ର): ଆସିଷ୍ଟାଣ୍ଟ କଲେକ୍ଟର ସୁସ୍ମିତା ମିଞ୍ଜଙ୍କ ମୃତ୍ୟୁ ମାମଲା ଭିନ୍ନମୋଡ ନେଉଛି। ସୁସ୍ମିତାଙ୍କ ଓକିଲ ବିସ୍ମୟ ଦାସଙ୍କ କହିବା ଅନୁଯାୟୀ, ସୁସ୍ମିତା ୨୦୨୦ ଫେବୃଆରୀ ୧୪ରେ ରାଜଗାଙ୍ଗପୁରରେ ବାସ କରୁଥିବା ଶୁସିଲ ଟୋପ୍ପଙ୍କୁ ଜିଏଲ ଚର୍ଚ୍ଚରେ ବିବାହ କରିଥିଲେ। ବିବାହର କିଛି ମାସ ପରେ ସ୍ବାମୀ ନିଶାସକ୍ତ ଅବସ୍ଥାରେ ତାଙ୍କୁ ଶାରିରୀକ, ମାନସିକ ଅତ୍ୟାଚାର କରୁଥିଲେ। ଫଳରେ ସୁସ୍ମିତା ଗତ ବର୍ଷ ମେ’ ମାସରେ ରାଉରକେଲା ପରିବାର ଅଦାଲତରେ ତାଙ୍କ ସ୍ବାମୀଙ୍କୁ ଛାଡପତ୍ର ଦେବାକୁ ଫାଇଲ କରିଥିଲେ। ସ୍ବାମୀ ଶୁସିଲଙ୍କ ଅତ୍ୟାଚାର ସହି ନ ପାରି ସୁସ୍ମିତା ବହୁ ଦିନ ଧରି ଅଲଗା ରହୁଥିଲେ। ଛାଡପତ୍ର ସମସ୍ୟାର ସମାଧାନ ହୋଇ ନ ଥିବାବେଳେ ହଠାତ ଗତ ମାସ୧୯ରେ ସୁସ୍ମିତାଙ୍କ ମୃତଦେହ ରାଉରକେଲା ସେନ୍ସରୀ ପାର୍କରେ ଥିବା ଏକ କୃତ୍ରିମ ପୋଖରୀରୁ ପୋଲିସ ଜବତ କରିଥିଲା। ସୁସ୍ମିତାଙ୍କ ମୃତ୍ୟୁ ଖବର ସହରର ବିଭିନ୍ନ ମହଲରେ ଖେଳିଯିବା ପରେ ତାଙ୍କୁ ହତ୍ୟା କରାଯାଇଥିବା ନେଇ ସ୍ଥାନୀୟ ପ୍ରଶାସନ ଉପରେ ଚାପ ପକାଯାଇଥିଲା। ଏଥିସହ ସୁସ୍ମିତାଙ୍କ ହତ୍ୟାରେ ସମ୍ପୃକ୍ତ ଥିବା ଅଭିଯୋଗକାରୀଙ୍କୁ ଯଥାଶୀଘ୍ର ଗିରଫ ପାଇଁ ଦାବି କରାଯାଇଥିଲା। ଏହି ଘଟଣାକୁ ନେଇ ରାଉରକେଲା ପୋଲିସ ପ୍ରଶାସନ ପକ୍ଷରୁ ସ୍ବତନ୍ତ୍ର ଉଚ୍ଚସ୍ତରୀୟ ତଦନ୍ତ ଟିମ୍ ଗଠନ କରାଯାଇ ତଦନ୍ତ ଚାଲିଥିଲା। ଅନ୍ୟପକ୍ଷେ ସୁସ୍ମିତାଙ୍କ ମୃତଦେହ ବ୍ୟବଚ୍ଛେଦ ରିପୋର୍ଟରେ ସେ ଆତ୍ମହତ୍ୟା କରିଥିବା ଦର୍ଶାଯାଇଥିଲା। ହେଲେ ତାଙ୍କ ପରିବାର ଲୋକେ ଏହାକୁ ସ୍ବୀକାର କରି ନ ଥିଲେ। ଏହାକୁ ନେଇ ମୃତ୍ୟୁ ମାମଲାର ତଦନ୍ତଙ୍କୁ ବ୍ୟାପକ କରାଯାଇଛି। ଏନେଇ ରାଉରକେଲା ଏସ୍ପି ମିତ୍ରଭାନୁ ମହାପାତ୍ରଙ୍କୁ ପଚାରିବାରୁ ସେ କହିଥିଲେ, ଆମେ ବିଭିନ୍ନ ଦିଗରୁ ତଦନ୍ତ ବର୍ତ୍ତମାନ ଜାରି ରଖିଛୁ। ଏହି ତଦନ୍ତ ପ୍ରକ୍ରିୟାରେ ପୋଲିସ ତାଙ୍କ ସ୍ବାମୀ ଶୁସିଲଙ୍କ ସହ ପରିବାର ଲୋକଙ୍କୁ ମିଶାଇ ୧୪ ଜଣଙ୍କୁ ଜେରା କରି ସାରିଲାଣି ା ଆଗାମୀ ଦିନରେ ଉକ୍ତ ଘଟଣାର ତଦନ୍ତ ସରିବା ପରେ ପ୍ରକୃତ ସତ୍ୟ ଲୋକଲୋଚନକୁ ଆସିବ ବୋଲି ଏସ୍ପି ମହାପାତ୍ର ସୂଚନା ଦେଇଥିଲେ।
