ଜୋହାନ୍ସବର୍ଗ,୫।୪: ପାକିସ୍ତାନର ଓପନର୍ ଫାଖର ଜମାନ ପୁଣି ଥରେ ଏକ ବିସ୍ଫୋରକ ଇନିଂଶ ଖେଳିଛନ୍ତି। ସେ ରବିବାର ଦକ୍ଷିଣ ଆଫ୍ରିକା ବିପକ୍ଷରେ ୧୯୩ ରନ୍ର ଅପରାଜିତ ଇନିଂସ ଖେଳି ତାଙ୍କ ନାମ ରେକର୍ଡ ବୁକ୍ରେ ସ୍ଥାନିତ କରିଥିଲେ। ଏକଦିବସୀୟ କ୍ରିକେଟରେ ଦ୍ୱିତୀୟ ଇନିଂସରେ ସବୁଠୁ ବଡ଼ ଇନିଂସ ଖେଳିଥିବା ଫାଖର ଜମାନ ବ୍ୟାଟ୍ସମ୍ୟାନ ହୋଇଛନ୍ତି। ସେ ୧୫୫ ବଲ୍ରେ ଇନିଂସରେ ୧୮ ଚୌକା ଓ ୧୦ ଛକା ମାରିଥିଲେ। ଜୋହାନ୍ସବର୍ଗରେ ପାକିସ୍ତାନ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଦିନିକିଆ ମ୍ୟାଚ ଖେଳାଯାଇଥିଲା। ଆୟୋଜକ ଦକ୍ଷିଣ ଆଫ୍ରିକା ପ୍ରଥମେ ୬ଟି ଉଇକେଟ ହରାଇ ୩୪୧ ସ୍କୋର କରିଥିଲା। ଏହାର ଜବାବରେ ପାକିସ୍ତାନ ପକ୍ଷରୁ ଫାକର ଚମତ୍କାର ଇନିଂସ ଖେଳି ୧୯୩ ରନ କରିଥିଲେ। ତେବେ ସେ ତାଙ୍କ ଦଳକୁ ଜିତାଇ ପାରି ନ ଥିଲେ। ପାକିସ୍ତାନୀ ଦଳ ନିର୍ଦ୍ଧାରିତ ୫୦ ଓଭରରେ ୯ ଉଇକେଟ ହରାଇ କେବଳ ୩୨୪ ରନ କରିବାରେ ସକ୍ଷମ ହୋଇଥିଲା। ଫଳରେ ଦଳ ୧୭ ରନ୍ରେ ପରାଜୟର ସମ୍ମୁଖୀନ ହେବାକୁ ପଡ଼ିଲା। ଫାକର ଜମାନ ୧୯୩ ରନ ସ୍କୋର କରି ଏକଦିବସୀୟରେ ଦ୍ୱିତୀୟ ଇନିଂସର ସର୍ବାଧିକ ସ୍କୋର କରି ଅଷ୍ଟ୍ରେଲିଆ ଖେଳାଳି ଶେନ ୱାଟସନଙ୍କ ରେକର୍ଡ ଭାଙ୍ଗିଛନ୍ତି। ୨୦୧୧ ରେ ୱାଟସନ ବାଂଲାଦେଶ ବିପକ୍ଷରେ ଏକ ଟାର୍ଗେଟ ପିଛା କରି ୧୮୫ ରନ ସଂଗ୍ରହ କରିଥିଲେ। ୨୦୧୭ ପରେ ୧୯୦ରୁ ଅଧିକ ସ୍କୋର କରିଥିବା ଫାଖର ଜମାନ ପ୍ରଥମ ବ୍ୟାଟ୍ସମ୍ୟାନ ହୋଇଥିଲେ। ସେ ଏହା ପୂର୍ବରୁ ୨୦୧୮ରେ ଜିମ୍ବାୱେ ବିପକ୍ଷରେ ୨୧୦ ସ୍କୋର କରିଥିଲେ। ଦକ୍ଷିଣ ଆଫ୍ରିକା ମାଟିରେ ସବୁଠାରୁ ବଡ ଏକଦିବସୀୟ ଇନିଂସ ଖେଳିଥିବା ଫାଖର ମଧ୍ୟ ପ୍ରଥମ କ୍ରିକେଟର ହୋଇଛନ୍ତି। ଏହାପୂର୍ବରୁ ଏହି ରେକର୍ଡ ଫାଫ ଡୁ ପ୍ଲେସିଙ୍କ ନାମରେ ଥିଲା। ସେ ୨୦୧୭ରେ ଶ୍ରୀଲଙ୍କା ବିପକ୍ଷରେ ୧୮୫ ଇନିଂସ ସ୍କୋର କରିଥିଲେ।
