ଖୋର୍ଦ୍ଧା ଅଫିସ,୨୯।୧୨: ଖୋର୍ଦ୍ଧା ଜିଲାରେ ସରକାରୀ ଓ ମହାପ୍ରଭୁଙ୍କ ଜମି, କାଜୁ ଜଙ୍ଗଲ ଉପରେ ପଥର ଖଣି ମାଫିଆଙ୍କ ଲୋଲୁପ ଦୃଷ୍ଟି ପଡ଼ିଛି। ଏପରିକି ସ୍ଥିତିବାନ ପ୍ଲଟ ମଧ୍ୟ ବାଦ୍ ପଡ଼ିନି। ପ୍ରତିବାଦ କଲେ ମିଳୁଛି ହତ୍ୟା ଧମକ। ଏଥିସହ ପୋଲିସ ନିକଟରେ ଅଭିଯୋଗ କଲେ ବୋମା ପକାଇ ଉଡ଼ାଇ ଦେବାକୁ ଧମକ ଦେଉଛନ୍ତି। ଏନେଇ ସୋମବାର ଜଙ୍କିଆ ଥାନା ଅଧୀନ ମଳିପଡ଼ା ଠାରେ ରହୁଥିବା ଏକ ଦମ୍ପତି ଜିଲା ଆରକ୍ଷୀ ଅଧୀକ୍ଷଙ୍କ ନିକଟରେ ଅଭିଯୋଗ କରିବା ସହ ପତ୍ର ପ୍ରଦାନ କରିଛନ୍ତି।
ଅଭିଯୋଗପତ୍ରରେ ଦର୍ଶାଯାଇଛି ଯେ, ମଳିପଡା ଠାରେ ପ୍ରଦୀପ ନରେନ୍ଦ୍ର ଜିତସିଂ ଓ ସ୍ତ୍ରୀ ସୁବାସିନୀ ରୁହନ୍ତି। ନରସିଂହପ୍ରସାଦ ମୌଜା ସ୍ଥିତ ଖାତା ନଂ.୩୭୭/୦୬, ପ୍ଲଟ ନଂ. ୭୬ ଓ ୧୪୭, ପ୍ଲଟ ନଂ. ୧୬, ୮୯୫, ୯୩, ୯୨ ଏବଂ ୩୦ରେ ସ୍ଥିତିବାନ ଜମି ରହିଛି। ଏହି ଜମିରୁ କେତେଜଣ ଦୁର୍ବୃତ୍ତ ଅନୁପସ୍ଥିତିର ସୁଯୋଗ ନେଇ ମୋରମ ଏବଂ ମାଙ୍କଡା ପଥର ଦୈନିକ ଶହ ଶହ ଟ୍ରକ୍ରେ ଉତ୍ତୋଳନ କରି ଚୋରା ଚାଲାଣ କରୁଛନ୍ତି। ଏଥିସହିତ ପ୍ରଦୀପଙ୍କ ଜମିରେ ରହିଥିବା କାଜୁ ଜଙ୍ଗଲ କାଟି ପଦା କରି ଦେଇଛନ୍ତି। ସେଠାରୁ ମଧ୍ୟ ଚୋରା ଚାଲାଣ ଚାଲିଛି। ଫଳରେ ଜମିରେ ୩୦ରୁ ୪୦ ଫୁଟ ଗାତ ସୃଷ୍ଟି ହେଲାଣି। ବହୁ ମୂଲ୍ୟବାନ ଜମି ଅନୁପଯୁକ୍ତ ହୋଇପଡିଛି। ଏନେଇ ସ୍ଥାନୀୟ ଓ ଜିଲା ପ୍ରଶାସନ ନିକଟରେ ବାରମ୍ବାର ଅଭିଯୋଗ ସତ୍ତ୍ୱେ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ଅନ୍ୟପଟେ ଜମିକୁ ଗଲେ, ବନ୍ଧୁକ ଓ ମାରଣାସ୍ତ୍ର ଦେଖାଇ ଭୟଭୀତ କରୁଛନ୍ତି। ଥାନାରେ ଅଭିଯୋଗ କଲେ, ଜୀବନରେ ମାରିଦେବାକୁ ଧମକ ଦେଉଛନ୍ତି। ଅନ୍ୟପଟେ ଜମିରେ ବେଆଇନ ଖଣିଜ ପଦାର୍ଥ ଉତ୍ତୋଳନ ଜାରି ରହିଛି। ଦୁର୍ବୃତ୍ତଙ୍କ କବଳରୁ ବେଆଇନ ଖଣି ଉତ୍ତୋଳନ ବନ୍ଦ କରିବା ସହ ସେମାନଙ୍କୁ ସୁରକ୍ଷା ପ୍ରଦାନ ଲାଗି ଦାବିରେ ଉଲ୍ଲେଖ ରହିଛି।
