ଭୁବନେଶ୍ୱର,୨୬ା୪(ଅନୁରାଧା ମହାରଣା): ଆସନ୍ତା ୫ବର୍ଷ ମଧ୍ୟରେ ଦେଶର ଅର୍ଥନୀତିର ବିକାଶ ନେଇ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଆକଳନ କରିଥିବାବେଳେ ପାଣିପାଗ ପରିବର୍ତ୍ତନ ଦରଦାମ ହ୍ରାସରେ ବାଧକ ସାଜିଛି। ପାଣିପାଗ ବିଭାଗ ଆଗାମୀ ଦିନରେ ତାପମାତ୍ରା ବୃଦ୍ଧି ନେଇ ପୂର୍ବାନୁମାନ କରିଛି। ଅନ୍ୟପଟେ ଇରାନ ଏବଂ ଇସ୍ରାଏଲ ମଧ୍ୟରେ ତିକ୍ତତା ମୁଦ୍ରାସ୍ଫୀତି ହ୍ରାସରେ ସମସ୍ୟା ସୃଷ୍ଟି କରିବା ସହ ଆର୍ବିଆଇ ମଧ୍ୟ ଚିନ୍ତାରେ ପଡ଼ିଛି।
ଚଳିତ ବର୍ଷର ପ୍ରଥମ ୩ମାସ ମଧ୍ୟରେ ଜାନୁଆରୀରୁ ମାର୍ଚ୍ଚ ମଧ୍ୟରେ ଖୁଚୁରା ମୁଦ୍ରାସ୍ଫୀତି ହାରରେ କ୍ରମାଗତ ହ୍ରାସ ଘଟିଛି। ପରିସଂଖ୍ୟାନ ମନ୍ତ୍ରଣାଳୟ ପକ୍ଷରୁ ଏପ୍ରିଲ ୧୨ରେ ପ୍ରକାଶିତ ମୁଦ୍ରାସ୍ଫୀତି ତଥ୍ୟରେ ଖୁଚୁରା ମୁଦ୍ରାସ୍ଫୀତି ହାର ୫ ପ୍ରତିଶତରୁ ୪.୮୫ ପ୍ରତିଶତକୁ ଖସି ଆସିଛି। ଏହା ଆର୍ବିଆଇର ଲକ୍ଷ୍ୟଠାରୁ ୪ ପ୍ରତିଶତକୁ ହ୍ରାସ ପାଇଛି। ଡିସେମ୍ବର ୨୦୨୩ରେ ଖୁଚୁରା ମୁଦ୍ରାସ୍ଫୀତି ହାର ୫.୭ ପ୍ରତିଶତ ଥିଲା। ୨୦୨୩-୨୪ ଆର୍ଥିକ ବର୍ଷର ଚତୁର୍ଥ ତ୍ରୈମାସିକରେ ହାରାହାରି ମୁଦ୍ରାସ୍ଫୀତି ହାର ୫ ପ୍ରତିଶତ ହୋଇଛି।
ଆର୍ବିଆଇର ମାସିକ ବୁଲେଟିନ୍ ଅଶୋଧିତ ତେଲ ବ୍ୟାରେଲ ପ୍ରତି ୧୦୦ ଡଲାର ଅତିକ୍ରମ କରିପାରେ। ବୁଲେଟିନ୍ରେ କୁହାଯାଇଛି, ଏହି ଗ୍ରୀଷ୍ମ ଋତୁରେ ଖାଦ୍ୟ ଦରଦାମ ଉପରେ ଅତ୍ୟଧିକ ସତର୍କ ରହିବା ଆବଶ୍ୟକ କାରଣ ଖାଦ୍ୟ ସାମଗ୍ରୀର ମୁଦ୍ରାସ୍ଫୀତି ଏକ ବଡ଼ ଝଟକା ଦେଇପାରେ। ଆର୍ବିଆଇ ଆର୍ଟିକିଲ ଅନୁଯାୟୀ, ଅସ୍ବାଭାବିକ ପାଣିପାଗ କେବଳ ମୁଦ୍ରାସ୍ଫୀତି ପାଇଁ ବିପଦ ନୁହେଁ ବରଂ ଦୀର୍ଘ ଦିନ ଧରି ଚାଲିଆସୁଥିବା ଭୌଗୋଳିକ-ରାଜନୈତିକ ଉତ୍ତେଜନା ହେତୁ ଅଶୋଧିତ ତୈଳ ଦର ମୂଲ୍ୟ ଅସ୍ଥିର ରହିପାରେ। ସମ୍ପ୍ରତି ଅଶୋଧିତ ତୈଳ ବ୍ୟାରେଲ ପିଛା ୯୧ ଡଲାରରେ ପହଞ୍ଚିଛି।
ଗତ ସପ୍ତାହରେ, ଆର୍ବିଆଇ ୨୦୨୪-୨୫ ଆର୍ଥିକ ବର୍ଷ ପାଇଁ ପ୍ରଥମ ମୁଦ୍ରା ନୀତି ବୈଠକର ମିନିଟ ପ୍ରକାଶ କରି କହିଛି ଯେ ଏହି ବୈଠକରେ ସଦସ୍ୟମାନେ ଖାଦ୍ୟ ମୁଦ୍ରାସ୍ଫୀତିକୁ ସବୁଠାରୁ ବଡ ବିପଦ ବୋଲି କହିଛନ୍ତି। ଆର୍ବିଆଇ ଗଭର୍ନର ଶକ୍ତିକାନ୍ତ ଦାସ କହିଛନ୍ତି , ମୁଦ୍ରାସ୍ଫୀତି ବିଷୟରେ ବହୁତ ସତର୍କ ରହିବା ଆବଶ୍ୟକ। ତେଣୁ ଏମ୍ପିସିର ସଦସ୍ୟ ମାଇକେଲ ଦେବବ୍ରତ ପାତ୍ର କହିଛନ୍ତି, ବର୍ତ୍ତମାନର ମୁଦ୍ରାସ୍ଫୀତିର ପ୍ରଭାବ ଏବଂ ଖାଦ୍ୟ ମୁଦ୍ରାସ୍ଫୀତି ହାରର ପ୍ରଭାବ ସମ୍ପର୍କିତ ତଥ୍ୟ ଦର୍ଶାଉଛି ଯେ ଖାଦ୍ୟ ଦର ବୃଦ୍ଧିର ଆଶଙ୍କା ରହିଛି। ମେ ୨୦୨୪ ସୁଦ୍ଧା ତାପମାତ୍ରା ବୃଦ୍ଧି ହେତୁ ମୂଲ୍ୟ ବୃଦ୍ଧି ହେବ ବୋଲି ସେ ପୂର୍ବାନୁମାନ କରିଛନ୍ତି। ଖାଦ୍ୟ ପଦାର୍ଥ ଏବଂ ଅଶୋଧିତ ତୈଳର ମୂଲ୍ୟ ବୃଦ୍ଧି ହେତୁ ଯଦି ମୁଦ୍ରାସ୍ଫୀତି ବୃଦ୍ଧି ହୁଏ, ତେବେ ୨୦୨୪ ମସିହାରେ ମହଙ୍ଗା ଋଣରୁ ମୁକ୍ତି ପାଇବା ସମ୍ଭବ ନୁହେଁ।
