କରୋନା ଭାଇରସ୍ ସମଗ୍ର ବିଶ୍ୱରେ ହଟଚମଟ ସୃଷ୍ଟି କରିଛି। ଏହି ମହାମାରୀ ଯୋଗୁ ବିଶ୍ୱରୁ ଲକ୍ଷ ଲକ୍ଷ ଲୋକଙ୍କର ମୃତ୍ୟୁ ଘଟିଛି। ମହାମାରୀର ମୁକାବିଲା ପାଇଁ ଦୁନିଆର ଅନେକ ଦେଶକୁ ଲକ୍ଡାଉନ୍ ବି କରାଯାଇଥିଲା। ଯେଉଁଥିପାଇଁ ଲୋକଙ୍କୁ ନିଜ ଘରେ ରହିବାକୁ ପଡ଼ିଥିଲା। ଏହି ମହାମାରୀ ଯୋଗୁ ବିଶ୍ୱ ଅର୍ଥନୀତି ବହୁ କ୍ଷତି ସହିଥିବାବେଳେ ଲକ୍ଷଲକ୍ଷ ଲୋକ ଚାକିରି ହରାଇଛନ୍ତି। ଏବେ ଏଥିରେ ଟିକେ ସୁଧାର ଆସିଥିବାରୁ ଲୋକେ ଜୀବନ ଜୀବିକାକୁ ଗୁରୁତ୍ୱ ଦେଲେଣି। କିନ୍ତୁ ଦୁନିଆର ଏଭଳି ଏକ ସୁରକ୍ଷିତ ସ୍ଥାନ ରହିଛି, ଯେଉଁଠାରେ ଆଜି ପର୍ଯ୍ୟନ୍ତ କରୋନା ମହାମାରୀ ପହଞ୍ଚି ପାରିନାହିଁ।
ଏହି ସ୍ଥାନର ନାମ ସେଣ୍ଟ୍ ହେଲେନା ଦ୍ୱୀପ। ଏଠାରୁ ଗୋଟିଏ ବି କରୋନା ମାମଲା ଆସିନାହିଁ। ଏକ ରିପୋର୍ଟରେ ଏହା କୁହାଯାଇଛି, ସବୁଠାରୁ ବଡ଼ କଥା ହେଉଛି କରୋନା ନିୟମ ଏଠାରେ ପାଳନ କରାଯାଏ ନାହିଁ। ଏଠାରେ ଲୋକମାନେ ପୂର୍ବପରି ସାଧାରଣ ଜୀବନଯାପନ କରୁଛନ୍ତି। ଏହି ଦ୍ୱୀପରେ କେହି ମାସ୍କ ପିନ୍ଧନ୍ତି ନାହିଁ ଏବଂ ସାମାଜିକ ଦୂରତାକୁ କେହି ଅନୁସରଣ କରନ୍ତି ନାହିଁ।
ଏଠାରେ ଲୋକମାନେ କେବଳ ହାତ ଧୋଇଥାନ୍ତି। ଯଦି କେହି କାଶନ୍ତି ତେବେ ସେମାନେ ନିଜ କାନ୍ଧ ସାହାଯ୍ୟରେ ମୁହଁକୁ ଘୋଡ଼ାଇ ଥାନ୍ତି। ଏହା ବ୍ୟତୀତ ଏଠାରେ କେହି ଅନ୍ୟ ସୁରକ୍ଷା ନିୟମ ଅନୁସରଣ କରନ୍ତି ନାହିଁ। କରୋନା ମାମଲା ଏଠାରେ ନ ଥିବାରୁ ଏଠାକୁ ପର୍ଯ୍ୟଟକମାନେ ଆସୁଛନ୍ତି। ଲୋକମାନେ ପୂର୍ବ ପରି ଏଠାରେ ନିଜ ଜୀବନ ବିତାଉଛନ୍ତି।
ଏହି ଦ୍ୱୀପଟି ମାତ୍ର ୧୨୦ବର୍ଗ କିମିରେ ଅବସ୍ଥିତ। ଏହାର ଜନସଂଖ୍ୟା ପ୍ରାୟ ୫୦୦୦। ନେପୋଲିଅନଙ୍କ ଯୋଗୁ ଏହି ଦ୍ୱୀପ ସବୁଠାରୁ ପ୍ରସିଦ୍ଧ। କୁହାଯାଏ, ୧୮୨୧ ମସିହାରେ ନେପୋଲିଅନଙ୍କ ଏଠାରେ ମୃତ୍ୟୁ ଘଟିଥିଲା।
