ବିରିଡ଼ି,୧୧।୧୧(ଡି.ଏନ୍.ଏ.): ବିରିଡ଼ି ବ୍ଲକ ବତିମୀରା ପଞ୍ଚାୟତର ମିଶନ ଶକ୍ତି ଗୃହ ନିର୍ମାଣକୁ ନେଇ ବିବାଦ ତେଜିବାରେ ଲାଗିଛି। ବ୍ଲକ କର୍ତ୍ତୃପକ୍ଷ ଜନବସତିଠାରୁ ଦୂର ଗୋଚର କିସମ ଜମିରେ ଗୃହ ନିର୍ମାଣ ଆରମ୍ଭ କରିଛନ୍ତି। ହେଲେ ଯେଉଁ ସ୍ଥାନରେ ଗୃହ କରାଯାଉଛି, ତାହା ଦିନରେ ମଧ୍ୟ ମହିଳାମାନଙ୍କ ପାଇଁ ସୁରକ୍ଷିତ ନୁହେଁ ବୋଲି ପଞ୍ଚାୟତର ୬୧ ଏସ୍ଏଚ୍ଜିର ସଭ୍ୟାମାନେ ବିରୋଧ ଜାରି ରଖିଛନ୍ତି। ଫଳରେ ବୁଧବାର ବହୁ ସଂଖ୍ୟକ ମହିଳା ଗୃହ ନିର୍ମାଣ କାମ ବନ୍ଦ କରିବା ଦାବିରେ ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ। ଉକ୍ତ ପଞ୍ଚାୟତର ସରପଞ୍ଚ ସ୍ବର୍ଣ୍ଣଲତା ସେଠୀ ମଧ୍ୟ ମହିଳାଙ୍କ ଦାବି ପ୍ରତି ସହାନୁଭୂତି ଜଣାଇ ଧାରଣା ସ୍ଥଳରେ ପହଞ୍ଚତ୍ ଥିଲେ। ହେଲେ ବିଡିଓ ହେମନ୍ତ କୁମାର ମହାନ୍ତ ସେମାନଙ୍କ ଦାବି ଆଗରେ ମୁଣ୍ଡ ନୁଆଇବେ ନାହିଁ ବୋଲି କହିଥିଲେ। ଯେ ପର୍ଯ୍ୟନ୍ତ ଦାବି ପୂରଣ ପାଇଁ ଧାରଣା ଚାଲିବ ବୋଲି ମହିଳା ଏସ୍ଏଚ୍ଜିର ସଭାନେତ୍ରୀ ଭାନୁପ୍ରଭା ଭୋଇ କହିଛନ୍ତି। ଅପରପକ୍ଷରେ ଗୋଚର ଜମିରେ ଗୃହ ନିର୍ମାଣ କରିବାକୁ ରାଜସ୍ବ ବିଭାଗ ଅନୁମତି ଦେଇନାହିଁ ବୋଲି ବିରିଡି ତହସିଲଦାର ସାଗରିକା ପ୍ରିୟଦର୍ଶିନୀ କହିଛନ୍ତି। ରାଜସ୍ବ ନିରୀକ୍ଷକ ଜାଗା ଚିହ୍ନଟ କରି ନିଅଁ ଖୋଳିବାକୁ କହିଛନ୍ତି ବୋଲି ବିଡିଓ ମହାନ୍ତ କହିବାରୁ ରାଜସ୍ବ-ପଞ୍ଚାୟତିରାଜ ବିଭାଗ ମୁହାଁମୁହିଁ ହୋଇଛନ୍ତି। ହଳଦିଆପଡା ମୌଜାର ଜନବସତି ନିକଟରେ ଗୃହ ନିର୍ମାଣ ପାଇଁ ମହିଳାମାନେ ଦାବି କରି ବିଡିଓ, ତହସିଲଦାର, ଜିଲାପାଳଙ୍କୁ ଲିଖିତ ଭାବେ ଜଣାଇ ଥିଲେ। କାରଣ ଗୃହରେ ମହିଳାମାନେ ବିଭିନ୍ନ ବିକ୍ରି ଯୋଗ୍ୟ ଜିନିଷ ରଖିବା ସହ ବୈଠକ କରିବାକୁ ନିୟମ ରହିଛି। ମାତ୍ର ବ୍ଲକ ପ୍ରଶାସନ ଗୃହକୁ ଗଁାର ନିଛାଟିଆ ସ୍ଥାନରେ କରୁଛନ୍ତି, ଫଳରେ ମହିଳାମାନେ ବିରୋଧ କରୁଛନ୍ତି। ସନ୍ଧ୍ୟାରେ ମହିଳାମାନେ ଗୋଚରରେ ବେଆଇନ ଭାବେ ହେଉଥିବା ଗୃହକୁ ଭାଙ୍ଗିଦେବେ ବୋଲି ବିଡିଓଙ୍କୁ ଲିଖିତ ଭାବେ ଜଣାଇଛନ୍ତି।
