ପୁରୀ,୧୭ା୬(ଅଜିତ୍ ମହାନ୍ତି): ଭକ୍ତଙ୍କ ନିମନ୍ତେ ଶ୍ରୀମନ୍ଦିର ଚାରିଦ୍ୱାର ଖୋଲା ହେବା ପରେ ମହାପ୍ରଭୁଙ୍କ ରତ୍ନଭଣ୍ଡାର ଖୋଲାଯିବାକୁ ନେଇ ସାଧାରଣରେ ଉତ୍କଣ୍ଠା ଦେଖିବାକୁ ମିଳିଛି। ନୂତନ ଭାଜପା ସରକାର ଶାସନ ଗାଦିକୁ ଆସିବା ପୂର୍ବରୁ ଭକ୍ତଙ୍କ ନିମନ୍ତେ ଚାରିଦ୍ୱାର ଖୋଲାଯିବା ସହ ରତ୍ନଭଣ୍ଡାର ଖୋଲାଯାଇ ରତ୍ନଅଳଙ୍କାର ଗଣତିମଣତି କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ସେହି ପ୍ରତିଶ୍ରୁତି ପାଳନ କରିଛନ୍ତି ନୂତନ ସରକାର। ସମ୍ପ୍ରତି ସରକାର ଶ୍ରୀମନ୍ଦିର ଚାରିଦ୍ୱାର ଖୋଲିଛନ୍ତି। ତେଣୁ ଆଗାମୀ ଦିନରେ ରତ୍ନଭଣ୍ଡାର ଖୋଲାଯିବା ନେଇ ଭକ୍ତଙ୍କ ମନରେ ଆଶା ଉଜ୍ଜୀବିତ ହୋଇଛି। ଅନ୍ୟପକ୍ଷରେ ରତ୍ନଭଣ୍ଡାର ସ୍ଥିତି ଶୋଚନୀୟ ହୋଇପଡ଼ିଛି ବୋଲି ମହାପ୍ରଭୁ ଶ୍ରୀଜଗନ୍ନାଥଙ୍କ ବାଡ଼ଗ୍ରାହୀ ଦଇତାପତି ସେବାୟତ ଜଗନ୍ନାଥ ସ୍ବାଇଁ ମହାପାତ୍ର ଅଭିଯୋଗ ଆଣିଛନ୍ତି।
ସ୍ବାଇଁ ମହାପାତ୍ର ରବିବାର ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ରାଜ୍ୟର ନୂଆ ସରକାର ତାଙ୍କ ପ୍ରତିଶ୍ରୁତି ରଖି ଶ୍ରୀମନ୍ଦିର ଚାରିଦ୍ୱାର ଖୋଲିଲେ। ଏବେ ରତ୍ନଭଣ୍ଡାର ଖୋଲାଯିବା ନେଇ ଆଶା ରହିଛି। ତେବେ ରତ୍ନଭଣ୍ଡାର ସ୍ଥିତି ଅତି ଶୋଚନୀୟ ହୋଇପଡ଼ିଛି ବୋଲି ସେ ଅଭିଯୋଗ କରିଛନ୍ତି। ରତ୍ନଭଣ୍ଡାରରେ ବର୍ଷାପାଣି ପଡ଼ି ଅଳଙ୍କାର ନଷ୍ଟ ହେବାକୁ ବସିଲାଣି। ଯଦି ତୁରନ୍ତ ରତ୍ନଭଣ୍ଡାର ଖୋଲା ନ ଯାଏ, ତେବେ ଯାହାବି ଅଳଙ୍କାର ଅଛି ସବୁ ନଷ୍ଟ ହୋଇଯିବ। ତେଣୁ ରତ୍ନଭଣ୍ଡାର ଖୋଲି ରତ୍ନଅଳଙ୍କାର କଢାଯାଉ। ଏଥିସହ ନୂତନ ରତ୍ନଭଣ୍ଡାର ନିର୍ମାଣ କରାଯାଇ ଅଳଙ୍କାରଗୁଡ଼ିକୁ ସେଠାରେ ସୁରକ୍ଷିତ ଭାବେ ରଖାଯାଉ। ବିଶେଷକରି ବର୍ଷାଦିନେ ବର୍ଷାପାଣି ରତ୍ନଭଣ୍ଡାର ଭିତରେ ପଶୁଛି। ପାଣି ଜମି ରହୁଥିବାରୁ ଅଳଙ୍କାର ନଷ୍ଟ ହେଉଛି। ପୂର୍ବ ସରକାର ରତ୍ନଭଣ୍ଡାର ଖୋଲୁନଥିଲେ, ଚାବି ହଜିଗଲା ବୋଲି କହିଥିଲେ। ତେବେ ରତ୍ନଭଣ୍ଡାର ଖୋଲିବା ନେଇ ପୂର୍ବ ସରକାରଙ୍କ ପକ୍ଷରୁ ପୂର୍ବତନ ବିଚାରପତି ଅରଜିତ୍ ପଶାୟତଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଛି। ଉକ୍ତ କମିଟି ରଥଯାତ୍ରା ପରଦିନ ଠାରୁ ରତ୍ନଭଣ୍ଡାର ଖୋଲି ଯାଞ୍ଚ କରିବା ସହ ଅଳଙ୍କାର ଗଣତିମଣତି କରିବାକୁ ନିଷ୍ପତ୍ତି ନେଇଛି। ଏନେଇ ପଶାୟତ ତାଙ୍କ ସହ ଆଲୋଚନା କରିଛନ୍ତି। କିନ୍ତୁ ରତ୍ନଅଳଙ୍କାର ଗଣତିମଣତି ୩ରୁ ୪ ମାସ ଲାଗିବ। ତେବେ ନୂତନ ସରକାର ରତ୍ନଅଳଙ୍କାର ଗଣତିମଣତି କରିବେ ବୋଲି ଆଶା ରହିଛି। ନୂତନ ସରକାରଙ୍କ ଉପରେ ଆସ୍ଥା ରହିଛି। ନୂତନ ମୁଖ୍ୟମନ୍ତ୍ରୀ ଭଲ ଲୋକ ବୋଲି ସ୍ବାଇଁ ମହାପାତ୍ର କହିଛନ୍ତି। ସେହିପରି ରତ୍ନଭଣ୍ଡାର ଚାବି ହଜିବା କ’ଣ ପିଲାଳିଆମି କି ବୋଲି ସେ ପ୍ରଶ୍ନ କରିଛନ୍ତି। ତଦନ୍ତ ହେଉ ଏବଂ ଓରିଜିନାଲ ଚାବିରେ ରତ୍ନଭଣ୍ଡାର ଖୋଲାଯାଉ ବୋଲି ସ୍ବାଇଁ ମହାପାତ୍ର ଦାବି କରିଛନ୍ତି।
୨୦୧୮ ମାର୍ଚ୍ଚ ୨୨ରେ ହାଇକୋର୍ଟଙ୍କ ନିର୍ଦ୍ଦେଶ ମୁତାବକ ପ୍ରଥମେ ମାର୍ଚ୍ଚ ୨୬ରେ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ଏଏସ୍ଆଇ) ଟିମ୍ ରତ୍ନଭଣ୍ଡାର ଯାଞ୍ଚ କରିଥିଲେ। ପରେ ଏପ୍ରିଲ ୪ରେ ଭିତର ରତ୍ନଭଣ୍ଡାର ଖୋଲିବାକୁ ୧୭ ଜଣିଆ ପ୍ରାଧିକୃତ୍ ଟିମ୍ ଯାଇଥିଲା। ତେବେ ଚାବି ହଜିଥିବାରୁ ଭିତର ରତ୍ନଭଣ୍ଡାର ଖୋଲାଯାଇପାରି ନ ଥିଲା। ପରେ ଚାବି ହଜିବା ସମ୍ପର୍କରେ ସରକାରଙ୍କ ପକ୍ଷରୁ ଜଷ୍ଟିସ୍ ରଘୁବୀର ଦାସ କମିଶନ ତଦନ୍ତ କରିଥିଲା। ମାତ୍ର ତଦନ୍ତ ରିପୋର୍ଟ ସାର୍ବଜନୀନ କରାଗଲା ନାହିଁ। ଶ୍ରୀମନ୍ଦିର ରେକର୍ଡ ଅଫ୍ ରାଇଟସ୍ ମୁତାବକ ପ୍ରତି ତିନିବର୍ଷରେ ରନତ୍ଭଣ୍ଡାର ଖୋଲାହେବା ନିୟମ ରହିଥିବାବେଳେ ଆଜିକୁ ପ୍ରାୟ ୪୫ ବର୍ଷ ହେବ ଏହା ଖୋଲାଯାଇନାହିଁ। ହାଇକୋର୍ଟଙ୍କ ନିଦ୍ଦେର୍ର୍ଶ ପରେ ତତ୍କାଳୀନ ରାଜ୍ୟ ସରକାରଙ୍କ ପକ୍ଷରୁ ଅବସରପ୍ରାପ୍ତ ବିଚାରପତି ଅରଜିତ ପଶାୟତଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଛି। କମିଟି ପକ୍ଷରୁ ପୂର୍ବରୁ ବୈଠକ କରାଯାଇ ବିଭିନ୍ନ ଦିଗ ଉପରେ ଆଲୋଚନା ହୋଇଛି। ଆଗାମୀ ରଥଯାତ୍ରା ସମୟରେ ରତ୍ନଭଣ୍ଡାର ଖୋଲିବ ବୋଲି ସୂଚନା ମିଳିଛି।
