ବାଲେଶ୍ୱର ଅଫିସ, ୨ ।୪ ବାଲେଶ୍ୱର ଜିଲା ରେମୁଣା ବ୍ଲକ ଅଧୀନ ୬୦ନଂ. ଜାତୀୟ ରାଜପଥଠାରୁ ମଧୁପୁରା ପର୍ଯ୍ୟନ୍ତ ୨୦୧୬ରୁ ସମ୍ପୂର୍ଣ୍ଣ ହୋଇଥିବା ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଶୋଚନୀୟ ହୋଇପଡ଼ିଛି। ଉକ୍ତ ରାସ୍ତାର ଗ୍ୟାରେଣ୍ଟି ଅବଧି ଶେଷ ହୋଇ ନ ଥିଲେ ମଧ୍ୟ ଦୁରାବସ୍ଥା ନେଇ ସ୍ଥାନୀୟ ଲୋକେ ଅସନ୍ତୋଷ ପ୍ରକାଶ କରିଛନ୍ତି।
ଜିଲାର ଚଷାଖଣ୍ଡ ଓ ଓଡ଼ଙ୍ଗୀ ପଞ୍ଚାୟତ ସମେତ ମୟୂରଭଞ୍ଜ ଜିଲାର କୁରୁଣିଆ, ଯାଆଁରଶୁଳ ପଞ୍ଚାୟତର ହଜାର ହଜାର ଲୋକ ଉକ୍ତ ରାସ୍ତା ଦେଇ ଯା’ଆସ କରିଥାନ୍ତି। ଉକ୍ତ ରାସ୍ତା ନିର୍ମାଣ ନିମ୍ନମାନର ହୋଇଥିବାରୁ ମାତ୍ର କେତେବର୍ଷ ଭିତରେ ବିଭିନ୍ନ ସ୍ଥାନରେ ଖାଲଢ଼ିପ ସୃଷ୍ଟି ହୋଇଛି। ସ୍ଥାନେ ସ୍ଥାନେ ପିଚୁ ଉଠିଯାଇ ଗେଟି ଦେଖାଯାଉଛି। କଂକ୍ରିଟ୍ ରାସ୍ତା ଫାଟି ଆଁ ହୋଇଗଲାଣି। ଲୋକମାନେ ଯା’ଆସରେ ବିଭିନ୍ନ ସମସ୍ୟା ଦେଖାଦେଇଥିବା ବେଳେ ଛୋଟବଡ଼ ଦୁର୍ଘଟଣାରେ ଶୀକାର ହେଉଛନ୍ତି। ରାସ୍ତା ମରାମତି ପାଇଁ ଚୁକ୍ତି ହୋଇଥିବା ଅବଧି ପୂରଣ ପୂର୍ବରୁ ରାସ୍ତା ପରିସ୍ଥିତି ଶୋଚନୀୟ ହୋଇପଡିଥିବା ସ୍ଥାନୀୟ ଗ୍ରାମବାସୀ ଅଭିଯୋଗ କରିଛନ୍ତି। ଉକ୍ତ ରାସ୍ତାର ମରାମତି ପାଇଁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୧୦ଲକ୍ଷ ଟଙ୍କା ଦିଆଯାଇ ମରାମତି କରାଯାଇଥିଲା। ଏବେ ପୂର୍ବଭଳି ଅବସ୍ଥା ଲାଗି ରହିଛି।
୬୦ନଂ. ଜାତୀୟ ରାଜପଥ ନିକଟସ୍ଥ ଚଷାଖଣ୍ଡ ପଞ୍ଚାୟତ ଅଧୀନ ମଧୁପୁରା ଗ୍ରାମର ୫କି.ମି. ୬୦୦ମିଟର ରାସ୍ତା ପାଇଁ ଗ୍ରାମ ଉନ୍ନୟନ ବିଭାଗ ପକ୍ଷରୁ ଟ.୨,୭୧,୫୮୦୫୬.୫୮ ଅଟକଳରେ ରାସ୍ତା ନିର୍ମାଣ ହୋଇଥିଲା। ଗତ ୨୦୧୫ ଜାନୁୟାରୀ ୧୪ ତାରିଖରୁ କାର୍ଯ୍ୟ ଆରମ୍ଭ ହୋଇ ୨୦୧୬ ଜାନୁୟାରୀ ୧୩ରେ ଶେଷ ହୋଇଥିଲା। ଠିକାଦାରଙ୍କ ଦ୍ୱାରା ୫ବର୍ଷ ପାଇଁ ଉକ୍ତ ରାସ୍ତାର ଗ୍ୟାରେଣ୍ଟି ଅବଧି ଥିଲା। ଯାହା ଗତ ୨୦୨୧ ଜାନୁୟାରୀ ୧୨ତାରିଖରେ ଶେଷ ହୋଇଛି। ନିମ୍ନମାନର ରାସ୍ତା ନିର୍ମାଣ ହୋଇଥିବାରୁ ୨/୩ ବର୍ଷ ପୂର୍ବରୁ ଉକ୍ତ ରାସ୍ତାର ବିଭିନ୍ନ ସ୍ଥାନରେ ପିଚୁ ଉଠିଯାଇ ଖାଲଖମାରେ ପରିପୂର୍ଣ୍ଣ ହୋଇଛି। ବିଭାଗୀୟ ଅଧିକାରୀ କାମଚଳା କାର୍ଯ୍ୟ କରି ପୂର୍ବ ଅବସ୍ଥାରେ ରାସ୍ତାକୁ ଛାଡ଼ି ଦେଇଥିବା ଅଭିଯୋଗ ହେଉଛି। ଉଚ୍ଚପଦସ୍ଥ ଅଧିକାରୀଙ୍କ ସହ ଜିଲାପାଳଙ୍କ ଦୃଷ୍ଟି ଦେବା ପାଇଁ ଗ୍ରାମବାସୀ ନିବେଦନ କରିଛନ୍ତି।ଏନେଇ ବିଭାଗ ତରଫରୁ କାର୍ଯ୍ୟ ସମ୍ପାଦନା କରୁଥିବା ତତ୍କାଳୀନ ରେମୁଣାର ବିଭାଗୀୟ ସହକାରୀ ଯନ୍ତ୍ରୀ ରବୀନ୍ଦ୍ର ମିଶ୍ର କହିଛନ୍ତି, ଉକ୍ତ ରାସ୍ତାର ନିର୍ମାଣ କାର୍ଯ୍ୟ ବିଧିବଦ୍ଧ ଭାବେ ଏବଂ ଠିକ୍ ସମୟରେ ସମ୍ପନ୍ନ ହୋଇଛି। ବନ୍ୟା ଓ ବାତ୍ୟା ଯୋଗୁ ଉକ୍ତ ରାସ୍ତାର କେତେକ ସ୍ଥାନରେ ଖାଲଢ଼ିପ ସୃଷ୍ଟି ହୋଇଥିଲା। ଏଫ୍ଡିଆର୍ ଫଣ୍ଡସ୍ରୁ ଟଙ୍କା ମଞ୍ଜୁର କରାଯାଇ ମରାମତି କାର୍ଯ୍ୟ ଟେଣ୍ଡର ମାଧ୍ୟମରେ ହୋଇଥିବା ପ୍ରକାଶ କରିଥିଲେ।
