କଟକ ଅଫିସ, ୬।୪: ପୁନଃ ନିଯୁକ୍ତି ଦାବିରେ ଏସ୍ସିବିର ଚୁକ୍ତି ଭିତ୍ତିକ ନର୍ସ ଓ ଫାର୍ମାସିଷ୍ଟମାନେ ଅଧୀକ୍ଷକଙ୍କ କାର୍ଯ୍ୟାଳୟ ନିକଟରେ ସୋମବାର ଧାରଣାରେ ବସିଥିଲେ। ସେମାନଙ୍କ ଅଭିଯୋଗ ଅନୁଯାୟୀ, ୨୦୧୯ ମାର୍ଚ୍ଚ ୨୪ରୁ ସେମାନଙ୍କୁ ଚୁକ୍ତି ଭିତ୍ତିରେ କରୋନା ରୋଗୀଙ୍କ ଚିକିତ୍ସା ନିମନ୍ତେ ରଖାଯାଇଥିଲା। ପ୍ରତ୍ୟେକ ତିନି ମାସରେ ସେମାନଙ୍କ କାର୍ଯ୍ୟକାଳ ବୃଦ୍ଧି କରାଯାଇଥିଲା। ଏପରିକି ସେମାନେ କରୋନା ରୋଗୀଙ୍କର ସେବା କରିବାକୁ ଯାଇ ନିଜେ କରୋନାରେ ଆକ୍ରାନ୍ତ ହୋଇଥିଲେ। ଏପରିସ୍ଥଳେ ୨୦୨୧ ମାର୍ଚ୍ଚ ୩୧ରେ କେବଳ ୯ଜଣ ଫାର୍ମାସିଷ୍ଟ ଓ ୩୫ଜଣ ଷ୍ଟାଫନର୍ସଙ୍କୁ ରଖାଯାଇ ଅନ୍ୟମାନଙ୍କୁ ଛଟେଇ କରାଯାଇଛି। ଅନ୍ୟପକ୍ଷରେ କିଛି ଜିଲାରେ ଚୁକ୍ତିଭିତ୍ତିକ ଛଟେଇ ନର୍ସଙ୍କୁ ପୁନଃ ନିଯୁକ୍ତି ଦିଆଯାଇଥିବା ମଧ୍ୟ ସେମାନେ ଅଭିଯୋଗ କରିଛନ୍ତି। ଏହାକୁ ନେଇ ସୋମବାର ୨୫୨ ଷ୍ଟାଫନର୍ସ ଓ ଫାର୍ମାସିଷ୍ଟ ଧାରଣାରେ ବସିଥିଲେ। ଏସ୍ସିବି ଅଧୀକ୍ଷକ ଲୁସି ଦାସ କହିଛନ୍ତି, ଏସ୍ସିବିରେ କରୋନା ବେଡ୍ ୫୦୦ରୁ ୭୫କୁ କମେଇ ଦିଆଯାଇଛି। ଏଣୁ ଷ୍ଟାଫଙ୍କ ସଂଖ୍ୟା ସେହି ଅନୁପାତରେ କମାଯାଇଛି। ଯଦି ଏସ୍ସିବିରେ ପୁନର୍ବାର କରୋନା ବେଡ୍ ସଂଖ୍ୟା ବୃଦ୍ଧି କରାଯାଏ ତେବେ ଆମ ପକ୍ଷରୁ ବିଜ୍ଞାପନ ପ୍ରକାଶ ପାଇବ। ସେମାନେ ଚାହିଁଲେ ଦରଖାସ୍ତ କରିପାରିବେ।
