ଭୁବନେଶ୍ୱର, ୨୩।୫(ସୁନିତ୍ ମିଶ୍ର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭିଡିଓକୁ ନେଇ ବିଭିନ୍ନ ସମୟରେ ଭାଜପା ପ୍ରଶ୍ନ ଉଠାଉଛି। ଭିଡିଓରେ କୃତ୍ରିମ ବୁଦ୍ଧିମତ୍ତା (ଏଆଇ)ର ବ୍ୟବହାର କରାଯାଉଥିବା ଭାଜପା ନେତାମାନେ କିଛିଦିନ ହେବ ଅଭିଯୋଗ ମଧ୍ୟ କରୁଛନ୍ତି। ଭାଜପାର ଏଭଳି ଅଭିଯୋଗକୁ ନବୀନ ଏକ ଭିଡିଓରେ ହସ ମାଧ୍ୟମରେ ଉଡ଼ାଇ ଦେଇଛନ୍ତି। ଏହାସହ ଭାଜପା ଉଠାଉଥିବା ବୁଦ୍ଧିମତ୍ତାକୁ ସେ ତାଚ୍ଛଲ୍ୟ ମଧ୍ୟ କରିଛନ୍ତି। ନବୀନଙ୍କ ଏହି ଭିଡିଓଙ୍କୁ ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ୍ ନିଜ ସାମାଜିକ ଗଣମାଧ୍ୟମରେ ବୁଧବାର ଅପ୍ଲୋଡ୍ କରିଛନ୍ତି। ଉକ୍ତ ଭିଡିଓ ଜରିଆରେ ପାଣ୍ଡିଆନ୍ ନବୀନଙ୍କୁ ପଚାରୁଛନ୍ତି, ଭାଜପା ନେତାମାନେ ଅଭିଯୋଗ କରୁଛନ୍ତି ଆପଣଙ୍କ ଯେଉଁ ଭିଡିଓ କରାଯାଉଛି ସେଥିରେ ଏଆଇର ବ୍ୟବହାର କରାଯାଉଛି। ଉତ୍ତରରେ ନବୀନ କହିଛନ୍ତି, ଭଲକଥା, ସେମାନେ ମଧ୍ୟ ନିଜ ବୁଦ୍ଧିମତ୍ତାର ବ୍ୟବହାର କରନ୍ତୁ। ନବୀନଙ୍କ କେଇ ସେକେଣ୍ଡର ଏହି ଭିଡିଓ ସାମାଜିକ ଗଣମାଧ୍ୟମରେ ଅପ୍ଲୋଡ୍ ହେବାପରେ ତାହା ବ୍ୟାପକ ମାତ୍ରାରେ ପ୍ରଚାର ହେବାରେ ଲାଗିଛି।
