ସୁନ୍ଦରଗଡ, ରାଜଗାଙ୍ଗପୁର, ରାଉରକେଲା୧୧ା୫(ଜୟ ନାରାୟଣ ମେଣ୍ଡୁଳି/ ଅଶୋକ ପାଣି/ ଦିନେଶ ମିଶ୍ର): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଦିବାସୀଙ୍କୁ ଭଲ ପାଆନ୍ତି। ରାଜ୍ୟର ସବୁ ବର୍ଗର ଲୋକଙ୍କ ବିକାଶ ପାଇଁ ବିଭିନ୍ନ ଯୋଜନା କରିଛନ୍ତି। ଆପଣମାନଙ୍କୁ ୧୦୦ ୟୁନିଟ୍ ପର୍ଯ୍ୟନ୍ତ ମାଗଣାରେ ବିଜୁଳି ଯୋଗାଇ ଦିଆଯିବ। ଏଥିରେ ବିଶେଷକରି ଗ୍ରାମାଞ୍ଚଳର ଲୋକେ ଉପକୃତ ହେବେ ବୋଲି ବିଜେଡି ନେତା କାର୍ତ୍ତିକ ପାଣ୍ଡିଆନ ଶୁକ୍ରବାର ସୁନ୍ଦରଗଡ଼ ଜିଲା ତଳସରା ନିର୍ବାଚନମଣ୍ଡଳୀର ସବ୍ଡେଗା ମିନି ଷ୍ଟାଡିୟମରେ ଆୟୋଜିତ ନିର୍ବାଚନୀ ସଭାରେ ଯୋଗଦେଇ ଏହା କହିଛନ୍ତି।
ପାଣ୍ଡିଆନ କହିଥିଲେ, ଆପଣମାନେ ଯାହାକୁ ଏମ୍ପି ଓ ଏଠାକାର ବିଧାୟକ ଭାବେ ନିର୍ବାଚିତ କରି ପଠାଇଥିଲେ, ସେମାନେ କେବେ ଆପଣଙ୍କ ସମସ୍ୟା କଥା ଉଠାଇ ନାହାନ୍ତି। ହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଞ୍ଚଳର ରାସ୍ତା ଘାଟ ଓ ଅନ୍ୟାନ୍ୟ ଉନ୍ନତି ପାଇଁ ଅନୁଦାନ ଯୋଗାଇ ଦେଇଛନ୍ତି। ଅଞ୍ଚଳର ଆହୁରି ଉନ୍ନତି ପାଇଁ ଲୋକ ସଭା ପ୍ରାର୍ଥୀ ଦିଲୀପ ତିର୍କୀ ଓ ତଳସରା ବିଧାୟକ ପ୍ରାର୍ଥୀ ବିନୟ ଟପ୍ପୋଙ୍କୁ ବିଜୟୀ କରି ୬ଷ୍ଠଥର ପାଇଁ ନବୀନଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ସେ ନିବେଦନ କରିଥିଲେ। ମୁଖ୍ୟମନ୍ତ୍ରୀ ମହିଳା, ଯୁବ ଓ ଛାତ୍ରଙ୍କୁ ସଶକ୍ତ କରିବା ପାଇଁ ସ୍ବତନ୍ତ୍ର ଋଣ ଓ କଲେଜ ଛାତ୍ରୀଙ୍କୁ ୧୪ହଜାର ଓ ଛାତ୍ରଙ୍କୁ ୧୨ହଜାର ଟଙ୍କା ଷ୍ଟାଇପେଣ୍ଡ ପ୍ରଦାନ ପାଇଁ ନିର୍ବାଚନ ଇସ୍ତାହାରରେ ଘୋଷଣା କରିଥିବା କହିଥିଲେ। ଏହି ସଭାରେ ଦିଲୀପ, ବିନୟ ଉପସ୍ଥିତ ଥିଲେ। ଏହି ଅବସରରେ ରାଜ୍ୟ ଯୁବ ବିଜେଡି କାର୍ଯ୍ୟକାରୀ ସଭାପତି ତଥା ତଳସରା ସହ ପର୍ଯ୍ୟବେକ୍ଷକ ବୈକୁଣ୍ଠ ନାଏକ, ଜିଲା ଯୁବ ବିଜେଡି ସଭାପତି ଦେବେନ୍ଦ୍ର ମାଝିଙ୍କ ନେତୃତ୍ୱରେ ପାଣ୍ଡିଆନଙ୍କୁ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା। ସଭାରେ ବହୁସଂଖ୍ୟାରେ ମହିଳା ପୁରୁଷ ଉପସ୍ଥିତ ଥିଲେ।
ଏହା ପରେ ପାଣ୍ଡିଆନ ରାଜଗାଙ୍ଗପୁର ଗସ୍ତ କରି ଜାମପାଲି ଖେଳପଡିଆରେ ଏକ ନିର୍ବାଚନୀ ସଭାରେ ଯୋଗ ଦେଇଥିଲେ। ଉପସ୍ଥିତ ଜନତାଙ୍କୁ ଉଦ୍ବୋଧନ ଦେଇ କହିଥିଲେ, ସୁନ୍ଦରଗଡକୁ ଏକ ନୂଆ ପରିଚୟ ମୁଖ୍ୟମନ୍ତ୍ରୀ ଦେଇଛନ୍ତି। ମୁଖ୍ୟମନ୍ତ୍ରୀ କଥାରେ ନୁହେଁ, କାମରେ ବିଶ୍ବାସ କରନ୍ତି। ଅଞ୍ଚଳର ଯାହାସବୁ କାମ ରହିଯାଇଛି ସେସବୁ ପୂରଣ ହେବ ବୋଲି ପାଣ୍ଡିଆନ ପ୍ରତିଶ୍ରୁତି ଦେଇଥିଲେ। ବିଜେଡି କର୍ମୀଙ୍କୁ ବହୁ ପରିଶ୍ରମ କରିବା ପାଇଁ ପାଣ୍ଡିଆନ କହିଥିଲେ। ଏହି ଅବସରରେ ମଞ୍ଚରେ ତାଙ୍କ ସହ ଦିଲୀପ ତିର୍କୀ, ଅନିଲ ବରୁଆ, ମଙ୍ଗଳା କିଷାନ ଉପସ୍ଥିତ ଥିଲେ। ଶେଷରେ ରାଉରକେଲା ଗସ୍ତ କରି ବିଜେଡି ପକ୍ଷରୁ ଆୟୋଜିତ ରୋଡ୍ ଶୋ’ରେ ଯୋଗଦେଇଥିଲେ। ସନ୍ଧ୍ୟା ସାଢ଼େ ୭ଟାରେ ପାଣ୍ଡିଆନ ରାଉରକେଲା ବିଶ୍ରାଛକରୁ ଶୋଭାଯାତ୍ରାରେ ବାହାରି ମେନରୋଡ୍ ଦେଇ ଟ୍ୟାକ୍ସିଷ୍ଟାଣ୍ଡ୍, ନାଲାରୋଡ୍, ଡେଲିମାର୍କେଟ, ମଙ୍ଗଳ ଭବନ ହୋଇ ଉଦିତନଗର ଆମ୍ବେଡ୍କର ଛକରେ ପହଞ୍ଚଥିଲେ। ସେଠାରୁ ପୁଣି ବାସନ୍ତୀ କଲୋନୀ ଦେଇ ଲେବର ଟୁର୍ନାମେଣ୍ଟ ହୋଇ ଜୈନ ମନ୍ଦିର ଓ ଶେଷରେ ପାନପୋଷ ସ୍ଥିତ ଗାନ୍ଧୀଛକରେ ପହଞ୍ଚତ୍ଥିଲେ। ଏଥିରେ ଶତାଧିକ ବିଜେଡି କର୍ମୀ ଯୋଗଦେଇଥିଲେ। ଏହି ରୋଡ୍ ଶୋ’ରେ ରାଉରକେଲା ବିଧାୟକ ପ୍ରାର୍ଥୀ ସାରଦା ପ୍ରସାଦ ନାୟକ, ଦିଲୀପ ତିର୍କୀଙ୍କ ସହ ବହୁ ବିଜେଡି କର୍ମୀ ଉପସ୍ଥିତ ଥିଲେ।
