ରସୁଲପୁର,୧୪ା୭(ଡି.ଏନ.ଏ.): ପରିବର୍ତ୍ତିତ ପାଣିପାଗ କୃଷିକ୍ଷେତର ସ୍ଥିତି ବିଗାଡ଼ି ଦେଉଛି। ବର୍ଷା, ଖରା ଓ ଶୀତର ଅନିୟମିତତା ଯୋଗୁ ଫସଲରେ ନାନା ଅଚିହ୍ନା ରୋଗ ଦେଖାଯାଉଛି। ତେବେ ଏହି ରୋଗ ନିୟନ୍ତ୍ରଣ କରିବାରେ ଚାଷୀ ଅସମର୍ଥ ହେଉଥିବାବେଳେ ଏବେ ପରିବା ଚାଷରେ ପତ୍ର ହଳଦିଆ ରୋଗ ଚାଷୀଙ୍କ ଚିନ୍ତାର କାରଣ ପାଲଟିଛି। ଉକ୍ତ ରୋଗ ପାଇଁ ଫସଲ ଉପତ୍ାଦନ କମିଯାଉଛି। ରୋଗପୋକ ନିୟନ୍ତ୍ରଣରେ ଯେତିକି ଖର୍ଚ୍ଚ ହେଉଛି, ଚାଷୀ ଉପତ୍ାଦିତ ଦ୍ରବ୍ୟକୁ ବିକ୍ରିକରି ସେତିକି ପାଇବା କଷ୍ଟକର ହୋଇପଡୁଛି। ଏଭଳି ସ୍ଥିତିରେ ପାଣିପାଗ ଉପଯୋଗୀ ଫସଲ ଚାଷ କରିବାକୁ ଚାଷୀ ଚିନ୍ତା କରୁଛନ୍ତି।
ଦେଖିବାକୁ ଗଲେ ରସୁଲପୁର ବ୍ଲକ ଅଞ୍ଚଳରେ ଖରିଫ ଓ ରବି ଋତୁରେ ଅଧିକାଂଶ କ୍ଷେତରେ ପରିବା ଚାଷ କରାଯାଇଥାଏ। ଏହାବାଦ୍ ଚାଷୀ ଖରାଦିନିଆ ପରିବା ଫସଲ ଚାଷ କରନ୍ତି। କିନ୍ତୁ ଏବେ ଖରାଦିନିଆ ଓ ଖରିଫ ଋତୁରେ ଚାଷ ହୋଇଥିବା ପରିବା ଫସଲରେ ପତ୍ର ହଳଦିଆ ଓ ଜଉ ରୋଗପୋକର ପାର୍ଦୁଭାବ ବଢିଯାଇଛି। ପରିବା ଚାଷ ଭାବରେ ଜହ୍ନି, କଲରା, ଛଚିନ୍ଦ୍ରା, ବାଇଗଣ, ଭେଣ୍ଡି, ଝୁଡଙ୍ଗ, କାକୁଡି ଆଦିକୁ ଚାଷୀ ଗୁରୁତ୍ୱ ଦେଉଛନ୍ତି। ଚାଷ ପ୍ରାରମ୍ଭରେ କ୍ଷେତ ଭଲଭାବରେ ବଢୁଛି। ମାତ୍ର ଗଛ ଲତାରେ ଫୁଲ ଫଳ ଧରିବା ସମୟରେ ପତ୍ର ହଳଦିଆ ରୋଗ ଓ ଜଉ ରୋଗପୋକ ଅଧିକ ଲାଗୁଥିବା ଦେଖାଯାଉଛି। ଗଛର ଉପର ପତ୍ର ସୁବୁଜ ରଙ୍ଗର ରହୁଛି। ମାତ୍ର ତଳ ପତ୍ରଗୁଡିକ ହଳଦିଆ ହୋଇଯାଉଛି। ଫଳନ୍ତି ଗଛରୁ ଫୁଲଫଳ ସୁଖି ଝଡି ଯାଉଛି। ରୋଗପୋକ ଦାଉରୁ ରକ୍ଷା ପାଇବା ପାଇଁ ଚାଷୀ ନାନା କୀଟନାଶକ ସିଞ୍ଚନ କରୁଛନ୍ତି। କେତେକ କ୍ଷେତ୍ରରେ କୀଟନାଶକର ପ୍ରଭାବ ରହୁ ନ ଥିବାରୁ ପରିବା କ୍ଷେତଗୁଡିକ ଉଜୁଡି ଯାଉଛି। ଫଳରେ ଚାଷୀଙ୍କୁ କ୍ଷତି ସହିବାକୁ ପଡୁଛି। ଜମିର ଉର୍ବରତା କମିଯାଉଛି, ମାଟିରେ ଆବଶ୍ୟକ ଅନୁଯାୟୀ ପୋଷଣ ରହୁନାହିଁ। କ୍ଷେତକୁ ଯଥେଷ୍ଟ ଭିଟାମିନ ମିଳିପାରୁ ନାହିଁ। ଚାଷୀ ପରିବା ଚାଷ ଆରମ୍ଭରେ ଅଧିକ ରାସାୟନିକ ସାର ଓ କୀଟନାଶକ ବ୍ୟବହାର କରି ଗଛର ରୋଗ ପ୍ରତିରୋଧକ ଶକ୍ତି କମାଇ ଦେଉଛନ୍ତି। ଜୈବିକ ପ୍ରଣାଳୀରେ କୃଷିକାର୍ଯ୍ୟ କରିବା ଦିଗରେ ଚାଷୀ ଆଗ୍ରହ ପ୍ରକାଶ କରୁନାହାନ୍ତି। ଏଭଳି ସ୍ଥିତିରେ ଗଛ ଗୁଡିକର ରୋଗ ପ୍ରତିଶୋଧକ ଶକ୍ତି କମି ଯାଉଛି। ତେବେ ପାଣିପାଗର ଦ୍ରୁତ ପରିବର୍ତ୍ତନ ଯୋଗୁ ରୋଗପୋକ ପ୍ରଭାବୀ ହୋଇପଡୁଛନ୍ତି ବୋଲି କୁହାଯାଉଛି। ଏ ସମ୍ପର୍କରେ ରସୁଲପୁର ବ୍ଲକ କୃଷି ଅଧିକାରୀ ବିଶ୍ୱଜୟୀ ମିଶ୍ରଙ୍କୁ ପଚାରିବାରୁ ସେ କହିଛନ୍ତି, ମାଟିର ଆଦ୍ରତାରେ ତାରତମ୍ୟ ରହୁଥିବାରୁ ଧଳାମାଛି ଗଛଲତାର ତଳ ପତ୍ରଗୁଡିକରୁ ରସ ଶୋଷି ନେଉଛନ୍ତି। ଫଳରେ ଗଛକୁ ପତ୍ର ହଳଦିଆ ରୋଗ ଧରୁଛି। ଗଛକୁ ଉପଯୁକ୍ତ ଖାଦ୍ୟ ମିଳୁ ନ ଥିବାରୁ ଉପତ୍ାଦନ କମି ଯାଉଛି। ତେବେ ପାଣିପାଗର ପରିବର୍ତ୍ତିତ ସ୍ଥିତି ଯୋଗୁ ଏଭଳି ଘଟୁଛି। ଚାଷୀ କ୍ଷେତରେ ହଳଦିଆ ରଙ୍ଗର ଅଠାପଟି ବ୍ୟବହାର କରିବା ସହ କୃଷି ବିଜ୍ଞାନୀଙ୍କ ସହ ପରାମର୍ଶକରି ପଦକ୍ଷେପ ନେଲେ ଏହି ରୋଗପୋକ ଦାଉରୁ ରକ୍ଷା ପାଇପାରିବେ ବୋଲି ସେ ମତ ରଖଛନ୍ତି।
