ନୂଆଦିଲ୍ଲୀ: କରୋନା ଦ୍ୱାରା ଅର୍ଥ ବ୍ୟବସ୍ଥା ବର୍ତ୍ତମାନ କ୍ଷତିଗ୍ରସ୍ତ ହୋଇ ରହିଛି। ସରକାର ପୂର୍ବରୁ ପ୍ରାୟ ୨୦ ଲକ୍ଷ କୋଟି ଟଙ୍କାର ପ୍ୟାକେଜ ଘୋଷଣା କରିଥିଲେ। ପୁଣି ଥରେ ଆଉ ଏକ ପ୍ୟାକେଜ ଆଣିବା ଦିଗରେ କାର୍ଯ୍ୟକ୍ରମ ଜାରି ରହିଥିବା ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ଏ ନେଇ ବର୍ତ୍ତମାନ ବିଭିନ୍ନ ମନ୍ତ୍ରଣାଳୟ ଏବଂ କ୍ଷେତ୍ରର ପରାମର୍ଶ ଗ୍ରହଣ କରାଯାଇଥିବା ଅର୍ଥନୈତିକ ବ୍ୟାପାର ସଚିବ ତରୁଣ ବଜାଜ ଏକ କାର୍ଯ୍ୟକ୍ରମରେ ସୂଚନା ଦେଇଛନ୍ତି। ଚାହିଦା ଫେରାଇ ଆଣିବା ଦିଗରେ ପ୍ରୋତ୍ସାହନ ପ୍ୟାକେଜ ଉପରେ ସରକାର ଧ୍ୟାନ ଦେଇପାରନ୍ତି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଥିଲେ। ଅନ୍ୟ ଏକ ପ୍ରୋତ୍ସାହନ ପ୍ୟାକେଜ ଆଣିବା ଉପରେ ବିକଳ୍ପ ବନ୍ଦ ହୋଇ ନାହିଁ। କେନ୍ଦ୍ର ସରକାର ନିରନ୍ତର ଭିତ୍ତିରେ ପଦକ୍ଷେପ ଜାରି ରଖିଛନ୍ତି। ଅନେକ ପ୍ରସଙ୍ଗ ବିଚାର କରିବାକୁ ରହିଛି ବୋଲି ବଜାଜ ମତ ରଖିଛନ୍ତି।
କରୋନାର ପ୍ରଭାବ ଅର୍ଥ ବ୍ୟବସ୍ଥା ଉପରେ କିଭଳି ରହିଛି ତା’ର ଆକଳନ କରିବା ଲାଗି କେନ୍ଦ୍ର ସରକାର ପ୍ରକ୍ରିୟା ଆରମ୍ଭ କରିଛନ୍ତି। କେତେ ପରିମାଣର ଜିଡିପି ଏହା ଦ୍ୱାରା ପ୍ରଭାବିତ ହୋଇଛି ତା’ର ମଧ୍ୟ ଆକଳନ କରାଯିବ। ସୂଚନାଯୋଗ୍ୟ ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଜିଡିପି ୨୩.୯% ହ୍ରାସ ଘଟିଛି। ଜିଡିପି ପ୍ରାୟ ୧୦ରୁ ୧୫% ଖସିବ ବୋଲି ବିଶ୍ୱସ୍ତରୀୟ ଏଜେନ୍ସିଗୁଡ଼ିକ ଆକଳନ କରିଛନ୍ତି। ପୂର୍ବରୁ ଭାରତ ମାନ୍ଦାବସ୍ଥା ସହ ଲଢ଼େଇ କରୁଥିଲା। କରୋନା ଆସିବା ଫଳରେ ଏହା ବଜାରକୁ ଶକ୍ତ ଧକ୍କା ଦେଇଛି। ପୂର୍ବରୁ ଘୋଷଣା ହୋଇଥିବା ପ୍ୟାକେଜରେ ସରକାର ବିତ୍ତୀୟ ସହାୟତା ଭାବେ ପ୍ରାୟ ୨ ଲକ୍ଷ କୋଟି ଟଙ୍କା ପ୍ରଦାନ କରିଥିଲେ। ଏହା ଜିଡିପିର ମାତ୍ର ୧% ରହିଥିଲା। ୨୦ ଲକ୍ଷ କୋଟିର ପ୍ୟାଜେକ ମଧ୍ୟରୁ ଅଧିକାଂଶ ଋଣ ସହାୟତା ରହିଥିଲା। ହେଲେ ବଜାରରେ ଚାହିଦା ନ ଥିବା ପ୍ରଭାବିତ କମ୍ପାନୀ କିମ୍ବା ବ୍ୟକ୍ତିବିଶେଷ ଋଣ ପ୍ୟାଜେକ ଦ୍ୱାରା ଲାଭବାନ୍ ହେବେ ନାହିଁ ବୋଲି ବିଶେଷଜ୍ଞ କହିଥିଲେ। ସରକାରଙ୍କ ପ୍ୟାଜେକ ପରେ ବଜାରରେ ଚାହିଦା ଫେରିପାରୁନାହିଁ। ନିକଟରେ ଏହାକୁ ନଜରରେ ରଖି କେନ୍ଦ୍ର ସରକାର ଚାହିଦା ବଢ଼ାଇବା ଲାଗି ୭୩ ହଜାର କୋଟି ଟଙ୍କାର ଆଉ ଏକ ଘୋଷଣା କରିଥିଲେ। ଏହା ବିଶେଷକରି ସରକାରୀ କର୍ମଚାରୀଙ୍କ ଲାଗି ରହିଥିଲା। କ୍ୟାଶ୍ ଭାଉଚର ସ୍କିମ୍, ଅଗ୍ରିମ, ବୋନସ ଏବଂ ପୁଞ୍ଜି ଖର୍ଚ୍ଚ ଏହା ମଧ୍ୟରେ ସାମିଲ ରହିଛି। ପ୍ରଭାବିତ ବଜାର ସ୍ଥିତିରେ ସରକାରଙ୍କ ଆଗାମୀ ପଦକ୍ଷେପ କ’ଣ ରହୁଛି ତାହା ଦେଖିବାକୁ ବାକି ରହିଲା।
