ବାହାନଗା/ବାଲେଶ୍ୱର ଅଫିସ,(ଡି.ଏନ.ଏ.)/ଭୁବନେଶ୍ୱର, ୧୨ା୬ (ବ୍ୟୁରୋ): ଟ୍ରେନ ଦୁର୍ଘଟଣାର ୧୦ଦିନ ପରେ ରବିବାର ବାହାନଗା ଷ୍ଟେଶନମାଷ୍ଟରଙ୍କ ସମେତ ଆସିଷ୍ଟାଣ୍ଟ ଷ୍ଟେଶନମାଷ୍ଟର ଓ ଟେକ୍ନିସିଆନଙ୍କୁ ଉଠାଇ ନେଇଛି ସିବିଆଇ। ଅଜ୍ଞାତ ସ୍ଥାନରେ ରଖି ପଚରାଉଚରା କରିବା ସହ ସେମାନଙ୍କ ସିଡିଆର୍ ଯାଞ୍ଚ କରୁଥିବା ସୂଚନା ମିଳିଛି।
ଗତ ୨ତାରିଖ ସନ୍ଧ୍ୟାରେ ଘଟିଥିବା ଟ୍ରେନ୍ ଦୁର୍ଘଟଣାରେ ୨୮୮ ଯାତ୍ରୀଙ୍କର ମୃତ୍ୟୁ ହୋଇଥିଲା। ଏବେ ବି ଶତାଧିକ ଯାତ୍ରୀ ଚିକିତ୍ସାଧୀନ ଅଛନ୍ତି। ସିଗ୍ନାଲ ତ୍ରୁଟିଜନିତ କାରଣରୁ ଏହି ଦୁର୍ଘଟଣା ଘଟିଥିବା କୁହାଯାଉଥିବାବେଳେ ଏହାର ସତ୍ୟାସତ୍ୟ ସମ୍ପର୍କରେ ସିବିଆଇ ତଦନ୍ତ କରୁଛି ା ତେବେ ସିବିଆଇ ଯାଞ୍ଚବେଳେ ବଡ଼ ତଥ୍ୟ ସାମ୍ନାକୁ ଆସିଛି।
୨ ତାରିଖ ସକାଳେ ଆସିଷ୍ଟାଣ୍ଟ ଷ୍ଟେଶନମାଷ୍ଟରଙ୍କୁ ଏହି ତ୍ରୁଟି ବିଷୟରେ କର୍ମଚାରୀମାନେ ଅବଗତ କରାଇଥିଲେ। ଟେକ୍ନିସିଆନଙ୍କୁ ଡକାଯାଇଥିଲେ ମଧ୍ୟ ସେ ଆସିବାରେ ବିଳମ୍ବ ହେବାରୁ ତାଙ୍କୁ ଷ୍ଟେଶନମାଷ୍ଟର ବାରମ୍ବାର ଫୋନ୍ କରିଥିଲେ। ଏପରିକି ଟ୍ରେନ୍ ଯିବ ବୋଲି ଅସ୍ଥାୟୀ ଭାବେ ଠିକ୍ କରିବାକୁ କହିଥିଲେ। ଟେକ୍ନିସିଆନ ପୂର୍ବାହ୍ନ ୧୧ଟାବେଳେ ସିଗ୍ନାଲ ସିଷ୍ଟମକୁ ଅସ୍ଥାୟୀ ଭାବେ ଠିକ୍ କରିଦେଇଥିଲେ। ତେବେ ଉକ୍ତ ସିଗ୍ନାଲ ଠିକ୍ ଭାବେ କାମ କରୁଛି କି ନାହିଁ ସେ ନେଇ ଷ୍ଟେଶନମାଷ୍ଟର ଯାଞ୍ଚ କରି ନ ଥିଲେ। ଫଳରେ ସନ୍ଧ୍ୟା ସମୟରେ ସେଥିରେ ପୁନର୍ବାର ଗଡବଡ ଦେଖାଦେଇଥିଲା, ଯେଉଁଥିପାଇଁ ଦୁର୍ଘଟଣା ଘଟିଲା ବୋଲି ସିବିଆଇ ଜାଣିବାକୁ ପାଇଥିବା ସୂଚନା ମିଳିଛି।
ଏନେଇ ଦକ୍ଷିଣ-ପୂର୍ବ ରେଳପଥର ସିପିଆର୍ଓ ଆଦିତ୍ୟ ଚୌଧୁରୀ କହିଛନ୍ତି, ଲାଗାତାର ଭାବେ ସିବିଆଇର ଅଧିକାରୀମାନେ ଘଟଣାସ୍ଥଳ ପରିଦର୍ଶନ କରିବା ସହ ତଥ୍ୟ ସଂଗ୍ରହ କରୁଛନ୍ତି। ଦାୟିତ୍ୱରେ ଥିବା ଅଧିକାରୀ, କର୍ମଚାରୀଙ୍କୁ ପଚରାଉଚରା କରୁଛି। ଖୁବ୍ଶୀଘ୍ର ଦୁର୍ଘଟଣା ପଛରେ କାହାର ଷଡଯନ୍ତ୍ର ଥିଲା କି ଟେକ୍ନିକାଲ ସିଷ୍ଟମ୍ରେ ଭୁଲ୍ ଥିଲା ତାହାର ପ୍ରମାଣ ସିବିଆଇ ପାଇଯିବ।
