କଟକ ଅଫିସ,୨୪ା୭: କଳାହାଣ୍ଡି ଜିଲା ଲାଞ୍ଜିଗଡ଼ ଥାନା ଅନ୍ତର୍ଗତ ଜଗନ୍ନାଥପୁର ଗ୍ରାମ ନିକଟ ସରକାରୀ ଜମିରେ ବେଦାନ୍ତ କମ୍ପାନୀ କୋଠା ନିର୍ମାଣ କରୁଛି। ବିନା ଗ୍ରାମସଭାରେ ବେଦାନ୍ତକୁ ଜମି ହସ୍ତାନ୍ତର ନେଇ ଗ୍ରାମବାସୀଙ୍କ ତରଫରୁ ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଥିଲା। ବିଚାରପତି ବିଶ୍ୱନାଥ ରଥ ମାମଲାର ଶୁଣାଣି କରି ଗ୍ରାମବାସୀଙ୍କ ଅଭିଯୋଗର ତଦନ୍ତ ପାଇଁ କଳାହାଣ୍ଡି ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି। କମ୍ପାନୀର ନିର୍ମାଣ ଦ୍ୱାରା ପ୍ରଭାବିତ ହେବାକୁ ଥିବା ବ୍ୟକ୍ତି ଏବଂ ଅଭିଯୋଗକାରୀଙ୍କ ଅଭିଯୋଗର ଶୁଣାଣି ସହ ୬ ସପ୍ତାହ ମଧ୍ୟରେ ପଦକ୍ଷେପ ନେବାକୁ ହାଇକୋର୍ଟ ନିର୍ଦ୍ଦେଶରେ ସ୍ପଷ୍ଟ କରିଛନ୍ତି। ଯଦି ବିବାଦୀୟ ଜମିରେ କୌଣସି ନିର୍ମାଣ କାର୍ଯ୍ୟ ଚାଲିଛି, ତେବେ ଆସନ୍ତା ୬ ସପ୍ତାହ ପର୍ଯ୍ୟନ୍ତ ନିର୍ମାଣ କାର୍ଯ୍ୟ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି।
ମାମଲାର ବିବରଣୀରୁ ପ୍ରକାଶ ଯେ, ଗ୍ରାମ ନିକଟ ପ୍ରାୟ ୫୦ ଏକର ଜମିରେ ବେଦାନ୍ତ କମ୍ପାନୀ ତରଫରୁ ବିଭିନ୍ନ ନିର୍ମାଣ କାର୍ଯ୍ୟ ଚାଲିଛି। ଏକ ଠିକା ସଂସ୍ଥା ଦ୍ୱାରା ନିର୍ମାଣ କରାଯାଉଛି। ଉଭୟ ଜଗନ୍ନାଥପୁର ଓ କେନ୍ଧୁବଡ଼ି ଗ୍ରାମ ହେଉଛି ଅନୁସୂଚିତ ଅଞ୍ଚଳ। ବିଭିନ୍ନ ଶିଳ୍ପ ସଂସ୍ଥା ଧୀରେ ଧୀରେ ଗ୍ରାମର ପତିତ ଜମିକୁ ଦଖଲ କରୁଛନ୍ତି। ପୂର୍ବରୁ ପ୍ରାୟ ୧୫୦ ଏକର ଜମି ଏଭଳି ଭାବେ ଦଖଲକୁ ଚାଲିଯାଇଛି। ଗ୍ରାମର ସରକାରୀ ଜମିକୁ ଶିଳ୍ପସଂସ୍ଥାଗୁଡ଼ିକ ଦଖଲ କରୁଥିବା ନେଇ ୨୦୧୮ ଜୁନ୍ ୨୩ରେ କଳାହାଣ୍ଡି ଜିଲାପାଳଙ୍କ ନିକଟରେ ଅଭିଯୋଗ କରାଯାଇଥିଲା। ଅନୂସୂଚିତ ଅଞ୍ଚଳ ହୋଇଥିବାରୁ ଶିଳ୍ପ ସଂସ୍ଥାଗୁଡ଼ିକ ଜମି ହସ୍ତାନ୍ତର କରିବା ପୂର୍ବରୁ ଗ୍ରାମସଭାର ଅନୁମୋଦନ ଆବଶ୍ୟକ। ଏଥିପାଇଁ ପ୍ରୋଭିଜନ୍ସ ଅଫ୍ ଦ ପଞ୍ଚାୟତ (ଏକ୍ସଟେନ୍୍ସନ୍ ଟୁ ଦ ସିଡିଲ୍ୟୁଡ୍ ଏରିଆ) ଆକ୍ଟ-୧୯୯୬ ରହିଛି। କିନ୍ତୁ ପ୍ରଶାସନ ଏହାକୁ ଅଣଦେଖା କରୁଛି। ଏହି ଜମିରେ ଗ୍ରାମବାସୀ ଦୀର୍ଘବର୍ଷ ହେଲା ଚାଷ କରିଆସୁଛନ୍ତି। ତେଣୁ ଜମି କିପରି ହସ୍ତାନ୍ତର କରାଗଲା ସେନେଇ କାରଣ ଦର୍ଶାଅ ନୋଟିସ୍ ଜାରି ସହ ଗ୍ରାମସଭାର ଅନୁମତି ବିନା ଜମି ହସ୍ତାନ୍ତର ନ କରିବା ପାଇଁ ନିର୍ଦ୍ଦେଶ ଦେବାକୁ ଆବେଦନରେ ପ୍ରାର୍ଥନା କରାଯାଇଥିଲା। ଏଥିରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ, କଳାହାଣ୍ଡି ଜିଲାପାଳ, ଲାଞ୍ଜିଗଡ଼ ତହସିଲଦାର, ବେଦାନ୍ତକୁ ପକ୍ଷଭୁକ୍ତ କରାଯାଇଥିଲା। ଆବେଦନକାରୀଙ୍କ ପକ୍ଷରୁ ଆଇନ୍ଜୀବୀ ଶଙ୍କର ପ୍ରସାଦ ପାଣି ମାମଲା ପରିଚାଳନା କରୁଛନ୍ତି।
