ପରଜଙ୍ଗ,୩।୮(ଡି.ଏନ.ଏ.)-ଢେଙ୍କାନାଳ ଜିଲା ପରଜଙ୍ଗ ଥାନା ମହାବିରୋଡ ଫାଣ୍ଡି ଅଧିନ ୧୪୯ ନଂ. ଜାତୀୟ ରାଜପଥର ଘାଘରାମୁଣ୍ଡା ଛକ ନିକଟରେ ସୋମବାର ଭୋର ସମୟରେ ଦୁର୍ଘଟଣା ଘଟିଛି। ଏକ ଟ୍ରକକୁ କାର ଧକ୍କା ଦେବାରୁ ଘଟଣାସ୍ଥଳରେ ୨ ଜଣଙ୍କ ମୃତ୍ୟୁ ଘଟିଛି। ମୃତକ ହେଲେ ମୟୁରଭଞ୍ଜ ଜିଲା ତିରିଙ୍ଗି ଥାନା ଇନ୍ଦିକୋଲି ଗ୍ରାମର ନାଲକୋ କର୍ମଚାରୀ ଫଗୁରାମ ସୋରେନଙ୍କ ପୁଅ କଲ୍ୟାଣ ସୋରେନ(୨୯) ଏବଂ ରାଇରଙ୍ଗପୁର ଥାନା ତୁରୁଷିବୁନି ଗ୍ରାମର ନାଲକୋ କର୍ମଚାରୀ ବାଜିନାଥ ହେମ୍ଭ୍ରମଙ୍କ ପୁଅ ବାଗନ ହେମ୍ଭ୍ରମ (୨୭)। ସେହିପରି ନାଲୋକର ବିନୟ କୁଜୁର (୨୭) ଦୁର୍ଘଟଣାରେ ଆହାତ ହୋଇଛନ୍ତି।
ଘଟଣାରୁ ଜଣାପଡିଛି, କଲ୍ୟାଣ, ବାଗନ ଉଭୟେ ତାଙ୍କ ସାଙ୍ଗ ଘର ପାଲଲହଡାକୁ କାର ଯୋଗେ ରବିବାର ଯାଇଥିଲେ। ସେଠାରେ ଭୋଜିଭାତ ଖାଇ ସାରି ସୋମବାର ଭୋରୁ ନାଲୋକ ଅଭିମୁଖେ ଫେରୁଥିବାବେଳେ ଦୁର୍ଘଟଣାର ସମ୍ମୁଖୀନ ହୋଇଥିଲେ। ଖବରପାଇ ଥାନାଧିକାରୀ ସୋଭାଗ୍ୟ ସ୍ବାଇଁ, ମହାବିରୋଡ଼ ଫାଣ୍ଡି ଅଧିକାରୀ ସୌମ୍ୟରେନ୍ଦ୍ର ସାମଲ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପରଜଙ୍ଗ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଛି। ଦୁର୍ଘଟଣାଗ୍ରସ୍ତ ଗାଡିକୁ ପୋଲିସ ଜବତ କରି ତଦନ୍ତ ଚଳାଇଛି।
