ନୂଆଦିଲ୍ଲୀ: ଲଗାତର ୬ ଦିନ ହେବ ଦେଶର ପୁଞ୍ଜି ବଜାରରେ ଊର୍ଦ୍ଧ୍ୱଗାମୀ ଧାରା ଲାଗି ରହିଛି। ଶୁକ୍ରବାର ସେନ୍ସେକ୍ସ ୭୦ ପଏଣ୍ଟ ବଢିବା ଯୋଗୁ ନୂଆ ଉଚ୍ଚତମ ସ୍ତରରେ ପହଞ୍ଚିଯାଇଛି। ଇନ୍ଫୋସିସ୍, ଆଇସିଆଇସିଆଇ ବ୍ୟାଙ୍କ, ଟିସିଏସ୍ ଏବଂ ରିଲାଏନ୍ସ ଇଣ୍ଡଷ୍ଟ୍ରିଜ ଶେୟାର କାରବାର ବେଶ୍ ଉନ୍ନତ ସ୍ଥିତିରେ ରହିଛି। ୩୦ ଶେୟାର ବିଶିଷ୍ଟ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ କାରବାର ଦିନ ମଧ୍ୟରେ ୪୭,୦୨୬ ଅଙ୍କ ଛୁଇଁବାକୁ ସକ୍ଷମ ହୋଇଥିଲା। କାରବାର ଶେଷ ହେବା ବେଳକୁ ସେନ୍ସେକ୍ସ ୭୦.୩୫ ପଏଣ୍ଟ ବା ୦.୧୫% ଊର୍ଦ୍ଧ୍ୱରେ ରହି ୪୬,୯୬୦ ପଏଣ୍ଟ ସ୍ତରରେ ବନ୍ଦ ରହିଛି। ଏହା ସେନ୍ସେକ୍ସର ନୂଆ ରେକର୍ଡ ବୋଲି ଜଣାପଡିଛି। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ ନିଫ୍ଟି ୧୯.୮୫ ପଏଣ୍ଟ ବା ୦.୧୪% ଊର୍ଦ୍ଧ୍ୱରେ ରହି ୧୩,୭୬୦ ପଏଣ୍ଟ ସହ ନୂଆ ରେକର୍ଡ ସ୍ତର ହାସଲ କରିଛି।
ସେନ୍ସେକ୍ସରେ ଇନ୍ଫୋସିସ ଶେୟାର ପ୍ରାୟ ୩% ବୃଦ୍ଧି ହୋଇଛି। ବଜାଜ ଅଟୋ, ଏସ୍ବିଆଇ, ଆଇସିଆଇସିଆଇ ବ୍ୟାଙ୍କ, ଏଚ୍ସିଏଲ୍ ଟେକ୍, ଟାଇଟାନ, ଏସିଆନ ପେଣ୍ଟସର ଶେୟାର ମଧ୍ୟ ଉନ୍ନତ ସ୍ତରରେ ରହିଛି। ଅପରପକ୍ଷରେ ଇଣ୍ଡସଇଣ୍ଡ ବ୍ୟାଙ୍କ, ଓଏନ୍ଜିସି, ଏଚ୍ଡିଏଫ୍ସି ବ୍ୟାଙ୍କ, ମାରୁତି ଏବଂ ବଜାଜ ଫିନିସର୍ଭର ଶେୟାର ହ୍ରାସ ହୋଇଥିବା ଦେଖାଯାଇଛି। ବିଦେଶୀ ପୁଞ୍ଜି ପ୍ରବାହ ଯୋଗୁ ଘରୋଇ ବଜାରକୁ ଏହାକୁ ଲାଭ ମିଳିଛି। ଶୁକ୍ରବାର ବିଦେଶୀ ନିବେଶକମାନେ ଭାରତୀୟ ଶେୟାର ବଜାରରେ ୨୩୫୫ କୋଟି ଟଙ୍କା ନିବେଶ କରିଥିବା ଜଣାପଡିଛି।
