ଗୁଟଖା, ପାନ ଖାଇବା ସ୍ବାସ୍ଥ୍ୟ ପ୍ରତି କ୍ଷତିକାରକ। ଏକଥା ଜାଣି ମଧ୍ୟ ଲୋକେ ଏହାକୁ ଖାଇଥାନ୍ତି। ଏହାକୁ ଖାଇ ନିଜ ସ୍ବାସ୍ଥ୍ୟ ଖରାପ କରିବା ସହ ଛେପ ପକାଇ ପରିବେଶକୁ ବି ଦୂଷିତ କରନ୍ତି। ଗୁଟ୍ଖା ବିକ୍ରି କରୁଥିବା ଲୋକଙ୍କର ବି କାହାର ସ୍ବାସ୍ଥ୍ୟ ପ୍ରତି ଚିନ୍ତା ନ ଥାଏ। ସେମାନେ ତ କେବଳ ବ୍ୟବସାୟ କରନ୍ତି। ଗୁଟ୍ଖା ବା କ୍ୟାନ୍ସର ବିକ୍ରି ହେଉଛି ସେମାନଙ୍କ ରୋଜଗାରର ମାଧ୍ୟମ। ତେବେ ସବୁ ଗୁଟ୍ଖା ଦୋକାନୀ କିନ୍ତୁ ସମାନ ନୁହନ୍ତି। ଏବେ ଏକ ଗୁଟଖା ଦୋକାନ ବେଶ୍ ଚର୍ଚ୍ଚିତ ଅଛି। ଦୋକାନର ବିଶେଷତ୍ୱ ହେଉଛି ଏହାର ନାମ। ଦୋକାନଟିର ନାମ ହେଉଛି ‘ ଦ କ୍ୟାନ୍ସର ହବ୍’। ଅର୍ଥାତ୍ ଏଠାରେ କ୍ୟାନ୍ସର ମିଳେ। ଏଇ ନାମରୁ ହିଁ ଜଣାପଡେ ଦୋକାନୀ ଜଣକ ବ୍ୟବସାୟ କରୁଛନ୍ତି ସତ, ହେଲେ ଗ୍ରାହକଙ୍କୁ ଗୁଟ୍ଖାର କୁପ୍ରଭାବ ବିଷୟରେ ସତର୍କ ବି କରାଉଛନ୍ତି। ଯେଉଁଥିରୁ ଦୋକାନୀଙ୍କ ମନୋଭାବ କେତେ ଉଚ୍ଚ ଜଣାପଡେ। ରାସ୍ତାକଡରେ ଥିବା ଏହି ଦୋକାନଟିରେ ବିଭିନ୍ନ ପ୍ରକାରର ପାନ ମସଲା, ଗୁଟଖା ପ୍ୟାକେଟ୍ ଟଙ୍ଗା ଯାଇଥିବା ଦେଖିବାକୁ ମିଳେ। ତା’ସହ ବଡ଼ ବଡ଼ ଅକ୍ଷରରେ ଲେଖା ଯାଇଥିବା ଦୋକାନର ନାଁ କ୍ୟାନ୍ସର ହବ୍ ବି ଦେଖିବାକୁ ମିଳେ। ତେଣୁ ଗୁଟ୍ଖା କିଣିବାକୁ ଆସୁଥିବା ବ୍ୟକ୍ତି ଏହି ନାଁ ପଢି କିଛିଟା ସଚେତନ ହୋଇପାରିବେ। ଏଇ ଛୋଟିଆ ବ୍ୟବସାୟୀଙ୍କର ଏଭଳି କାର୍ଯ୍ୟ ଅନେକଙ୍କ ମନ ଜିଣିପାରିଛି।
